Bêyî dagirkerên welatê xwe dibê em ne li dijî tu dewletê bin

Em gelek caran li ser şerê Îsraîl û filistîniyan dikevin gewriya hev, hevdu aciz dikin, carnan jî dilê hev dihêlin.

Bi baweriya min wek ferdên miletekî bindest bêyî dagirkerên welatê xwe û hêzên girêdayî wan dibê em ne li dijî tu dewletê bin.

Em miletekî bindest in, welatê me hatiye dagikirin, em motajî alîkariya her dewletê, her kesî ne. Bêyî dewletên dagirker û şûrkêşên wan dibê em dijminatiya tu kesî nekin.

Em nikanin wek însanên xwedî dewlet xwe tevî gelşên xelkê û dinyayê bikin.
Ne rast e em ji bona filistîniyan ya jî ji bo miletekî din bela xwe di xelkê bidin, êrîşî Îsraîl, Amerîkayê û dewletên ewrûpî bikin.
Filistînî tenê ji bo xwe dixebitin, piştgiriya tu tevgereke biyanî nakin. Ji bo wê jî ji welatên demokratîk bigire, heta bi dîktatorên herî zalim alîkariya her kesî qebûl dikin. Lema tu carî Tirkiyê, Îranê rexne nakin, çimkî alîkariyê ji wan digrin.
Dibê em kurd jî wer bikin. Ji bo filistîniyan ya jî hêzeke din dijminatiya Amerîkayê, Îsraîl û tu kesî nekin.

XXX

Piştî Mêrdînê, Batmanê, qeyûm danîne ser belediyên Dêrsimê û Pilûrê jî. Dagirker êdî îradeya milet jî qebûl nakin. Miletê bindest ne xwedî îradeya xwe ye. Tu ne xwediyê welatê xwe bî, tu nikanî bibî reîsê belediya welatê xwe jî.

Ji bo ku tu bibî reîsê beledîya bajarê xwe dibê tu ne bindest bî, tu xwediyê welatê xwe bî. Dibê em ji bindestiyê xelas bibin.

Gelê Dêrsimê li dijî vê zulmê bi egîdî li ber xwe dide, vê xesba bi zorbatî protesto dike.

XXX

Qeyûmê Batmanê Ekrem Canalp, zarokxaneya bi navê Beybûnê, pererdeya wê bi kurdî bû daye girtin.

Ji xwe ji bo ku zarokxaneyê bigire, nehêle zarokên me bi zimanê xwe perwerde bibin bûye qeyûm.

Gerek her kurd wek navê xwe bizanibe hukûmet, dewlet neyarê zimanê me ye. Dixwazin zarokên me zimanê xwe fêr nebin ji bo asîmîlaston zûtir û rehettir bibe.