Fermana Colanî belav kiriye lîstikeke Tirkiyê ye

Qeyûmê Tirkiyê yê Şamê, Colaniyê terorîstê bi tayinê bûye serokê Sûriyê, do ji nişka ve li ser Kurdan û HSD´ê fermanek belav kiriye. Qala biratiya ereb û kurdan kiriye, ji bo xapandinê gelek şalûzî filan û bîvan kiriye.

Heger hûn kurdan wek birayên xwe dibînin, çima li Helebê we kurd qetil kirin, çima we cendekê keça kurd wek wahşan ji qatê sisiyan avêt jêr ?
Çima we kesên we êsîr girtin kuştin, dilê wan derxist?
Çima çeteyên we bi sedan vîdeoyên wahşeta xwe belav kirin?
Çima hûn Peymana 10´ê Adarê bi cî naynin?

Colanî di fermana xwe da gelek demagojî kiriye, wek serokên Tirkiyê her roj dikin wî jî pesnê kurdan daye, gotiye ewê kurdan gişan bikin hemwelatiyê Sûriyê û li herêmên kurd lê zêdene kurdî bibe dersên hilbijare.
Yanî mêrik kurdî nake zimanê resmî jî…
Kenê min hat, qeşmeriyeke mezin e.
 Statuya kurdan, meclîsa wan, hêza wan a leşkerî tune ye, efendî ewê kurdan bike hemwelatiyê Sûriyê û destûrê bide dersên kurdî.
Beyaneke tirka ye, def di hustuyê Colanî da ye, qolik di destê Erdogan da ye. Ev beyan plana Erdogan A ye, ya xapandinê ye. Di beyanê tu tiştekî baş, kurd kanibin qebûl bikin tune ye. Ji ber zexta Amerîka û derve, dixwazin serî li kurdan bigerînin, pê wextê qezenc bikin.
Kurd hemwelatiyên Tirkiyê ne jî, çi fêda me, çi heqê me yê netewî tê da heye?
Kurd ne motajî hemwelatîtiya Sûriyê ne, kurd dixwazin li welatê xwe, xwe îdare bikin. Wek Colanî, ew jî xwedî meclîs, xwedî leşker, xwedî pûlis, dibistan, zanîngeh bin. Perwerdeya kurdî wek erebî resmî û ji dibistanên destpêkê, heta zanîngehê be.
Sûriye Federasyon e, zimanê kurdî jî wek erebî resmî be.
Kurdan hewqas bedelên giran dane ne ji bo ku bibin leşker, esker û mamûrên ereban. Tirk dixwazin dûzana xwe li Sûriyê jî bi kurdan bidin qebûlkirin.

XXX

Dîtina vî rismî ez pir kêfxweş û dilşa kirim. Civîneke tarîxî ye. Serokên kurd bi nûnerên Amerîkayê ra li ser maseyekê qedera kurdên Kurdistana Rojava minaqeşe dikin. Ev dîmen pir muhîm e, doza kurdên Rojava bûye meseleyeke navnetewî. Pêşketineke tarîxî ye.

Dibê kurd di rojên wiha teng da dest bidin hev.

Xwezî serokê YNK´ê jî hebûya.

Dibê meriv HSD´ê bi tenê nehêle. Beşdariya ENKS´ê û PDK´ê pir muhîm e. Ji HSD´ê ra di warê siyasî, eskerî û psîkolêojîk da pişteke xurt û gelkî muhîm e.

Înşela bazareke xerab nekin.

Bersîva îdareya kurdan

Ev bersîva kurdan daye Ehmed Şer tirsa dilê min ji ortê rakir. Bi vê bersîvê HSD´ê/PYD´ê gotiye beyanên wiha nabin garantiyeke rastîn a mafên civakên Sûriyeyê, heta ku nebe mafekî destûrî .

Çareseriya rastîn federasyon e, dibê kurd ji vê daxwaza xwe nayên xwar.

Piştgiriya kurdan ya navnetewî pir mezin e, tarîxî ye. Dibê kurd vê fersendê ji dest xwe nedin. Careke ne şertên wiha peyda dibin, ne jî piştgiriyeke hewqasî xurt.

Tirkiye ketiye feqê, cî pir lê teng bûye. Dibê tirk ji vê feqê xelas nebin.