Tu şer ne bêdawî ye

Ermenistan û Azerbeycanê bi navbênkariya serokê Amerîkayê Donald Trump li hev hatin û li Qesra Sipî peymana aştiyê îmze kirin.

Azerî û êrmenîyan li ser Qerebaxê çend salan şerekî mezin kirin, bi hezaran însan ji hev kuştin.

Di vî şerî da yên herî bêtir zirar dîtin, yên ji erdê xwe, ji mal û milkê xwe bûn û di cepheya herdu aliyan da hatin kuştin kurd bûn.
Tu şer ne bêdawî ye, dawiya her şerî lihevkirin e, aştî ye. Însan dîsa jî dev ji şer bernadin.

Êrmenî û azerîyan kanîbûn bêyî şer gelşa nabêna xwe çareser bikirina, lê nekirin. Êrmenîyan qebûl nedikir.

Dawîya dawî di sala 2023´a da Azerbêcanê bi alîkariya tirkiyê êrîşî Qerebaxê kir û piştî şerê çend rojan, Qerebax bi tevayî ji Êrmenîstanê girt. Di vî şerî da Êrmenîstan teslîm bû.

Serokê Azerbeycanê Îlham Aliyev gotiye, ewê bi serokwezîrê Ermenistanê Nîkol Paşînyan ra serokê Amerîkayê Donald Trump wek namzedê Xelata Noberlê ya Aştîyê nîşan bidin.

Paşinyan jî gotiye, “Ez di wê baweriyê da me serok Trump hêjayî Xelata Nobelê ya Aştiyê ye û emê piştgiriya vê yekê bikin.”

XXX

Nivîskarê romana Don Kîşot(Don Quijote) û şairê netewî yê Îspanyayê Cervantes dildarekî azadîyê bû. Azadî wiha tarîf kiriye:

-Azadî ji tiştên herî baş ê Xwedê diyarî însanan kiriye. Xezîneyên herî mezin ên heft tebeq di binê erdê da ne, ya jî yên di binê kûrahiya deryayê da razayî ne nikanin bigihîjin wê.

Însan ancax ji bo azadîya xwe. ya din jî ji bo şerefa xwe jiyana xwe dixe talûkê ya jî dibê têxe talûkê.

Û helbet felaketa herî mezin a kane were serê însên jî êsîrketin û ji azadiya xwe mehrûm mayin e.

Cervantes rast gotiye, ji bo însên tiştê herî muhîm û bi qîmet azadî ye, eksaê azadiyê bindestî, koletî ye. Lê dîsa jî kurdên bindestiyê, koletiyê tercîh dikin û dibin hevalên dagirkerên welatê xwe pir in.