Sûcê me yê herî mezin kurdbûna me ye

Çeteyên ereb û tirk yên El Qaîde û El Nusra, li gund û nahiyeyên Tel Hasil û Tel Aran yên girêdayî Helebê êrîş birine ser kurdên sivîl û bi kêmanî 50 kes kuştine û li dora 350 kesî jî dîl girtine.
Ev hêzên ereb û tirk yên îslamî çima vê hovîtiyê dikin, çima xelkê sivîl, zarok, jin, kal û pîrên kurd dikujin û rehîn digrin? Sûcê wan çi ye?
Tu sûcê wan tuneye, zulm li tu kesî nekirine, kes nekuştine, malê kesî talan nekirine, welatê kesî îşxal nekirine, dest navêtine namûsa kesî…
Sûcê wan tenê kurdbûna wan e !
Ji ber ku kurd in çeteyên ereb û tirk gund û bajarên wan wêran û malên wan jî talan dikin û wek celadan serê wan jê dikin.
Li gorî çeteyên ereb û tirk mafê kurdan yê jiyanê tuneye, qetla her kurdî helal e.
Meleyên ereb li ser navê îslamê qetla malê kurdan, can û namûsa kurdan li muslimanan helal dikin.
Em çi bibêjin jî van zalimanan nabin meriv, rahm nakeve dilê wan. Neyartiya miletê kurd ew har kirine.
Ji bo ku em ji bin vê zulmê, vê hovîtiyê xelas bibin dibê em yekîtiya xwe xurt bikin û wek her miletî em jî bibin xwedî dewlet. Heta ku em nebin xwedî dewlet xelkê tim malê me talan bike û serê me jêke…


XXX
Qumandarê herêma Helebê yê Artêşa Sûriya Azad El Egidi gotiye, ”Dema qelandina koka kurdan hatiye, êdî wext e ku meriv wan ji van erdan derînin.”
Ji xwe hovîtiyên rojên dawî jî bi vê armancê tên kirin, dixwazin koka kurdan biqelînin.
Ev yek ne hedefa El Egidi tenê ye, hedefa hemû dijminên me ye. Dibê em kurd vê yekê baş bizanibin.
Heger hedefa Tirkiyê jî ne ev bûya, Abdulcebbar El Egîdî ne didan serê xwe û piştgiriyeke hewqas mezin nedidin wî û cepheya wî...

XXX
Gelî siyasetmedar, dîndar, ronakbîr û hemû kurdên xwedî ûjdan û bi xîret, birayên we li herêma Helebê û Efrînê ji alî qatil û zebaniyan ve tev zarok û pîrekan bi hovîtyeke pir mezin tên qetiklikirin. Zû herin gazî û hawara wan…
Çapemeniya kurd, vê hovîtiya qatilan li dinyayê belav bikin, dinyayê pê bihesînin