Kurd rojekê hesabê van cînayetan ewê ji rejîma melayên Îranê jî bipirsin

Li gor nûçeya malperên Avesta û Kurdistan Postê, gerîllayê PJAK-ê Îhsan Fetehiyan, berbanga vê sibehê ji alî rejîma Îranê ya melayên destbixweîn va li bajarê Sine hate îdamkirin.
Ev çend roj bûn Îhsan Fetehiyanê gerîllayê PJAK-ê li zindana Sine di hucreyekê da li bende înfazê bû.
Malbata Fetehiyan, dost û hevalên wî ji serê rojan ye bi şev û roj li ber deriyê zindanê ev biryara rejîma Îslamî ya hovane protesto dikirin.
Li dervayî welêt, li gelek welatên Ewrûpayê jî ji bo azadkirina Fetehiyan kurdan meş û çalakiyên çûr be cûr çêdikirin.
Lê rejîma melayên Îranê ya qatil, guh neda protestoyên rêxistinên mafê mirovan, yên malbat û dost û hevalên Fetehiyan û vê sibehê kindira bi rûn xistin hustuyê xortê canfîda û bi ew bidarde kirin, rejîma dîktator bû qatilê kurdekî din yê qehreman û evîndarê azadiya kurd û Kurdistanê.
Rejîma melayên destbixwîn di qetilkirin kurdan da pir comerd hereket dike, hercara ku fersend dikeve dest, îdamê dide keç û xortên kurd yên gernas û ziravpiling û sûcên xwe girantir dikin.
Miletê kurd çawa ku hesabê enfal û qetlîamên li hember xwe ji Seddam û hevalbendên wî pirsî, rojekê were ewê hesabê şehedadeta Fetehiyan, Qasimlo, Şerefkendî û bi hezaran şehîdên din ji rejîma meleyan jî bipirse.
Miletê kurd ewê tu carî van cînayetên rejîma Îranê ji bîr neke, zû dereng mele ewê hesebê van cînayetên xwe bidin.
Rejîma Îranê heta nuha bi kêmasî cezayê îdamê daye 17 gerîllayên kurd. Li gor nûçeya Kurdistan Postê, bi îdama Fetehiyan ra hejmara kesên îsal hatine îdamkirin derket 266 kesan.
Lê texmîn ew e ku reqema rastîn ji vê hejmarê gelkî zêdetir e.
Gelê kurd ev nêzî 200 salan e ku dara azadiyê bi xwîn û xwîdana xwe av dide.
Yek buhost axa Kurdistanê tuneye ku kurdan xwîna li nerijandibe, yek çem û rûbarekî Kurdistanê tuneye ku xwîna keç û xortên kurd yên canfîda û gernas tevê neherikî be…
Ji bo azadî û serxwebûna xwe miletê kurd heta nuha gelek şehîd daye, gelek eziyet û cefa kişandiye.
Dijminên xwînxwar li Îranê, li Tirkiyê û li Îraqê heta nuha gelek caran serok û mêrxasên kurdan kişandine ber darê sêpiyê û kindara zulmê û barbariyê xistine hustuyê wan.
Lê kurdan tu carî serê xwe li hember van zalim û celadan netewandiye û dev ji têkoşîna xwe bernedane.
Bi şehadeta Îhsan Fetehiyan, bêguman ezm û biryardariya kurdan ya têkoşînê ewê xurttir û kîn û nefreta li hember zaliman jî ewê zêdeir bibe.
Xwîna gernasê kurd Îhsan Fetehiyan ewê bexçeyê Kurdistana azad rengîntir bike…