Gîha nayê xwarin ji bo ku "gîha hewşê tahl" be !

Carnanan di medyaya sosyal da bi ber çavên min dikeve, hin kes dibêjin, ”gîha hewşê tahl e”!

Ne di kurmancî da, ne jî di zimanekî din da meteforeke wiha tune ye. Kes nabêje ”gîha hewşê tahl” e.
Çimkî gîha nayê xwarin ji bo ku gîha tahl û şîrîn hebe.
Di swêdî da metaforeke nêzî wê heye, wiha ye:
”Gräset är alltid grönare på andra sidan.”
Tercumeya îngilîzî wiha ye:

“The grass is always greener on the other side.”

Yanî, ”gîha aliyê din her tim hişintir/kesktir e”.
Ya jî, ”gîha hewşa cîrên her tim hişintir/kesktir e.”
Belkî di îngilîzî, fransî, almanî da jî metaforeke wek ya swêdî, ”gîha aliyê din, gîha hewşa cîrên tim hişintir e” heye…

Di tirkî da di dewsa metafora gîhê da, metafora, teşbîha mirîşk û qazê heye. Tirk dibêjin:

”Komşunun tavugu komşuya kaz gorunur".
Yanî, ”mirîşka cîrên ji cîrên ra wek qazê xuya dike.”

Lê hin kesan ev metafora ”gîha aliyê din hişintir e” şaş tercumeyî kurmancî kirine. Ji dêlî bibêjin, ”gîha aliyê din, gîha hewşa cîrên hişintir e”, gotine, ”gîha hewşê tahl e”!
Şaş e, ne du kurmancî da, nej î di zimanekî din da metaforeke wiha tune ye.
Carnan ez dibînim hin nivîskar, hin kesên zana, entellektuel jî dibêjin, ”gîha hewşê tahl e”.
Qet nafikirin, nabêjin:
-Ma gîha şîrîn heye?
Ji bo ku gîha hewşê bi xwediyê hewşê tahl be, dibê gîha were xwarin û ya şîrîn jî hebe.
Gava meriv ji tiştê xwe ne razî be, tiştê xelkê ji yê xwe xwştir, baştir bibîne, meriv metafora ”gîha aliyê din hişintir e” bi kar tîne.
Bi kurmancî jî miheqeq çend metaforên nêzî vê hene nuha nayê bîra min. Dengê defê ji dûrva xweş tê jî metaforeke nêzî wê ye.