Ev demeke xwendevanên bloga min zêde bûne

Bloga min van roja dîsa hinekî populer bûye, xwendevanên min li gorî meha berê zêde bûne. Tiştê meriv dinivîse were xwendin xweş e, kêfa meriv tê.

Gelo blog hîn tên xwendin?
Çend blogên bi kurdî hene, tên xwendin ya nayê xwendin ez nizanim.

Lema jî di heqê blogerîya kurmancî da nikanim tiştekî bibêjim. Lê li dinyayê blog êdî zêde nayên xwendin, gelek platformên din ketine dewsa blogê.

Lê bloga min tê hîn tê xwendin. Îro 786 kesan, do 864 kesdan, vê mehê 3739 kesan riya xwe bi blpoga min Hindik-Rindik xistine, xwendine, bala xwe danê.

Ji bo min, wek blogerekî kurmancî ev jimar ne reqemeke hindik e, ez jê memnûn im, sipasdarê şopîner û xwendevanên xwe me.

Jimar hin rojan kêm, hin rojan zêde dibe. Van rojan jimara tikandinê zêde bûye. Ev yek ya ez van rojan tiştên balkêş dinivîsînim, ya jî xwendevanên terka min kiribûn poşman bûne, bi paşda hatine.

XXX

Ji bo ku hin siyasetmedaran di nîvê rê da dev ji micadela azadiyê berdan, miletê xwe, dost û hevalên xwe xeyalşikestî kirin meriv li ber dikeve, dibêje xwezî wiha nekirina.

Micadela ji bo azadiya miletê kurd ne karekî rehet e, jê ra sebat û fedekarî lazim e, her kes nikane vê riyê hetanî dawiyê dom bike. Bîna hinekan zû diçike.

Ne ji hesinê xerab şûrê baş çêdibe, ne jî kahrê sêwî dibe nêrî.

Di xortaniyê da, di destpêka micadelê da meriv şagirt e, viya nizane. Dûra, hêdî hêdî, meriv dibe xelfe, dûra dibe hoste, van tiştan baştir fêr dibe.