Yê însan be dibê li hemberî zulmê bêdeng nemîne

Dostê hêja birêz Fehîm Işik do di facebookê da gotineke şoreşgerê mezin Steve Biko ya pir xweş weşand.

Biko dibêje:

”Kesên spî him pihînê davêjin ji qûna me da, him jî li hemberî vê pihînê dibê em reaksiyoneke çawa nîşan bidin dîkteyî me dikin.”

Îro bi rastî tam jî roja dubarekirina vê gotina Steve Biko yê mezin e.

Bi rastî jî tirk eynî weke Biko gotiye dikin, her roj di telewîzyonan da weke mezinên me şîretan li me dikin,  ji mer ra dibêjin ku li hember "pihîn û sîleyên" wan dibê em sakin û bînfireh bin, maqûl bin û xwe aciz nekin...

Gotineke Biko ya din jî heye gelkî manîdar e. Dibêje:

”Sîleha kesê serdest ya herî mezin şêla yê bindet e.”

Yanî heger yê bindest li hemberî zulmê bêdeng bimîne û hustuyê xwe xwar bike, yê serdest ewê ji vê yekê cesaretê bigre û hîn bêtir li hustuyê wî siwar be...

Heger heta nuha piraniya kurdan zulma li wan dibû qebûl nekirana, tirkan nuha nikanîbûn ev zulma xwe bidomandana, nikanîbûn li ciyê rehetiyê bi hezaran siyasetmedarên kurd bavîtana zindanan.

Hemû têkiliyên di nabêna kurd û tirkan da têkiliyên li ser asasê ku tirk hêjatir, baqiltir, medenîtir û kurd jî kêmhêja, kêmaaqil û nemedenîtir in.

Tirk bi vî çavî li xwe û li kurdan dinêrin.

Loma jî tirk her roj di telewîzyonan da kurdan dawetî maqûlbûnê dikin, aqil didin kurdan, şîretan li siyasetmedarên kurdan dikin.

Yanî li alîkî pûlis, leşker, milet û dadgeh rola pûlisên xerab û siyasetmedar, ronakbîr û çapemenî jî rola pûlisên baş dilîzin.

Hinek lim e dixin, li hustuyê me siwar dibin û hinek jî me dawetî maqplî, sakinî û bînfirehiyê dikin.

Ronakbîr û siyasetmedarên tirk, ji kurdan ra dibêjin, li hember vê zulmê, neheqiyê, girtinê hefsê, îşkenceyê neqeherin, bîna xwe fireh bikin, maqûl bin û li dijî zulimkaran ranebin, dilê zulmkaran ji xwe nehêlin.

Erê caran li we neheqî dibe, lê rastkirina wê, bi hêrsê, bi şer û pevçûnê û serîhildanê nabe, dibê hûn bi rengekî nerm û kibar li ber zaliman bigerin û ji wan merhametê bixwazin, miheqeq rojekê ewê li we werin rahmê.

Şîreta ku siyasetmedar û ronakbîrên tirk li me kurdan dikin ev e.

Berî heriştî dibê ev rewş, ev dîtin were guhertin, dibê tirk qebûl bikin ku ev şêl û dîtina wan ne rast e, ew jî tenê însan in, tu tiştekî wan ji kurdan ne zêdetir e.

Ew ji kurdan ne hêjatir û ne baqiltir in.

Û pir rast e ku kurd neheqiyê û zulmê qebûl nekin û li hemberî wê îsyan bikin…