Gêj Stand-Up”ê bi henekên xwe kurdên Stenbolê îhya kirine

Li Stenbolê çend ciwanên me yên jîr, jêhatî ev saleke bi navê “Gêj Stand-Up”ê derdikevin sehnê, bi henek û mîzaha kurdî kurdên Stenbolê îhya dikin.
Stand Upa wan di nava kurdan da deng daye.
Ji bo vejîn û xurtkirina ruhê netewî, ji bo belavkirina kurdî û teşwîqkirina ciwanan berbî kurdî va stand-upa kurdî ji muzîkê jî bi tesîrtir e.

Însên fêrî kurdî dike, cesaretê dide ciwanan zimanê xwe fêr bibin û bipeyivin. Di nava ciwanan da pêşketina stand upê, programên podcastê pir baş e. Him zimên, mîzaha me bi pêş dixwîne, him jî ruh û hestên kurdî bi ciwanan ra xurt dike. Kana hin kabîlîyetan jî derxîne. Yanî feydeyên wê pir in.

Ez van xortan ji dil û can pîroz dikim. Li dijî asîmîlasyonê karekî pir muhîm dikin.

Ji bo vejîna ruhê netewê, fêrkirina kurdî tu tiştekî din bi qasî stand upa kurdî ne bi tesîr e, rola mamostetiyê û xurtkirina hestên netewî dilîze.

Însan ne li dibistan û dersxaneyan,li solanên sînemê û şahiyan bi mîzahê,bi ken û laqirdiyan fêrî zimanê xwe û mîzaha kurdî dibin.

XXX

Di jiyanê da, di siyasetê da dirist bin, rastgo bin hûnê tim li karê bin, hûn ji ratgoyiya xwe tu carî ne zirarê bibînin, ne jî serberjêr bin.

Merivê rastgo wek şîrê mîhan pak e, tim piştrast û serbilind e. Rastî bibe dezî jî naqete.

Tiştê însên pir pîs û bêşexsîyet dike derew e, bira ji we dûr be...

XXX

Firat Aydinkaya, Sînan Gultekîn, Aydin Ekîn li ser wergera "Bindest Dikanin Biaxivin" sohbeteke pir xweş, bi feyde dikin. Hêjawî guhdarîkirinê ye, jê bêpar nemînin.

Pall Weşan kitêbên pir muhîm çap dike, xwediyê weşanxana Pallê Înan Eroglu eynî wek moza hingiv e, li ku derê kulîlkek xweş hebe diçe li ser vedinije.

XXX

Hin tajiyên me ji miletê xwe ra nêçîrê nakin, fêrî nêçîrvaniya ji xelkê ra bûne. Hêza xwe,zanîna xwe, ilmê xwe, qelema xwe nakin xizmeta miletê xwe, dixin xizmeta tirkan û tirkî.

Xîret û namûs bi her kesî ra tam tune ye, tu çiqas sîr û pîvaz di pozên wan va dikî jî li ber xwe nakevin.

XXX

Xemla konan çît û stûn in

Xemla keran herdu guh in

Xemla qazan meş e

xemla qîzan kezî û bisk e

Xemla jinê kofî ye
Xemla xortan tûncik û temerî ye

Xemla malê kebanî ye

Xemla mirêşkê hêk e

Xemla rez rezvan e

Xemla rûvî boç e

Xemla serî kum e

Xemla şûv toxim e

Xemla zeviyan genim e

Xemla zivistanê serma û berf e