Gurrîyê tirkan bûye gulîsor

Rûdawê xebera programa serokê MHP´ê Devlet Bahçeliyê pantirkîst û neyarê miletê kurd a Cejna Qurbanê daye. 

Gotiye Devlet Bahçelî di 7´ê hezîranê da ewê ji kerema xwe ra here cejna DEM partiyê jî pîroz bike. 
Hîn eydî nehatiye, mêrik hîn neçûye, ji nuha da nizgîniya serdana wî dane.

Fena ku bibêje di 7´ê hezîranê da roj ewê li kurdan hilê, zatekî, muhteremekî wek Devlet Bahçelî ewê li xwe deyne, ewê wê nefsbiçûkiyê nîşan bide here serdana DEM partiyê.
Ne Rûdaw tenê, gelek kurdên din jî Devlet Bahçelî zêde diwerimînin.

Silava Bahçelî jî êdî ji bo hin kurdan dibe mizgîneke xêrê, xebereke kêfxweşiyê.
Gurrîyê tirkan li ber çavên me kirine gulîsor.

Em nemirin emê hîn gelek ibret û sosirtan bibînin. Bi bawerîya min ne hewceye meriv faşîstê durû hewqasî mezin bike. Tirk bi zanetî wî didin pêş, reqlama wî dikin.
Serê Devlet Bahçelî pir mezin dikin. Devlet Bahçelî pantirkîstekî neyarekî miletê kurd e, dixwaze bi silavekê kurdan bixapîne.

XXX

Ka werin vêsê em bîstekê guh bidin hemşeriyê minê bilûrvan, Ehmedê Kumnexşî.

Ji bera me Xamoya Hemzê Biro û xalê min Reşo, herdu jî bilûrvanên pir baş bûn. Apê Hemzê bi bilûra xwe keç ji malan derdixist, kerîyê pez nediçêriya, lê guhdarî dikir. Herdu jî çûne rahmetê.

Bilûrvanên me bi dirana li bilûrê dixin, ne bi lêvê.

Li Wêranşarê dawetên gundan bi bilûrê bû, def di dawetên gundan da nedihat lêxistin.

Di zaroktîya min da tê bîra min, li bajêr jî di dawetan da bilûrvanan li bilûrê dixist. Muzîka dawetên Wêranşarê bilûr û dev û zurne bû, înstrumentên din li ba me bi kar nedianîn.

XXX

Tiştekî dûrî aqil e lê rast e. Xelk 4000 km ji dûr kane bi kompîtorekê hewqas balafirên welatekî îmha bike. Ev çi teknîk e bavo ?

Êdî ne hewceyî şerê cepheyî û bi sedhezaran leşker e. Robot, drone her herbê dikin.