Carnan bêdengmayin baştir e

Got wele apoyî neyî gêj e, bi gelek tiştan zane lê nabêje. 

Di medyayay sosyal da gelek tiştên ne rast, ne xweş li ber çavên meriv dibin, tên gotin lê nabe meriv xwe tevî her tiştî bike, tiliya xwe têxe her qulikê.

Go çê kiro bi xwe kiro, xerab kiro bi xwe kiro. Carnan dibê meriv devê xwe bigire, li bûyeran, li tiştên diqewimin sêr û temaşe bike. Gava gotina meriv pere neke, bêdengmayin baştir e.

Çimkî gotin, rexne carnan ji karê bêtir zirarê dide meriv. Hin caran însan xwe kerr û kor dikin, ne tiştekî dibînin, ne jî dibihîzin, tenê tiştê jê bawer dikin ji bo wan rastî ye.

Li ser biryara PKK´ê terikandina şer û xwe fesixkirinê di medyaya sosyal da gelek tiştên rast û şaş tên gotin. Hinek pir xemgîn xuya dikin, hinek jî kêfxweşiyê govend û dîlanên digerînin.

Li meydanê tenê beyana PKK´ê heye, dewletê tiştekî konkret negotiye, qala tu peymanê û soza dabe PKK´ê nekiriye. Tenê dibêjin ew ji terorê xelas bûne û dibê li Sûriyê û li Îraqê jî PKK, PYD, YPG xwe xwe fesix bikin.

Serokê Tirkiyê Erdogan do eşkere got, ew hêvî dike li Sûriyê jî PYD, YPG eynî tiştî bike. Îstîxbarata wan vî karî taqîb dike.
Yanî çavê tirkan esas li Kurdistana Rojava ye, dixwazin vê desthilata kurdan ji ortê rakin.

Gelo PKK´ê li ser navê YPG, PYD´ê jî tu soz daye Tirkiyê ya na, em nizanin. di rojên pêş da ewê diyar bibe.

Min berê jî gotiye, PKK û şerê wê ji ortê derkeve baş e, ewê ji kurdan ra baştir be.