Hesbihala bi dostekî ra

Bayram*, birayê hêja!
Gelek sipas ji bo e-maila te ya giranbuha.
Ez gelkî kêfxweş bûm ku te ew nivîsa min bi derengî be jî xwendiye.
Birayê ezîz, weke tu jî dizanî yên ziman, edebiyat û hunera miletan pêşda dibin û dewlemend dikin ronakbîr, edîb û siyasetmedar in, çimkî ew rêber û pêşeng in, loma jî dikanin tesîrê li gel bikin, rê nîşanî gel bibdin, ji gel ra bibin rêber û ronahî.
Dema xeta wan rast be miletê jî bide ser riya rast û tiştên baş fêr bibe û biafirîne.
Ji xwe ji ber vê yekê ye ku pêşiyên kurdan gotine, "xeta xwar ji gayê pîr da ye", yanî heger rîsipî, rêber, mezin û serokên milet, xeta xwar nedin ber milet, tiştên şaş û xerab nekin, milet jî nake.
Loma jî di vê merheleya îro da rol û tesîra we siyasetmedaran pir û pir mezin û girîng e, heger hûn siyasetmedar siyasetê bi tirkî bikin hûnê bibin sebebê asîmîlekirina gelê xwe û karê dewleta tirk jî rehet bikin.
Lê ku hûn eksê wê bikin, yanî hûn bi gelê xwe ra bi kurdî bidin û bistînin û kurdî bikinm zimanê siyasetê, wê demê jî hûnê xizmetê ji ziman û çanda kurd ra bikin û rê li ber asîmîlasyonê bigrin, plana dewletê xera bikin, hêviya wan biqurçimînin.
Bi baweriya min roja ku dewleta tirk hêviya xwe ya ji helandina kurdan qut bike, ewê dev ji vê siyaseta xwe ya înkar û îmhayê berde û mafê kurdan yên netewî qebûl bike.
Dewlet di vê siyaseta xwe ya helandinê da israr dike ji ber ku bi kirinên xwe em vê hêviya dewletê xurt dikin, dewlet dibîne ku kurd bi lez û bez zimanê xwe ji bîr dikin, dihelin, dibin tirk.
Û yên pêşengiya vê felaketa mezin dikin jî mixabin ronakbîr û siyasetmedarên kurd in, ew ji tirkan bêtir rê li ber fêrbûna kurdî digrin, gel mecbûrî axaftian tirkî dikin û bi vê riyê jî gelê xwe asîmîle dikin.
Loma jî hebûna siyasetmedarên weke we kurdîzan, ku di zanîn û şuûra vê yekê da ne gelkî girîng e, dibê hûn ji siyasetmedarên din ra jî, ji yên tirkîhez û tirkîaxêv ra jî bibin nimûne û cesaretê bidin wan jî.
Ez hêvî dikim ku partiya we di warê axaftina kurdî da bibe pêşeng.
Bi silavên dostaniyê
Zinarê Xamo


To: zinarexamo@hotmail.com
Date: Sat, 5 Dec 2009 22:36:34 +0200
Subject: Spasi
From: ....
Birayê hêja,
Ez hinekî bi derengî ji nivîsa we ya derbarê axaftina/konferansa min a li Stocholmê ya ku li malpera we hatibu weşandin, hayidar bûm. Ji bo pesndayîna we ya dilnizim û rexneyên we yên dostanî gellek sipas dikim. Destê we xweş be. Bila şika we tune be, nivîsa we ji bo axaftina kurdî him min teşwîk dike û him jî cesaretê dide min. Carek din ez li ser navê xwe û li ser navê hevalan sipasîya xwe pêşkêşî cenabê we dikim. Di kar û barê we da serkeftin dixwazim. Bila dostên wek we saxbin.
Bimînin di xweşîyê de.
Bayram Bozyel

*Min do bi şev e-mailek ji serokê HAK-PAR-ê Bayram Bozyel girt û ev bersîv îro dayê. Ez herduyan jî li jêr diweşînim.