Hişyariya Donald Trump daye Îraqê ji bo kurdan e jî

Serokê Amerîkayê Donald Trump eşkere li dijî hilbijartina Nûrî Malikî ya serokwezîrtiya Îraqê derket û mesajeka pir sert da Îraqê.

Donald Trump got, ”Eger Malikî wek serokwezîr were hilbijartin Amerîka ewê alîkariyê nede Îraqê. Hilbijartina Malikî  şaş e, dibê Îraq vê şaşiyê neke."
Donald Trump, Nûrî  Malikî wek zilamê Îranê bi nav kiriye, ji bo wê jî dibê Îraq cara duduya Nûrî Malikî neke serokwezîr.
Ev mesaja Donald Trump ne ji bo Îraqê tenê ye, ji bo kurdan e jî. Dibê kurdên Kurdistana Başûr, PDK û YNK jî xwe ji Nûrî Malikî dûr xînin…

Çendakî berê Nûrî Malikî bi Mesûd Barzanî û Bafil Talabanî ra hevdîtin kir,  wan jî li ser serokwezîriya Nûrî Malikî mesajên pozîtîf dan. Fena ku ew amade ne piştgiriyê bidin Nûrî Malikî.
Piştî vê şêla Amerîkayê dibê PDK û YNK û tu partiyeke kurdî piştgiriyê nede Nûrî Malikî. Heger bidinê dînîtî ye, ewê gorra xwe bi destên xwe bikolin.
Îran li ber ketinê ye. Amerîka zû dereng ewê li Îranê xe. Mesele ne ewê lêxin, lênexin, mesele kînga ye û çawa ye?
Kurd ji her demê bêtir mecbûr in bi Amerîkayê ra, bi Xerbê ra hereket bikin, nekevin cepheyeke li dijî Amerîkayê.
Nûrî Malikî hevalê Îranê ye, di cepheya antî-Amerîkayê da ye. Di rewşeke wiha da gerek PDK û YNK xwe ji hevaltiya Îranê û dostên Îranê dûr bixin.
Jixwe hevaltiya bi dewletên dagirker ra tim şaş û xerab e.
Donald Trump merivekî çiqasî netebitî, bêîstîkrar be jî em mecbûr in pê ra îdare bikin. Carnan hin karên ne li gorî dilê me, li zirara me bike jî dibê em xwe ji hevaltiya Amerîkayê dûr nexînin.
Bêyî dostî û hevalbendiya Amerîkayê li tu beşekî Kurdistanê şansê me yê biserketinê tune ye.
Donald Trump û serokên ewrûpî çiqasî xerab bin jî hevaltiya wan li kara me ye, bêyî alîkarî û parastina Amerîkayê û Ewrûpayê emê perîşan bibin,  dijmin ewê me bixwun.
Donald Trump dîwarekî çiqasî ne saxlem be jî meriv kane bi alîkariya kesên din tesîrê lê bike, şêla wî biguherîne. Heta sê salan pê ra îdare bike. Lê hevaltiya bi Îranê ra ji bo kurdan felaket e, dibê PDK û YNK tercîheke wiha nekin.

Mark Savaya hişyariyeke tund da Îraqê