Du dîtinên li ser "Rû û Kûr"

Şêxo Fîlîk li ser kitêba A. Duran Topuz ”Rû û Kûr” di malpera "Diyarnamê da rexneyeke edebî kiriye, bîr û baweriyên xwe gotiye, Înan Erdoglu jî li ser rexeneya Şêxo Fîlîk fikrê xwe gotiye. Herdu nivîs jî hêjayî xwendinê ne.

Şêxo Fîlîk nivîskarê kitêba "Bêbavî" yê ye. Bêbavî, ji alî weşanxanea Avestayê hatiye weşandin. Min bi xwe kitêb nexwendiye.

Dezavantaja jiyana li xerîbiyê, dûrbûna ji welêt yek jî ev e, him haya meriv di wextê da ji her tiştî çê nabe, him jî gava meriv pê dihese nikane rabe here ser kitêbfiroşekî û kitêbê bikire.

Ez nuha dibînim "Bêbavî" sê sal berê dema derketiye pir olan daye, gelkî hatiye ecibandin. Heger min dîtibe jî nuha nayê bîra min.

Şêxo Fîlîk di nivîsa xwe da çend xîç avêtine ji min da jî, ez jî rexne kirime. 

-LiSer ‘Rêyeke Nû’ Lêgerîna Rêçên ‘Rû û Kûr’

-Rexneyek li Rexneya Şêxo Filîk ya derheqê Rû û Kûr de:

Nivîsa min li ser "Rû û Kûr" ne nivîseke rexneyî û analîtîk bû, cara pêşî bû min "çîrokên mînîmal" dixwend. Yek, ji ber vê kêfa min jê ra hat, ya din jî ji ber ku nivîskar ji Qoçgiriyê bû û bi deveko wir nivîsî bû min pesnê kitêbê da. 

Lê min nexwest qala kêmasî, şaşî zeîfiyên wê bikim, li ser naveroka wê tiştekî bibêjim. 

Û ji xwe tu nêteke min ya wer jî tunebû, lema jî min bi çavekî rexnegirî nexwend. Û ez ne rexnegir im jî.
Lema jî Şêxo Filîk di hin rexneyên xwe da bi heq e.

Ez lînka nivîsa Şêxo Filîk û ya Înan Eroglu, herduyan jî diweşînim. Di herdu nivîsan da jî tiştê ez rast dibînim û tiştê ez rast nabînim hene.

Nivîsên wiha him ji bo nivîskar û him jî ji bo xwendevan pir bi feyde ne, asoya meriv berfireh û mistewa fêmkirina edebî bilind dike.

Kesê bixwaze kane herdu nivîsan jî bixwîne.