Dibê em vê xelekê ji dest xwe bernedin

Banga Tevgera Ziman û Perwerdeya Kurdî ya kampanya boykotkirina dibistanên tirkî her ku diçe di nava kurdan berfirehtir dibe.
Di serî da BDP-ê, KNK-ê, KCK-ê û gelek komele û rêxistinên din yên sivîl bi xurtî piştgirî dane vê banga TZP Kurdî.
Li Tirkiyê îsal dibistan di 20-ê îlonê da vedibin.
Lê ji ber banga boykotê ya TZP Kurdî, zarokên kurdan ewê hefteyekê dereng dest bi dibistanan bikin…
Tevgera Ziman û Perwerdeya Kurdî (TZP Kurdî), ji bo ku perwerdeya bi zimanê kurdî ji alî dewletê ve were qebûlkirin û di yasayan da cîh bigire, çend roj berê biryar da ku îsal zarokên kurd hefeteya pêşî neçin dibistanan, perwerdeya bi zimanê tirkî boykot bikin.
Diyar e bi berfireyiyeke pir mezin kurdê guh bidin vê banga TZP-ê ya boykotkirina dibistanan.
Berdevka TZP Kurdî Xecê Şen, di beyana xwe ya di AKnewsê da dibêje, jibo ku kampanya boykotkirina dibistanan bi bandor be wan li gelek taxan bi gel ra civîn çêkirine.
Xecê Şen, di beyana xwe da dibêje, ev bang, ji dibistanên seretayî bigre heta bi zanîngehan ji bo hemû xwendevanan derbas dibe.
Şen di beyana xwe dibêje, piştî temambûna boykotê ewê daxwaznameyên xwe yên perwerdeya bi zimanê dayikê bigihînin berpirsiayrên dewletê.
Li ser belavbûna xebera boykotê, Wezîra Perwerdeya Tirkiyê Nîmet Çûbûkçû, do ragihand, got, malbatên ku zarokên wan tevî boykotê bibin ewê werin cezakirin.
Bêguman dewletê bi hin gef û tehdîdan wiha bixwaze çavên milet bitirsîne, lê dibê meriv guh nedê û biryarê bicîh bîne.
Di nivîsa xwe ya pêr da jî ez li ser vê banga TZP Kurdî rawestiyabûm û min gotibû ku ev biryareke pir girîng û pir baş e, dibê di serî da hemû partî, komel û rêxistinên û ronakbîrên kurdan bi xurtî piştgiriyê bidin vê bangê.
Bi vê biryarê kurdan bi xelekeke pir girîng û bi hêz bidest xisine, dibê vê xelekê ji dest xwe bernedin.
Dibê ev tevgera daxwaza perwerdeya bi zimanê xwe bi TZP Kurdî tenê sînorkirî nemîne, PKK û BDP dibê miheqeq bi kîtlewî piştgiryê bidinê.
Heger ev herdu tevger bi şiklekî aktîv piştgiriyê nedin, tevger ewê qels bimîne, ewê nikanibe bibe hêzeke mezin û tevgereke gelêrî.
Loma jî piştgiriya PKK-ê û BDP-ê ne bi gotinê tenê, di praktîkê da jî lazim e û şert e.
Çapemeniya kurd jî dibê meselê tim aktuel bike û bala bîrûraya kurd, tirk û ya cîhanê tim bikşîne ser meselê.
Qedexekirina zimanê miletekî sûcekî însaniyetê yê pir mezin e, dibê kurd li çarnikarên cîhanê bi qîrîn û hawar vî sûc û vê barbariya Tirkiyê îfşa bikin, haya cîhanê bigihîninê.
Heger PKK û BDP û bi qasî hêzên xwe grûbên din jî bi şiklekî cidî dest bavêjin vê meselê ewê di demeke kin da him cî li Tirkiyê teng bikin ûhim jî hin mafan bidest xin.
Xeleka Tirkiyê ya herî zeîf qedexeya zimanê kurdî ye, heger em kurd xwe baş bidinê, emê bikanibin di demeke kin da vê xelkê bişkînin û zimanê kurdî ji êsîriya 85 salan rizgar bikin.