Çend rêz ji bîranînên min -176-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

1987-07-11

*Ez îro bi Rezaq Feylî ra peyivîm, me li qahwexanê hinekî sohbet kir. Got em kirinên apociyan rast nabînin û destegê nadinê. Lê wek hin hêzan  em ji wan ra nabêjin ”ajan” û MIT. Em PKKê wek hêzeke welatparêz dibînin.

*Dûra ez çûm aşxana Yilmaz(Selîm Bakac). Joce Blau, xweha wê û xanima Mehmet Tayfûn jî hatin wir. Kemal (Wehbî Aydin) em bi hev dan naskirin.
Em bi hev ra çûn Gamla stanê. Em bîstekê li wir gerîyan. Di vegerê da li hinda Meclîsa Swêd em rastî Şêrko Bêkes û çend kesên din hatin. Tesadufek pir xweş bû.

XXX
1997-07-11

Emê sibe saet di 22.30î da herin Almanya ba Metînê me. Em bi trênê diherin. Min ji keça Metîn ra cotek guharê zêr û kolyeyek kirî. Zêde ne buha ne, lê hukmê min hew lê hat. Me ji mezinan ra tiştek nekirî. Jixwe perê me jî hindik e, 1450 DMyê me heye. Ancax têra me bike. Îmkan heba me yê hin tiştên din jî bikiriya, çavê tunebûnê kor be. Lê ya muhîm em diherin serdana wan. Hêvî dikim keçik baş bibe.

XXX
1988-07-11

Rojvan(Rojevan Yeşî)înformasyon da me, got Seîd Aydogmuş çûye ba Mûrad Ciwan, gotiye dîtina min ya berê ye, tiştekî nuh ez bibêjim tune ye.
Mûrad jî jê ra gotiye, wê çaxê tiştekî ez jî bibêjim tune ye, em zêde hevdu nerehet nekin baştir e.
Seîd gotiye, ez dixwazim em bi hawakî medenî ji hev biqetin, were ezê dewr û teslîm bikim. Hêvî dikim dewr û teslîmê temam bike.

XXX
2001-07-11

Merheba!

Birayê Salih(Salihê Kevirbirî), min ev nivîs çend roj berê ji rojnameya Riya Azadî ra şand û ji wan xwest ku bersîvê bidin min. Lê heta nuha tu bersîv nedan min. Yanî ez nizanim ewê biweşînin ya na. Loma jî ez ji we ra dişînim. Heger hûnê biweşînin ji kerema xwe ra berîvê bidin min.

Bi silavên dostaniyê

Zinarê Xamo

XXX
2020-07-11
Şev baş kekê Zinar,

 Hêvî dikim hûn baş in. Min çend roj berê li ser WhattApê ji we re peyamek şandibû û gotibû, di demeke kin de di derheqê çapkirina pirtûkê de em ê agahdarî bidin. Hêvî dikim em dereng nemabin. Wekî weşanxane me plan kir ku çapa duyem ya ''Antolojîya Çîrokên Zarokan'' jî di nav de pirtûkên me yên ji bo çapê amade ne, di meha îlonê de çap bikin. Ger hûn jî tesdîq bikin em ê çapa duyem ya pirtûka we di meha îlonê de bikin. 

Gelek silav û rêz
Nedim Baran