Tirkiyê û Sûriyê bi peymana Parîsê destûra êrîşa ser kurdên Helebê ji Amerîkayê girtin

Tirkiyê û Sûriyê bi peymana di 5-6´ê mehê da li Parîsê di nabêna Sûriyê û Îsraîl da hat îmzekirin destûra êrîşa ser kurdên Helebê ji Amerîkayê girtin

Hefteya borî, di 5-6´ê vê mehê da, di bin serokatiya nûnerê Amerîkayê yê Sûriyê Tom Barrack da li Parîsê di nabêna nûnerên Îsraîl û wezîrê karên derve yê Sûriyê Esed Hasan Şeybani da peymaneka ewlekariyê hat îmzekirin.
Hin madeyên peymanê eşkere ne, di medyayê da hatin belavkirin, hin jî ne eşkere ne.

Meriv kane bibêje, bi vê peymanê Sûriyê dev ji Girên Golanê berdaye, ew daye Îsraîl û gelek şertên Îsraîl ên din jî qebûl kiriye. Lê ev ne eşkere ne.

Bi baweriya min Sûriyê û Tirkiyê bi vê peymana Parîsê Girên Golanê û hin tiştên din jî dan Îsraîl. Li hemberî vê bertîlê, Amerîka û Îsraîl jî destûra êrîşa ser kurdên Helebê dan Tirkiyê.

Yanî bi îhtîmaleke pir mezin Tirkiyê destûra êrîşa ser kurdên Helebê, ser taxên Şêx Meqsûd û Eşrefiyê bi peymana Parîsê ji Amerîkayê û Îsraîl girt.
Û piştî du rojan jî çeteyên Colanî di bin fermandariya artêşa Tirkiyê da li Helebê, li taxên Şêx Meqsûsd û Eşrefiyê dest bi qetlîama kurdan kirin.
Li gorî beyanên wezîrê karên derve yê Tirkiyê Hakan Fîdan, çend caran ji Mezlûm Abdî xwestiyê sîlehên xwe deyne, teslîm bibin, lê HSD´ê guh nedaye Evdila Ocalan. 

Heger ev îdîa rast be(bi ya min rast e), ev jî bûye sebebê HSD perçe bibe û nikanibe hemû hêza xwe bi kar bîne.

XXX

Bi serokatiya Tirkiyê qatilên Colanî li Helebê li hemberî kurdan wehşeta DAIŞê û El Qaîdeyê kirin dubare dikin.

Amerîka, Fransa, hêzên Hevpeyman bêdeng in, li wahşeta çeteyên Colanî û Tirkiyê temaşe dikin. Ji serokên HSD´ê û PYd´ê jî deng dernayê.

Şervanên kurd li dijî DAIŞê bi qehremanî şer kirin, Daîş şikandin, cîhan ji terorîstan parastin. Îro roja herî zêde hewcedarî van şervan, vî miletî bi alîkariyê heye, dinya, hevalên wan careke din bêbext derketin, li kuştina wan temaşe dikin.

XXX

Çeteyên Ehmed el Şara Colanî û Tirkiyê wek wahşên Daîşê vîdeoyên wahşeta xwe, nemirovahîya xwe belav dikin. Jin û xortên kurd ên êsîr girtine bi ”Allah û Ekber, tekbîr, tekbîr” îşkence dikin.

Ji kurdên êsîr girtine ra dibêjin ”xenzîr, kurdê xenzîr/beraz).”

Tirkiye li hemberî kurdan destegê dide van hovên îslamî.

Wezîrê parastinê yê Tirkiyê Yaşar Guler do got, bi operasyona li hemberî kurdên taxên Şêx Meqsûd û Eşrefiyê ew memnûn in û destegê didin artêşa Sûriyê.

Xedariyeke, zalimeyek, neyartiyeke ji viya mezintir nabe. Tirk eşkere li hemberî kurdên Helebê jenosîdekê organîze dikin, didin meşandin. Ez naxwazim wan vîdeoyan belav bikim.

Di medyaya sosyal da pir in.