Dewleta tirk bi hezaran kurd kuştine û bi komî binax kirine

Serokkomarê Tirkiyê do li Meletyê gotiye, di operasyonên li dijî terorîzmê da ”me bi hezaran terorîst di kortan da binax kirin.” !
Ne yek, ne dudu û ne jî sisê, ”bi hezaran kurd kuştine û bi komî binax kirine”!
Û mêrik vê qetlîama xwe jî venaşêre, belovacî wê pê pesnê xwe dide, pê îftîxar dike.
Dibê partiyên kurdan, komeleyên mafên mirivon, rêrxistinên sivîl vê beyana Erdogan wek îtîrafa qetlîmake mezin qebûl bikin û lê gilî bikin, ciyê hewaqs kuştî lê veşartine jê bipirsin.
Kuştina ”bi hezaran însanî” qetlîam e, sûcekî li dijî mirovahiyê ye, dibê rêxistinên kurdan him hesabê vê yekê ji Erdogan û hukûmeta AKPê bikin û him jî cî û gorrên van kuştiyan jê bipirsin.

XXX

Îsmaîl Beşîkçî xoceyê malava gotiye ”ji kurdan ra dewletek lazim e.”
Tu rast dibêjî xoceyê xoşewîst, em jî zanin ji me ra dewletek lazim e. Miletê bêdewlet miletê kole ye, mahkûmî wendabûnê ye.
Ev dused sal in kurd li Kurdistanê xwîna xwe diherikînin ji bo ku vê dewletê ava bikin.
Lê em dikin nakin em nikanin.
Neyarên me him pir in û him jî xurt in, bêbavan nahêlin em bibin xwedî dewlet.
Û wek cizîrî dibêjin, dinya jî ”bênamîs” û pûlerest e, ew jî alîkariya me nake.

Merivê bêdewlet li gorî yê bi dewlet gotina wî sivik e, giraniya wî kêm e, qedrê wî hindik e...

Li Swêd partiya SD(Demokratên Swêd), yanî partiya li dijî xerîba ne tê da, kurd di nava hemû partiyan da hene û 6 heb jî ketine meclîsê.

Di nava hemû partiyan da ji xerîban grûba herî aktîv û çalak kurd in.

Her wisa grûba herî bêtir entegre bûye, ji siyasetê bigre heta bi medyayê, di her qada civatê da hene dîsa kurd in.

Lê li gel vê jî di nava tu partiyekê da jî giraniya kurdan, meqamê wan çi dibe bira bibe, tu carî bi qasî ya tirkan, ereban, somaliyan û îslamîstan tuneye.

Gotina îslamîstekî tirk, ereb û somalî bergenîdî gotina sed kurdî ye, gotina îslamîstekî ereb, tirk û somalî ji gotina sed kurdî girantir e û bi îtîbartir e.

Ji ber ku tirk, ereb û somalî xwedî dewlet in, îslamîst in, pişta wan heye û gava bixwazin kanin ji partiyan û ji Swêd ra problemê derxin.

Lema jî di nava hemû partiyan da giraniya îslamîstên tirk, ereb û somalî heye, gotina wan pere dike, swêdî di hundurê xwe da ji wan hez nekin jî, qedir nedin wan jî, guh didin gotinên wan.

Lê ji ber ku dewleta kurdan tuneye, lema jî di nava partiyan da tu giraniyeke peyva wan jî tuneye.

Lema di nava partiyan da nikanin bi qasî tirkan, ereban û somaliyan ya jî bi qasî farisan bibin xwedî giranî.

Vê rastiyê di van çend hefteyên borî da bi teşxeleya îslamîstên di nava partiyên swêdî da xwe baş da der, derket ortê ku tirkek,

erebek û somaliyek bergendî belkî bi sedan kurdî ye. Swêdî bi qasî ku guh didin gotinên tirkan, ereban û somamliyan, hewqasî guh nadin gitinên kurdan.

Kurd bi heq, tirk, ereb û somalî neheq bin jî heta pir mecbûr nebin swêdî heq nadin kurdan. Çimkî kurd jî wek wan miletan ne xwedî dewlet in.

