Di platforma X´ê da Weysî Aslanê hêja ji min pirsiye:
-Silav Mamoste, qet tu fikiriye gelo çima keç û xortên ciwan
ji te hez dikin?
Pirseke muhîm e, bersîva min ji vê pirsê ra ev e:
Piştî gerr û seyaheta xwe ya Kurdistanê li ser vê yekê pir
fikirîm.
Çiqasî rast e, çiqasî ne rast e ez nizanim, ez bi du tiştan va girê didim:
Yek jê, ez ya dilê wan dibêjim.
Ya din jî ez ne merivê, ne mirîdî, ne dijminê tu serokî, tu
partiyê me.
Belkî tesîra retorîka min, kurmancîya min jî heye. Kêfa
ciwan ji zimanê min ra, ji sitîla min rat ê.
Lê ya rast dibê ew, yanî ciwan bersîva vê pirsê bidin. Çimkî
sebebê wê ji min bêtir ew zanin.
XXX
Havîn tam hat Stockholmê, 20 derece germ e, rûniştina li hewşê,
li ber siyê pir xweş e, bayekî honik tê, meriv li ber di xew ra dihere.
Xanim nuh ji xew rabû, dike xurîniya xwe bike. Bîstek din
ezê qahwake kurdî çêkim.
Havîn meriv tembel dike, naxwaze here hundur, li ber
kompîtorê rûne, bike şeqeşeq.
Carnan bînvedan, ”tembelî” jî lazim e…
Dara me ya giryazê û ya sêvê îsal pir girtine, herdu jî
dikin di bin bar û xemlên xwe da bişkên. Tu salê hewqas negirtine, qey îsal
sala wan e.
XXX
Dadgeha tiroviro ya Colemêrgê bi lez 19 sal û 6 meh cezayê
êsîrmayinê daye serokê belediya Colemêrgê Sidîq Akiş.
Ev ceza kîn û nefreta wan, derca neyartiya wan a bi miletê
kurd ra nîşan dide.
Hakimê qûqla emrê jê ra ji jor hatiye bi cî aniye. Lema di
celsa pêşî da 19 sal û 6 meh ceza li Sidîq Akiş biriye.
Dadgehên Tirkiyê bûne dezgehên qeşmeriyê. Ji bo dewletekê, ji bo miletekî dadgehên wiha şerm e, rûreşî ye.
Inga kommentarer:
Skicka en kommentar