Al ji bo miletan ne tenê perçeyek qumaş e !

Çeteyên hukûmeta Şamê çer gihîştin Hesekê bi lez Ala(beyreqa) Sûriyê hildan. Erebên Hesekê bi Alên Sûriyê çeteyên xwe pêşwazî kirin.

Gelo yên me ewê li hemberî ereban kîjan ala(beyreqa) netewî hildin?

Dibê li hemberî Ala Sûriyê, Ala Kurd(Kurdistanê) jî bihata hildan, li ser banên resmî hêl biba.
PYD, YPG, HSD alên wan, flamayên wan ên rêxistinî hene, lê hetanî nuha Ala Kurdistanê nekirine ala xwe.

Ji bo wê jî li hemberî Ala Sûriyê, aleka wan a netewî tune ye. Ev yek ji bo şiûr û manewîyata kurdan a netewî ne baş e. 

Wek her ereban dibê kurd jî li Kurdistana Rojava xwedî ala netewî bin. Ji bo însanan, ji bo zarokan ev pir muhîm û bi bandor e.

Li Îraqê Ala Îraqê û Ala Kurdistanê heye. Kurd herdu alan jî hildidin.
Li Kurdistana Rojava PYD´ê, YPG´ê, HSD´ê heta nuha Ala Kurdistanê nekirine ala xwe ya netewî. 

Musebîbê vê yekê PKK ye, çimkî PKK´ê Ala Kurdistanê qebûl nekiriye. Ji bo wê jî nehîştin hevalên wan ên Kurdistana Rojava jî Ala Kurd bikin ala xwe ya netewî. 

Ji bo kurdên Kurdistana rojava ev yek trajedî ye. Hêvî dikim ji nuha û pê da ew jî wek ENKS´ê Ala Kurd hildin.

Al ji bo miletan ne tenê perçeyek qumaş e, ew sembola nasname û serweriya miletekî ye. Ew di nava miletên cîhanê da miletekî temsîl dike.Dibêje ez sembola filan miletî me.

Her alek di reng û şiklên wê da maneyeke tarîxî, kulturî û sembolîk heye.
Al, nîşana, sembola, hebûna milletekî  ye, bi alê mwelat, dewlet ji hev digerin.

Al di eynî wextê da sembola têkoşîna milet e jî. Wek mînak, rengê sor di Ala Kurdistanê da sembola xwîna şehîdan e.

Rengê sipî tê maneya aştîxwaziya miletê kurd û wekhevîyê.
Rengê kesk jî sembola dewlemendiya axa Kurdistanê, xweşikiya  xwezaya Kurdistanê ye.
Roj jî nîşana ronahiyê, vejînê û jiyanê ye. Têkiliya wê bi Newrozê û tarîxa kurdan a kevn ra jî heye.