Merivê bêdewlet li gorî yê bi dewlet gotina wî sivik e, giraniya wî kêm e, qedrê wî hindik e...

Ez qala îstîsnayan nakim, îstîsna hertim hene, ez qala realîteyê, rastiyên jiyanê dikim..

Ew bi tenê ye, li pişt wî dewletek tuneye…
Wek merivê xwedî eşîr û merivê bêkes.

Merivê bêkes, bêeşîr kes zêde jê natirse. Çimkî bi tenê ye, bêpişt e.

Lê merivê xwedî eşîr, xwedî pişt bêguman her kes hesabê wî eşîra wî û pişta wî jî dike.
Dewlet jî wiha ye...

XXX

Erdogan, Davutoglu qewirand. Ji bo Erdogan her kes kurmekî serê nêkê ye. Nuha jê ra kurmekî din lazim e, yekî ji Davutoglu baştir lazim e, lema Davutoglu davêje û kurmenkî din bi serê nêkê ve ke.
Her kesê di rêvebiriya AKPê da, her parlamenter û wezîrê AKPê xulamtiya Erdogan bêyî qed û şert qebûl dike.
Kî dibe bira bibe, di nava AKPê da bêyî Erdogan her kes sifir (0)e û bi şertê ku sifiriya xwe qebûl dike li wir e.
Îcar kurdên AKPê tew di binê sirê da ne, hemû mirberên Erdogan in. Û li alî din jî neyarên qewmê xwe ne, bi Erdogan û dewleta tirk ra dixwazin tevgera kurd ya netewî ji ortê rakin, bi dewleta tirk ra kurdan teslîm bigrin.

Erdogan tezkereya Davutoglu tije kir

Bavê miletê tirk û xwediyê Tirkiyê yê nuh Recep Tayyip Erdogan, tezkereya serokwezîrê xwe yê derewan Ahmet Davutoglu da destê wî û jê ra got wezîfeya te qediye, here ji xwe karekî bi din mijûl bibe.

Lê Davutoglu ne mêrê biwêribe li hemberî Erdogan rabe. Erdogon çi heqaretê li Davutoglu bike jî Davutoglu ewê daqultîne û tim besnê Erdogan bide.

Davutoglu, di 15-16 mehên serokwezîrtiye xwe da bi emirê Erdogan bi hezaran kurd dan kuştin, Kurdistan kir gola xwîne. Gelek bajarên Kurdistanê da wêrankirin.

Ji qetlîama Dêrsimê vir da tu serokwezîrî bi qasî Davutoglu xwîna kurdan neherikandin. Bi emrê Davutoglu bi sedan kurd hatin înfazkirin. Yanî Davutoglu qatilekî kurdan yê pir mezin e.

Helbet ev yek bi emrê Erdogan bû, Erdogan ji Davutoglu xwest û wî jî emrê wî bi cî anî.

Davutoglu, ji serokwezîrekî bêtir wek emirberekî li ber destê Erdogan bû, Erdogan pê li serê wî kira jî dengê xwe nedikir, navê Erdogan tim bi hurmeteke mezin, bi ”radiyallahu anhu((r.a.)telafuz dikir, lê Erdogan dîsa jî ew qewitand.

Li gel ku Davutoglu tu carî ji emrê Erdogan dernediket, her gotina wî wek emir qebûl dikir jî, gelo ji bo çi Erdogan dîsa jî bera wî da? 
Erdogan dîktatorekî pi îstîsnaye, ew û malbata wî di gelek sûcên giran geriyane.

Wî di şerê Sûriyê da gelek sûcên giran û li dijî însaniyetê kirine. Ku carê nigê wî bişemite ewê di zindanan da birize. 
Lema jî dibê ew pêşeroja xwe pir saxlem bike. Merivên pir saxlem û bi taybetî jî yên di sûc geriyane, wek wî dizî kirine bigre dora xwe.
Û ji bo ku viya bike, ciyê xwe û malbata xwe saxlem bigre dibê qanûna esasî biguhere û bibe serokkomarê Tirkyê.

