Tirk nahêlin kurdên Kurdistana Rojava azad bibin

Wek di referandûma Kurdistana Başûr ya 2017´a, li Kurdistana Rojava jî tirk li me hatine xezebê, bi komên çeteyên terorîstên îslamî ra digrin ser gund û bajarên kurdan, agir bi ser kurdan da dibarînin.

Yê şerê me dikin ji ereban bêtir tirk in, nahêlin kurd azad bibin.

Tiştek ji destê me nayê, em li bende xebereke xêrê bûn. Ji dêlî wê, me xebera teslîmîyetê xwend.

Amerîka jî li têla tirkan û Colanî xistine, kurd mecbûrî şertên tirkan û Colanî, mecbûrî yanî bindestiya ereban kirine.

Jixwe tayinkirina Tom Barrack wek berpirsiyarê Amerîka yê Sûriyê ne elameta xêrê bû. Tom Barrack nasyonalîstekî ereb e û zilamê Erdogan e. Ji bo wê jî di vî şerî da destegê nade kurdan, li gorî dilê ereb û tirkan hereket dike.

Em miletekî bêkes in, em çêyê, alîkariyê bi kê dikin jî nabin dostên sadiq, bêbext dertên, di nîvî rê da terka me dikin.
Tirkiye û Colaniyê terorîst hin şertên pir xerab, di medyayê da 14 made hatine belav kirin, li ser HSD´ê û PYD´ê ferz dikin. 
Dibêjin ev peyman di civîna do ya Helêrê da ji alî HSD/PYD´ê û Mesûd Barzanî Mesrûr Barzanî ve hatiye qebûlkirin. Wan do ji şerma eşkere nekirin, Colanî îro eşkere kir. Teslîmîyeteke bi temamî ye.

Statuya kurdan qebûl nakin, dibêjin gerek HSD, çekdarên kurdan nemînin, îdare, deriyên sînoran, bîrên petrolê li her derê têkevin destê eraban.

Do Mezlûm Ebdî, bi heyetekê ra li Hewlêrê ew û Mesûd Barzanî û Mesrûr Barzanî bi Tom Barrack û çend leşker û dîplomatên Amerîkayê ra rûniştin.
Civîneke pir muhîm bû, beşdariya PDK´ê  hêviyekê da min. Îro xuya bû tiştê diyarî miletê kurd kirin hezîmeteke mezin e, teslîmîyeta referandûma 2017´a dubare kirine.
Dubareya îxaneta Cezaîrê ye. Amerîka û Xerbê kurd firotin terorîstên îslamî û Erdogan.
Ji qahra dikim biteqim. Heyfa hewqas liberxwedan û 15-20 hezar şehîd.
Him dinya wek her tim bi me ra bêbext e, him jî serokên me ne tu meriv in. Meriv peymaneke wiha qebûl nake.

Piştgiriya Amerîkayê tunebe kurd nikanin îdareya xwe biparêzin.  Ewê li ber xwe bidin, lê ji ber ku Tirkiye li pişta wan e, lema biserketina kurdan pir zor e, ne mimkûn e. 

Min digot belkî di civîna Hewlêrê da ewê xebereke xêrê bidin me, lê eksê wê derket. Tirkiye resmî di civînê da tunbû, lê Tom Barrack nûnerê Tirkiyê bû.
Êrîşên çeteyan li gelek herêman hîn jî berdewam in.
Moralê min di min sifirê ra ye, bêhêvî me, xwe di nava deryayê da xwe tik û tenê his dikim.

-Xalên peymana nû ya HSD û Şamê hatin eşkerekirin

-Tom Barrack li ser lihevkirina HSD û hikûmeta Sûriyeyê daxuyanî da