Tirk bi şalûziyan naxapin

Ji ber ku Tirkiyê di Lîstikên Havînê ya Olîmpiyada Pekînê da netîceyeke baş bidest nexistiye parlamenterên DTP-ê gelkî xemgîn bûne û ji meclîsê xwestine ku hesabê vê yekê ji berpirsiyaran were pirsîn.

Li gor ku medyaya tirk û kurd dinivîse, parlamenterê DTP-ê yê Şirnexê Hasîp Kaplan û çend hevalên wî, ji ber ku Tirkiyê di Olîmpiyadên Pekînê da serkeftineke baş bidest nexistiye pêşniyareke lêpirsînê dane meclîsa Tirkiyê û xwestine ku dewlet di vî warî da hin tedbîran bigre.
Li gor pêşniyara Kaplan û hevalên wî, Tirkiyê ev rewş heq nekiriye, divê dewlet vê rewşê biguhere.

Hasîp Kaplan ev ne cara pêşîye ku ji tirkan ra şelafiyên wiha erzan dike. Lê her car jî tirk tinazê xwe pê dikin.

Hin însan hene tu dibêjî ya Rebî qey ev camêr ji xîretê şuştuye, çiqas zulm û neheqî jî lê bibe pê naêşe û pê naqehere.

Kesên wiha ji bo ku xwe têxin çavê dijmin û hinek ji wan ra bibêjin ”eferim” hezarûyek şalûziyan dikin.

Kaplan jî yek ji van kesan e, di her axaftin û pêşniyara wî da miheqeq nangenimî û şalûzîyek heye, tim dixwaze xwe bi tirkan şîrîn bike.

Tu dibêjî qey di meclîsa tirkan da bêyî wî kes tuneye ku vê yekê bîne rojevê. Tirk çima ne serkeftî ne?

Ma bi te ketiye?

Ma welatekî ku hebûna 20 milyon însanî înkar bike, nehêle yek ferd jî li ser navê vî miletî û bi nasnameya xwe xwe tevê bibe, ewê çawa bi serkeve?

Tu pir jêhatîye vê yekê ji meclîsa tirk bipirse, bibêje çima hûn nahêlên kurd jî wek kurd beşdarî Olîmpiyadan bibin?

Dibe ku gelek kes nizanibe, ji bo girtina çend madelyayan, Tirkiyê di van demên nêzîk da ji welatên din 12 kes kirî û kir hemwelatiyên xwe û ew birin Olîmpiyadên Pekînê. Dixwetin bi vî hawî bibin xwedî çend madalyayên bi hîle. Lê a bixêr ku ew jî nebû.

Li gor tê gotin bi milyaran pere dane van kesan û dewletên wan.

Hîle û sextekarî di heyvanê dewletatirk da heye, loma jî tim dixwaze di riyeke kin da bi hîle û sextekariyê biser keve. Ji dêlî ku bixebitin, îmkanê bidin însanên xwe, radibin xelkê dikirin û dixwazin bi vî havî çend madalyayan bidest xin. Kurmê şîrî heta pîrî.

Kaplan di pêşniyara xwe da ne qala nîjadperestiya li hember kurdan û ne jî qala vê sextekariya tirkan kiriye.

Tenê dewletê zeyt dike.

Tenê xwestiye bi çend gotinên şelafî xwe têxe çavên nîjadperstên tirk. Lê tirk bi van şalûziyan naxapin û tu mafî nadin kurdan. Bi pêşniyarên wiha DTP him xwe dike pêkenîn û him jî gelê kurd biçûk dixe.

Kurdan ji bo şalûziyên wiha ray nedane DTP-ê.