Ev serîhildan ewê li Tirkiyê jî biserkeve

Min jî çend caran gotina ”bêîtîatî” bikaranî lê kêfa min qet ji vê gotinê ra nayê. Ji ber ku bilêvkirina wê zahmet e.
Dibê kesên zimanzan ji dêlî vê gotinê ve gotineke kurdî bibînin.
”Îtîat/Îtaat” gotineke erebî ye û tê maneya hereketkirina li gor emir, hustuxwarkirin û bicîanîna emir e.
Yanî bicîanîna emir ya bê qeyd û şert e, emir çi be dibê meriv wer bike. Wek sîstema artêşê, qumandar çi emrî bide, kesên di bin wî ra wî emrî bêyî qeyd û şert bicî tînin.
Îcar bi dîtina min di dewsa ”bêîtaatiyê” da meriv dikane bibêje ”serhişkiya siwîl ya jî serhildana siwîl !”
Ya jî kesên zimanzan bira tiştekî hîn rasttir bibêjin.
Lê di vê nivîsê da ezê ”Serhildana Siwîl” bikar bînim.
Bi dîtina min ev tevgera BDP û KCK-ê du roj berê dan destpêkirin rast e û dibê hemû kurd piştgiryê bidinê, xurttir û berfirehtir bikin.
Ev serîhildanên siwîl li her derê biserketin û li Tirkiyê jî ewê biserkeve.
Lê heger hinek bibêjin ev ne rast e, ev kêm e, ya jî ji ber ku di bin emrê filan kesî û filan hêzê da ye û loma jî em beşdar nabin, wê demê dibê ew kes û hêz, tiştên ji vê tevgerê hîn baştir bikin.
Kesî rê li ber kesî negirtiye, çi ji destê kê tê, fermo bira bikin.
Lê tiştek heye, bi dîtina min di van çalakiyan da meriv çuqasî ji siyset û sembolên gurûbî û partîtiyê dûrkeve û tevgerê bike meseleyeke netewî ji bo derve jî û ji bo hundur jî ewê baştir û bitesîrtir be.
Yanî dibê meriv tevgerê fireh bigre û neke kar û tevgera partiyekê û şîar û sembol û sloganên wê dernexe pêş.
Bandrol, risim, slogan, daxwaz û hemû sembolên din dibê d çarçeweya van herçar daxwazan da bin.
Çarçeweyeke wiha ewê tevgerê xurttir bike.
Loma jî jî dibê meriv hewil bide hemû rêxistin, komele, baro, sendîkayên meslekî û hemû şexsiyetên kurd yên meşhûr bikşîne nava vê xebatê.
Mesela heger meriv kanibe, dibê meriv YAŞAR KEMAL, BEŞîKÇÎ û kesên weke wan jî ji bo rojekê be jî bikşîne nava vê liberxwedanê....