Tiştê hûn ji filistîniyan ra dixwazin çima hûn ji miletê xwe ra naxwazin?

Hin kes, bi taybetî jî hin kesên îslamî tiştê ji filisîtniyan ra dixwazin ji miletê xwe ra naxwazin. Ji filistîniyan ra dewletê dixwazin, lê ji bo miletê xwe qet qala tiştekî wiha nakin; fena ku daxwazeke wiha sûc be, qebhet be. 

Îsraîl dixin binê erdê, ji filistîniyan ra dewleteke serbixwe dixwazin, lê gava mesele tê ser Tirkiyê zimanê wan li hev digobile, tu dibê belkî kulîyan zimanê wan xwariye,  retorîka wan a li hemberî tirkan ji bin da giguhere, zimanekî pir nazik, hurmetkar bi kar tînin, tiştekî naxwazin.

Qet qala neheqî û dagirkeriya Tirkiyê nakin, nabêjin serxwebûn heqê kurda ye, dibê tirk vî mafê kurdan bidin. Qala hin daxwaz maxwazên biçûk dikin. Fena ku kurd mahcir bin û dibê tirk hin mafên kulturî bidin wan. 

Ji bo filistîniyan dibêjin çareseriyeke mayinde çêbûna dewleta filistîn e, lê ntegrasyonê, guherandina Tikriyê, demokratîkkirina Tirkiyê pêşniyarî kurdan dikin.

Rexneyên li Îsraîl digrin tu carî li Tirkiyê nagirin, tiştê ji bo filistîniyan ji Îsraîl dixwazin tu carî ji kurdan ji Tikriyê naxwazin.

Yanî li hemberî tirkan tim xwe otosansur dikin, fena ku Tirkiye li Kurdistanê ne dewleteke dagirker be, Kurdistan welatê wan be, lê hin neheqiyan li kurdan dikin, dibê hinekî bi merhemet bin û kurdan zêde neêşînin.

Fena ku kurd mahcir bin, dibê tirk hin mafên kulturî bidin wan û zimanê wan serbest bike.

Ev şêla îslamîstên me dubulmoralî ye, bêexlaqî ye. Tiştê hûn ji bo filistîniyan heq dibînin dibê hûn ji bo gelê xwe jî heq bibînin û bixwazin. Tirk vî heqê me didin nadin tiştekî din e, dibê meriv bibêje.

Kurd ne mahcirên ji derva hatine, yên ji derva hatine, yên mahcirên vê axê ne tirk in. 

Yên welatê me dagir kirine ew in. Em nuha bi wan nikanin, em nikanin wan ji welatê xwe derxin ev tiştekî din e. 

Lê ji bo ku ew xurt in nayê maneye merivê rastiyê nebêje, xwe sansur bike.