Diyar e di vê riyê da ew Davutoglu dîwarekî zêde saxlem nabîne, lema jî dixwaze yekî hîn nêzî xwe, yekî hîn cesûr û yekî bêtir di sûc geriyaye bike serokwezîr.

Belkî jî zavê xwe bîne dewsa Davutoglu. 
Lê kê bike serokwezîr jî ji bo me kurdan qet ferq nake, ewê siyaseta Erdogan ya şer bidomîne.

Davutoglu merivekî tirsonek û pir bêşexsiyet e, Erdogan çi bike jî ewê tu carî xwe aciz neke û li dijî wî ranebe. Û ji xwe beyanên wî yên van du rojên dawî jî vê bêşexsieytiya wî nîşan dide.

Lema jî guhertina wî ji bo Erdogan ne problem e, wek guhertina parêzvanekî ber deriyê xwe ye.

Ji bo ku Erdogan xwe bike serokkomar ewê HDPê ji meclîsê bide avêtin û dû ra jî here hilbijartineke pêşwext. Ya kurdê nekevin hilbijartinê û heger têkevinê jî ewê bajarajê derbas nekin û bi vî hawî ewê hemû rayên kurdan ji here AKPê ra. Belkî MHPê jî di binê barajê da bihêlin û rayên wan jî here ji AKPê ra. Ji xwe wa ye MHP jî berra hev dane.

Heta hilbijartina ewê li Kurdistanê şerekî mezin bidin domandin. Di vî warî da eskeran, MHPê û CHPê bi Erdogan ra li hev kirine. Di bin teşxele û siya koçberan da heta ji wan were ewê bixwazin Kurdistanê wêran bikin. Erdogan dixwaze ji bo vê yekê yekî saxlem û pêbawer bike serokwezîr.

Erdogan bi AKPê Tirkiye êsîr girtiye û bi Tirkiyê jî Yekîtiya Ewrûpayê.

AKP ya şexsê Erdogan e, di nava AKPê da her kes sifir(0)e, her kes di binê emir û xizmeta Erdogan da ye.

Erdogan, AKPê wek organîzasyoneke mafîayê bi kar tîne, bi wê dewlet xistiye destê xwe.

Heta Erdogan serokkomarê Tirkiyê be û AKP jî li Tirkiyê îktîdar be li Kurdistanê, li Tirkiyê, li Sûriyê şer û tevlihevî nasekine.

Erdogan ewê rehetiyê nede Ewrûpayê jî. Ji bo ku dinya ji belayeke mezin, ji şerekî bêdawî xelas bibe dibê aqûbeta Seddam Husên bibe ya Erdogan jî. Ya na ne li Kurdistanê û ne jî li herêmê ewê tu carî dawî li şer neyê.

Qetlîama Dêrsimê tu carî ji bîr nabe !

Îro 79 saliya qetlîama Dêrsimê ye.
Ez egîdê serîhildanê Seyid Riza û hemû şîhêdên komkujiyê bi hurmet bibîr tînim û Mustefa Kemal û hemû berpirsiyarên komkujiyê bi şîdet mahkûm û rûreş dikim.
Di ser komkujiya Dêrsimê ra 79 sal derbas bûn, lê komkujiya kurdan îro jî li Şirnexê, li Nisêbînê, li Gewerê û li gelek bajarên Kurdistanê berdewam e. Dewleta tirk hîn dev ji jenosîda kurda bernedaye…
Bimre kolonyalîzma tirk!
Bimre bindestî!
Bijî azadî û serxwebûn!

