Min nuha li trajîkomediyeke kurdan temaşe kir

Nuha min di kanala aHaberê da li programa Sevilay Yukselirê temaşe kir. Yaşar Kaya, Mehmet Metîner, Umit Firat û Kemal Burkay mîvanên programê bûn.

Ji ber ku kurdên wiha siyasetmedar û serokên kurdan e meriv pir bêhîvî dibe û wek kurd li ber xwe dikeve. Sêwiyek tirk bi hemûyan lîst, wek zarokan ew îdare kirin.
Ji bo derketina telewîzyonê meriv çawa dikane xwe têxe vî halîî meriv fêm nake...

Ji ber ku Kemal Burkay di mesela kurd da ji siyaseta hukûmetê piçekî gazin kir û got ew federasyonê dixwaze, Metîner li dij derket û ji Kemal Burkay teqrîben pirsek wiha kir, got:

”Em ferz bikin ku sibe Kurdistaneke wek Îranê çûbû. Rejîmeke despot û antî demokratîk û zorba. Gelo tu yê bixwazî li Kurdistaneke wiha bijî ya jî li welatekî wek Swêd, li Tirkiyeke azad bijî?”

Metîner, ev pirsa xwe sê çar caran dubare kir, lê Burkay negot helbet ezê Kurdistaneke wiha bixwazim, ezê Kurdistaneke wiha tercîhî Swêd û ”Tirkiya azad” bikim.

Çimkî eksê wê parastina bindestiyê û bêwelatiyê ye. Ji ber ku rejîmeke ne li gorî dil û fikrê meriv li ser hukim e, meriv dewletbûnê û welatekî serbixwe red nake.

Negot bira Kurdistan çê bibe, kî çê dike bira çêke. Kurdê viya nebêje dibê dev jisiyasetê berde, nebe serokê kurdan.

Ji ber ku tu rejîm, tu dîktatorî û tu şexs ne ebedî ye. Tu dewlet ji destpêkê wek welatekî demokratîk çê nebûye û çê nabe.

Swêd jî, Faransa jî, Îngilter jî 200-300 sal berê wek Îranê û heta ji Îranê jî xerabtir bûn. Ew jî welatên despot bûn. Li wan welatan jî wek Îrana îro li orta meydanan serî difirandin. Lê îro li wan welatan ev rejîm neman û bûn welatên demokratîk. Eynî tişt ewê li Kurdistanê jî bibe.

Ez tim dibêjim, ji bo min bira Kurdistan çê bibe kî çê dike bira çêke, dixwaze bira sosyalîst, dixwaze îslamî ya jî PKK be, min qebûl e. Redkirina Kurdistanê ji ber sebebên îdeolojîk û qereqterê hêza serdest qebûlkirina bindestiyê ye. Nexwestina dewleteke serbixwe ye. Û fêrnebûna ABC ye siyasetê ye.

Helebet ez wek şexs terefdarê demokarsiyê me û dixwazim Kurdistan jî bi demokrasiya xwe welatekî wek Swêd be.

Lê belê ji ber ku destpêkê ne wiha ye, ji ber ku bi destê PKKê ya jî hêzeke îslamî çê ezê tu carî li dij dernekevim. Ji ber ku rejîm ne li gorî dîtina meriv e, li dij derketin cehaleteke mezin e, rebenî ye.

Ma dema li Tirkiyê leşker li ser hukim bûn tirkan şerê dewleta xwe kirin, xwestin wê hilweşînin, gotin em dewleteke wiha naxwazin?

Tu kes wiha nake, meriv dixwaze rejîmê biguhere, hukim bigre destê xwe, lê ne ku dewleta ne li gorî fikir û îdeolojiya xwe red bike.

Tu dewlet ne li gorî fikir û îdeolojiya hemû hemweletiyên xwe ye. Ev yek ji bo kurdan jî wiha ye. Kesên vê ferqê nabînin bûne serokên kurdan. Heyf…