Hinedaşk

Berî nuha bi çendakî di Facebookê da rastî vî rismê kevirê hinê hatim. Yê parve kiribû li navê wî dipirsî, digot hûn zanin ev çi ye, jê ra dibêjin çi?

Min nizanîbû, min ji xanimê pirsî. Xanimê got:
-Ev kevirê hinê ye, me jê ra digot, hinedaşk. Li gund hin taht hebûn, ser wan wa kesk bû, me ew nas dikirin. Em zarok li hev kom dibûn, bi hev ra diçûn ser wan tahtan û me destên xwe hine dikir.

Me xwezîya xwe tê da, tûyî ser dikir û kevirekî biçûk tê dida. Xwezîya me taht şil dikir, me kevirê biçûk tê da, dibû hine û me di destê xwe dida.

Ez jî li gund jiya me, tiştekî wiha qet nayê bîra min. Lê xanimê got, tahtên wiha li Qerejdaxê, li gundê me Malwêrîn hebûn, me bi wan destên xwe tim hine dikir.

XXX

Hûn zanin felsefa kurdan a parêzê, ya qelawnebûnê çi ye?
Ez ji we ra bibêjim:
-Kêm kêm bixwe, hertim bixwe.
Heger hûn li gorî felsefa pêşiyên xwe hereket bikin hûnê motajî dîyetîsyenan nebin.
Çav nebar e, tim ji zik birçîtir e. Di xwarinê da çavnebariyê mekin, hûnê li karê bin.

XXX

Ji xelkê ra pirbêjo, ji min ra kerr û gêjo. HUDAPARî, îslamîstên me ji misilmanên dinyayê ra, ji filistîniyan ra, ji tirkan û farisan ra pirbêj û çelziman in, lê ji miletê xwe ra lal in, kerr û gêj in. Ji rojan rojekê li dijî zulma li miletê wan dibe dernayên, tu carî dagirkerên welatê xwe raxne nakin.
Ji bo filistîniyan pir aktîv in, gav û seetê Îsraîl protesto dikin, lê dijî Tirkiyê û Îranê tu dibêjî belkî kulîyan zimanê wan xwariye, nabêjin kirt.