Ji nuha da ketiye hewla ruhê xwe

Dîktaror hêza xwe ji du tiştan digre. Yek jê zalimî û teror e û ya din jî piştgiriya girseya pûlperest û cahil e. Hinek ji ber cahiliya xwe û hinek jî ji ber berjewendiyên xwe yên şexsî destpêkê piştgiriyê didin dîktator.
Ev piştgirî cesaretê û hêzê dide dîktator. Diwêre terora xwe zêde pêşda bibe û berfirehtir bike.
Lê rojek tê berjewendiyên dîktator û kîtleya wî li hev nake û dîktator îcar berê xwe dide kîtleya xwe jî.
Rewşa Tirkiyê ya nuha ev e. Erdogan êdî berê xwe daye hevalên xwe yên berê jî û wan jî berê xwe dane wî. Ev, destpêka têkçûna Erdogan e. Kursiya wî diheje, lerz ketiye dilê wî…
Erdogan hîn jî xurt xuya dike lê ne wisa ye, ew ketiye hewla ruhê xwe, ji ber ku ew baş dizane ewê çi were serê wî.
Weleh ewê wî wek mirîşkên çîniyan bi saxî bipûrtikînin.
Mirîşkan heq nekiriye lê wî heq kiriye…
Bi xêr û xweşî bwerî mirina xwe emê cezakirina dîktatorekî dinjî bibînin…

XXX

Bi îktîdara AKPê ra civata tirk û kurd li gorî berê pir dejenere, pûlperest, bêxlaq û durû bûye.
Esas meriv dikane vê prosesê bi Ozal bide destpêkirin. Lê bi îktîdara Erdogan ra pûlperestî, konetî, vir û xapandin û durûtî gelkî bi pêş ket. Êdî şexsiyet, dilpakî, şeref, heysiyet, duristî, rastgoyî mefhûmên zêde muhîm nayên dîtin.
Ya muhîm kî kanibe cila xwe ji avê derexe û zengîn bibe, zengîn bibe..
Çawa zengîn dibe, bi kîjan riyê dibe zêde ne muhîm e. Însan zêde guh nadinwê, pere ser her qilêrê sewax dike…
Berê dilpakî, duristî, rastgoyî, hevaltî wek fazïletên pir baş dihatin dîtin. Lê nuha fazîletên wiha zêde pere nake, pir ”klasîk” tên dîtin.
Tiştê pere dike tenê pere ye, perê te tunebe, barê te xwar bibe çû ji te da, li ber çavê civatê tu kêmaqil î, dîn î.
Tu hew dinêrî mêrik dilê kesî ji xwe nahêle, geh rast lêdixe, geg çep lêdixe, ji te ra jî û ji hasimê te ra jî li çepikan dixe, ji we herduyan ra jî dibêje her bijî û weleh tu rast dibêjî !
Xwedê meriv ji bêtarên girantir bisitirîne, gava exlaq nemîne şerm jî namîne. Tobe tobeee

XXX

Taliya her dîktatorî husran û felaket e. Tu sebeb tuneye ku taliya Erdogan ji ya dîktatorên din cuda be. Lema jî qet meraq nekin taliya Erdogan jî wek hemû dîktatoran ewê pir xerab biqede.

XXX

-Qelb(dil) jî, qalip jî dibê rast be. Yê dilê wî rast be zimanê wî jî rast dibe. Çimkî ziman tercumanê dil e, dil çi bibêje ziman jî wiya tercumeyî gotinan dike...