Suwarê hespê xelkê tim peyaye.

Li gorî xebera ajansa ANF-ê, AKP-ê, çixîz kişandiye ser ji sedî 90-ê 75 mebûsên xwe yên kurd û ji nuh va ew nekirine namzedên AKP-ê yên parlamentoyê.
Bi dîtina min ev yek dîsa baş e, bira dua û şikir bikin ku Erdogan hemû ji partiyê neqewitandine.
Dijmin wiha ye, piştî ku karê xwe bi wan qedand, bi saya wan du caran bû îktîdar û baş cî da nigê xwe, loma jî êdî hewcedariya wî bi wan nema, dibê ji xwe ra hin hespên hîn can, hîn zînde û ji çavên gel da neketine bibîne û demakê jî li wan siwar be, karê xwe bi wan bide kirin.
Ev îş wihaye, siwarê hespê xelkê tim peya ye.
Kî di dewsa van kesên hatine tasfiyekirin da be ewê jî ji Erdoganê mahcir ra bibêjin bixatirê te û herin li welatê xwe ”AKP” xwe ya kurd avabikin.
Lê bi îhtîmaleke mezin ewê wiha nekin, ji dêlî wê, ewê berê xwe bidin namzetên nuh û têkevin gewriya wan û bi wan ra bibin dijmin.
Lê ya rast, çawa ku hin kurdan BDP, HAK-PAR, KADEP avakirine, dibê ew jî dev ji zilamtiya xelkê berdin û partiya xwe ava bikin.
Riya rast ev e, kurdayetî ev e û welatparêzî jî ev e.
Çimkî dibe ku partiyên kurd yên hene ne li gor wan in, ew îdeolojî û siyaseta wan şaş dibînin, wan pir radîkal dibînin…
Wê demê dibê ew jî partiyeke moderat yeka li gor dîtinên xwe çêkin. Ne şert e bibêjin serxwebûn, federesayon, bira bibêjin otonobî, ya jî bira otonomiyê jî neparêzin, bira tenê hin mafên kulturî û perwerdeya zimên biparêzin.
Tenê bira dev ji tirkan berdin û partiya xwe çêkin û bibêjin em partiya miletê kurd in.
Em kurd dibê êdî dev ji xizmetkarî û kirêcîtiya ber destên tirkan berdin, bibin xebatkarên xwe, xaniyên xwe ava bikin, mala xwe raxin, bibin xwedî partî û dezgehên netewî.
Dibê em çavê miletekî cihê li xwe binêrin û bixwazin weke miletelî cihê bimînin û bijîn…

Ez li bende mucîzeyekê me!
Bi qasî ku ez dibînim di hilbijartinên 12-ê îlonê da ji bo çêbûna tifaqeke netewî BDP-ê li gorî hilbijartinên berê siyaseteke maqûltir û lihevkir meşand, heta jê hat xwest bi grûbên din ra jî li hev bike.
Û loma jî vê siyaseta komprimisxwaz tifaqake tam ne li gor dilê min be jî dexist ortê. Min bi xwe pir û pir dixwset ku HAK-PAR jî di nava vê hevkariyê da hebûya.
Do piştî îlankirina lïsteya namzetên parlamentoyê, hevseroka Partiya Aştî û Demokrasiyê (BDP-ê) Gultan Kişanakê, di beyana xwe ya AKnewsê da got, diyaloga wan ya bi HAK-PAR-ê ra berdewam e, ew dixwazin weke KADEP-ê, bi HAKPAR-ê ra jî di hilbijaratinan da bibin şirîk.
Ji vê beyana Kişanakê min wisa fêm kir ku ji bo îqnakirina HAK-PAR-ê hewildanên wan berdewam in.
Lê heta nuha min di çapemeniyê da di vî warî da tu pêşketineke nuh nedît. Û ez nizanim gelo ji nuha û pê va guherandin mimkûn e ya na?
Heger mimkûn be ez hêvï dikim ku HAKPAR were îqnakirin.
Di nivîsa xwe ya do da, (HAKPAR şaşiyê dike)min gotibû ku bi vekişîna ji vê tifaqa netewî HAK-PAR-ê rast nekir, dibê di vê tifaqê da miheqeq ciyê xwe bigirta…
Ez hîn jî di wê baweriyê da me, bi dïtina dibê HAK-PAR-ê riyeke lihevkirinê bidîdat û di vê hilbijartinê da ji platforma BDP-ê û KADEP-ê venekişiya.