Nivîsek û bîranînek 23 sal berê

Di Facebookê da ez rastî malpera(sîteya) Çolemêrgê hatim û min jê ra nameyek bi Kurdî nivîsî.
Min di wê nama xwe da berpirsiyarê malperê ji bo vê xebata wî ya hêja pîroz kiribû û ji bo ku malper tenê bi Tirkî ye hin rexne lê girtibûn.
Min gotibû heger malper ya Çolemêrgê (Hekarî)ye lema jî divê ew bi Kurdî be.
Îro, dema min dîsa li malperê nêrî, min dît yekî faşîst bi îmza "anonîm" ji nivîsa min gelkî aciz bûye, li hember min bêedebî kiriye, gotiye "bêşeref" û ji berpirsiyarê malperê ra jî gotiye tu çima nivîsên bi Kurdî diweşînî?

Xwediyê nivîsê navê xwe bi dizî girtiye, nivîs bi îmza "anonîm" şandiye û gotiye "li Tirkiyê şoreşa herî mezin faşîzm e".

Ev jî nîşan dide ku ev kes merivekî nexweş û bêşexsîyet e.

Heger hinkî şexsiyeta wî hebûya wî yê bi navê xwe yê rastîn binivîsîya ji bo ku her kesî ew û dijminatiya wî ya li hember Kurdan bi çavên serên xwe bidîta.

Ev kesê nexweş û bêşexsiyet bi hawakî eşkere "faşîzmê"diparêze, dibêje xelasiya Tirkiyê di "faşîzmê"da ye.
Merivikî normal û ne nexweş di vê sedsala bîstûyekê da nabêje xelasiya Tirkiyê di faşîzmê da ye.
Faşîzim îdeolojiyeke li dijî demokrasiyê û însaniyetê ye, li her derê dinya medenî yasax e û parastina wê sûc e.

Lê bêdeb û tirsonekê êrîşî min kiriye vê îdeolijiya li dijî însaniyetê bi hawakî eşkere diparêze. Ev jî îspat dike ew merivekî nexweş e.
Dîsa vî bêdebî di nivîsa xwe da ji min ra gotiye "bêşerf".

Diyar e ew ne tenê bêedeb û tirsonek e, her wisa merivekî BÊŞEREF e jî!

Heger şerefa wî hebûya û hinekî jî li ber xwe keta ji min ra nedigot "bêşerf."

Çimkî yê ji diya xwe hez bike ji diya xelkê ra xeberan nade, yê li ber şerefa xwe keve û qedir bide şerefa xwe ji xelkê ra nabêje bêşeref.
Baş e, gelo hewqas êrîş û hêrs ji bo çi?

Ji ber ku min çend rêz bi Kurdî nivîsandine "faşîstê tirsonek" pir tûre bûye, dinya wî hilweşiyaye, bi berpirsiyarê malperê da xeyidîye, gotiye tu çima destûrê didî nivîsa bi Kurdî?

Ew dixwaze hemû Kurd bibin Tirk û bi Tirkî bipeyivin.

Ew faşîstekî hewqas prîmîtîv e nikane tehamulî hebûna min bike, dixwze zimanê diya min li min qedexe bike.

Berî her tiştî ez ne Tirk im û ne mecbûr im bi Tirkî binivîsim.

Ya din jî malper, malpera bajarekî Kurda ye û hemû Kurd jî bi Tirkî nizanin. Kane ne tenê bi Kurdî, bi gelek zimanên din jî were nivîsîn. Yên jê fêm dikin ewê bixwînin, yên jê fêm nekin jî ewê nexwînin.
"Faşîstê bênav", di dereke nivîsa xwe da gotiye " çend Kurd bi hawakî samîmî dikanin bibêjin ez naxwazin Kurdistan çê bibe û ez ji Tirikiyê hez dikim?"
 Ez fêm nakim ji bo çi Kurd ewê bibêjin "em naxazin Kurdistan çê bibe.?"

Ma çima Kurd dîn û kêmaqil in?
Baş e, vê pirsê ez jî ji te û ji hemû faşêstên wek te dikim:
-Hûn çima naxwazin Kurdistan çê bibe û Kurd jî wek hemû miletên dinyayê bibin xwdî dewlet?
Ma axa Iraqê, Îranê û Sîriyê jî ya Tirkiyê ye? Li van welatan jî Tirkiye naxwaze Kurd mafekî netewî bidest xin.
Gelo ji bo çi?
Ma Kurdan çi bi we kiriye?
Ji alî xwe da ez bersîvê bidim, wek Kurdekî helbet ez dixwazim Kurdistan rizgar bibe û Kurd jî wek her miletî bibin xwedî dewlet.

Lê ji bo tiştekî weha tu sebeb tuneye ez, ya jî Kurd bibin dijminê Tirkiyê.

Ji xwe Kurd îro jî ne dijminê Tirkiyê ne, tenê ev paranoyiyeke kemalîst û faşîstên Tirkan e. Em Kurd mafên xwe yên herî demokratîk û herî însanî dixwazin, em azadiya ziman û nasnameya xwe dixwazin.

Em dixwazin wek Kurd bijîn, çimkî em ji diya xwe Kurd hatine dinyê.

Divê Tirk viya fêm bikin.

Çawa ku yekî Tirk ne Yûnan e, ne Ereb e, her wisa em jî ne Tirk in, em Kurd in û emê Kurd bimînin.
Tiştekî din yê herî balkêş, "faşîstê min yê bênav" ne tenê li Tirkiyê li dijî Kurda ye, ew naxwaze li Iraqê jî Kurd bibin xwedî dewlet û ji bin zulma Saddam rizgar bibin.

Bi rastî ev bûyereke klînîk e, kesên weha difikirin divê herin ser psîkyatiran tedawî bibin.

Ji xwe yê Tirkiye xiztiye vê rewşa malkambax jî ev siyaset û ev tirsa, paranoyiya ji dewleta Kurd e.
Bi vê siyasetê Tirkiyê mala xwe şewitandiye, ji Kurdan bêtir zirar dîtiye û hîn jî dibîne.
Divê serok û rêberên milet û dewleta Tirk dev ji vê siyaseta li dijî Kurdan berdin û hinekî realîst bin, siyaseteke weha ewê li kara be. Nexwe miletê Tirk ewê hîn pir perîşan bibe.
Zinarê Xamo

2002-11-23