Em ketine demsala payiza dawî

30-40 sal berê kesên der û dora me, dost û hevalên me, dê û bavên me hewqasî li pey hev nedimirin.

Em ciwan bûn, wê demê ne wexta mirina wan û me bû. Lê nuha em hatine nêzî dawiya rê, roj tuneye yek du kes ji nav me kêm nebin. Her roj em rahmê li çend miriyan tînin.

Em ketine demsala (mûsima) payiza dawî, em yek bi yek dikevin binê axê. Her kes zane mirin heye, rojekê ewê were li deriyê meriv jî xe.

Lê dîsa jî kes naxwaze mirina xwe qebûl bike, meriv tim wek merivekî nemir hereket dike.

Mirî diherin xelas dibin, derd dimîne ji yên zindî ra.

Çend rêz ji bîranînên min -296-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1986-11-18

Îro danê nîvro(13.30)çûm mala Memo Yetkîn. Got ezê romana Bavê Nazê çap nekim. Me dixwest çap bike lê got ez çap nakim. Seben çi ye, çima çap nake nizanim, got nikanim çap bikim. Belkî kêfa wî ji romanê ra nehatibe. Memo kitêba jê hez neke çap nake.

Di sohbeta me da got, ji ber ku min di rapora xwe da hin aliyên kitêba Firat Cewerî û Ferhat Şakelî kirîtîk kiriye herdu jî ji min xeyidî ne.

Zulma yê xurt ji nedîva tê dîtin

Ev sê roj in Fasebookê kontoya min girtiye. Hetanî sibe van çaxan jî ewê venebe. Ev neheqiya FBê bi min pir zor tê, lê ez nikanim tiştekî pê bikim. Nikanim xwe biparêzim, nikanim neheqiya wê îspat bikim.

Dinya wiha ye, xurt zulmê dikin ji wan ra dimîne, zulma wan, terora wan ji wan ra dimîne.

Welatê me dagir kirine, di ser da zulmê li me dikin, her roj me dikujin, welatê me topbaran û bombebaran dikin, ji ber ku xurt in dinya li zulma wan temaşe dike.

Çend rêz ji bîranînên min -295-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1986-11-17

Di rojnameya Expressenê a îro da li ser kuştina serokwezîrê Swêd Olof Palme û PKKê nivîseke Eşref Okumuş heye.

Nivîseke baş e, kurdên Swêd diparêze. Lê bi parastina kurdan ra ne eşkere, bi şiklekî îndîrekt li apociyan jî xwedî derdikeve.
Helbet wek rojnamevanekî kurd nabe bibêje ez ji PKKê şikê dikim, ya jî şika pûlis ji PKKê dike rast e.
Hin şopên din, Sovyet jî di nav da hin dewletên mezin derdixe pêş, dibêje dibê meriv li wan îhtîmalan jî binêre.

Ji Wêranşarê çend peyvên xerîb

Do xanimê li ber tirşika bamîya bulxurekî(savar)bi sewz çêkiribû. Çer çend kevçî xist sehana min bîneke ne xweş jê defiya.

Min got xanim bîn ji vî bulxurî tê. Got bîna nayê min. Min dîsa bîn kir, erê bîneke pîs jê dihat.

Min got xanim, navekî vê bînê heye, dema bîn diket bulxur û birincê me navek lê dikir, ew nav tê bîra te?
Got erê tê bîra min, me digot bulxurê me "hinikî" bûye.

Min li ferhengên li ba xwe û li yên dîgîtal nêrî di yekê da jî rengdêra ”hinikî” tune ye.

Çend rêz ji bîranînên min -294-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1985-11-16
Îro roja duduyê şîna Mistefa Tanguner bû. Şînê wek do dîsa saet di 12.00a da dest pê kir, di 18.00a da qediya. Îro milet baş hat, qey xelkê xeber dabû hev.

Me îro ala Kurdistanê û ala partiyê anî bi darda kir. Me li ser jiyana Mistefa buroşorek û belavoka Polît Buroya Partiyê (PPKKP/Partiya Pêşeng a Karkerên Kurdistanê) belav kir. Çend hêzan li ser kuştina Semîr(Çetîn Gungor) belavokek mişterek derxistine, ew belavok jî di şînê da hat belavkirin.

Derdê hin siyasetmedaran nayê kişandin

Siyasetmedarên me na ne ji serpêhatiyên bav û kalên xwe, ne jî ji yên xwe ders û ibretê nagirin, ji vir û bêbextiyên dijmin bawer dikin û bi wan buhtanan hevdu tometbar dikin.

Derdê hechecikê ji xelkê Yemenê pirs kin, derdê siyasetmedarên kurd jî ji kurdan pirs kin. Derdê hin siyasetmedarên kurd nayê kişandin.

Çend rêz ji bîranînên min -293-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1985-11-15

Me îro li Stockholmê li taxa Husby Treffê şîna Mistefa Tanguner çêkir. Em saet ji 12.00 hatanî 18.00 rûniştin.
Me texmîn dikir ewê gelek kes werin lê bi qasî me texmîn dikir milet nehat. Ez bawer dikim me xebera şînê baş belav nekiribû. Kêmasiya me ya herî mezin me ala partiyê û ala kurd neanîbû. Her kesî kir sûcê yê din.Vê yekê moralê me pir xera kir. Jixwe kuştina Mistefa em giştevizandine. Emê sibe jî şîna xwe li vir bidomînin.

Kurdek nedîtin wezîfe dan yeka ereb

Ji ber teqîna do li Stenbolê çêbû dîsa barek derew li hev ragirtine, ev bûyera terorîstî bi PKKê, PYDê, YPGê ve girê dane.

Êdî PKK têrê nake, tim PYD, YPGê jî pê ve dikin. Dibêjin ne PKKê tenê, hersiyan bi hev ra biryara teqîne Stenbolê dane. Çimkî hedefa wan ji PKKê bêtir êdî PYD, YPG ye. Dixwazin êrîşî Kobanê û rojavayê Kurdistanê bikin. Ji bo wê ev senaryo tertîp kirin.

Ji do da ye Stenbol li Kurdan kirine dojeh. Xuya bû ewê wiha bikin, ewê tiştekî li hev ragirin. Ji zû da ye ji bo ku Kobanê jî bikin Efrîn dek û dolaban digerînin, pilanan çêdikin.

Hetanî hilbijartinan tiştên wiha ewê zêde bikin; ev îhtîmal xurt e.

Dikin zulma xwe ya li ser kurdan hinekî din zêde bikin.