Dadgeah dewleta tirk ya faşîst, Xarpêt

XXX

Dibê kurd îstîfa nekin, bira tirk wan bi darê zorê bavêje

Hin kes dibêjin êdî karê HDPê û kurdan di meclîsa tirk da tuneye, dibê HDP dev ji meclîsa tirk berde û here li Diyarbekrê meclîsekê ava bike.
Ez bi xwe vê dîtinê nuha rast nabînim.
Bi dîtina min dibê parlamenterên HDPê piştî vê saetê bi xwe îstîfa nekin, bira tirk wan bidarê zorê ji meclîsê bavêjin û têxin zindanê.
Ev yek him li hundur û him jî li derve ewê di lehê kurdan da be.
Her kesê, dinya alem ewê bibîne ku tirk kurdan û îradeya miletê kurd di meclîsa xwe da qebûl nakin.
Ev jî tê maneya tirk naxwazin bi kurdan ra bijîn.
Piştî ku tirkan kurd ji meclîsa xwe avêtin a wê demê dibê kurd ji bin da dev ji meclîsa wan û jiyana bi tirkan ra berdin û li Diyarbekrê meclîsekê ava bikin.
Tirk ewê destûrê nedin vê yekê, ewê midaxele bikin. Lê ev mudaxale ewê hin rê û alternatîvên nuh bi xwe ra bîne. Kurd ewê riyeke din bidin ber xwe. Tevgera kurd ya netewî ewê ji bin sulta tirkan û çepên tirk derkeve û bibe tevgereke Kurdistanî.

2016-05-03

XXX
Artêşa Hîtler çawa Stalîngrad bombebaran dikir, ewleta tirk jî Şirnexê bi wê hovîtiyê bombebaran dike, wêran dike.
Û em 40 milyon kurd jî wek li fîlmekî kompîtorê li şewitandina Şirnexê temaşe dikin.

Dîn û siyasetê kurd kirine xêrnexwazên hev

Di 30ê nîsanê da gelek komeleyên somalî û somaliyan li dijî Amineh Kakabaveh(kurdeke ji Kurdistana Îranê ye) beyanek belav kirin û xwestin partiya Vanster Partiet(Partiya Çep)wê ji partiyê û ji parlamenteriyê babêje.
Îro jî wa ye gelek komeleyên swêdî û biyanî û hin kesên swêdî wan jî bi beyanekê piştgirî dane Amineh Kakabavehê û xwestine Vanster Partiet teslîmî daxwaza kes û hêzên paşverû îslamîst nebe û Kakabavehê ji partiyê îxrac neke.
Li Swêd belkî bi sedan komele û rêxistinên kurdan hene, bi sedan kurdên bi nav û deng hene, lê bêyî çend navên kurdên Îranê, nevê kurdî ji Kurdistana bakur, navê komeleke kurdên bakur, başûr û rojava, navê nivîskar, rojnamevan, siyasetmedarekî kurd tuneye.
Navê Federasyona Komeleyên Kurdistanê tuneye û navê komeleyên girêdayî Federasyonê tuneye.
Ez matmayî mam
Gelo Amîneh Kakabavehê bi xwe ji kurdan nexwstiye ya jî kurdan beyan îmze nekirine, nexwestine piştgiriyê bidin wê.
Ez bawer nakim wê nexwestibe, piştgiriya xelkê qebûl kiriye çima ewê ya kurdan qebûl neke…
Bi dîtina min em kurd ”edîqom” in, siyasetê, îdeolojiyê, partiyan û dîn em kurd beş beşî kirine, kirine dijminên hev, kirine xêrnexwazên hev.
Her komelê, her rêxistinê, ker kurdî bi îhtîmaleke mezin kêmasiyeke Kakabavehê dîtiye, ew nêzî nizanim kîjan rêxistinê dîtiye, nizanim kîjan beyana wê neecibandiye, lema jî piştgirî nedayê.
Dijminatî û berberiya siyasî li Kurdistanê çawa be li Swêd jî eynî tişt e, xelk çi neheqiyê li merivê partiya A bike jî, merivê partiya B piştgiriyê nadê, îşê xwe jê nîne…
Lê hema hema hemû somaliyên li Swêd li hemberî Kakabavehê bûbûn yek.
Somaliyanyên ji her fikir û baweriyê bi hev ra li dijî Kakabavehê derketibûn, hemûyan bi hev ra xwestibûn ew ji partiyê were avêtin.
Û mimkûn e Vanster Partî gurra van hêzên kevneperest û îslamîst bike û Kakabavehê ji partiyê dûr xe. Ji ber ku xelk bi tifaq e.
Li gel ku Kakabavehê çend caran ji ber şaşiya xwe uzrê xwe jî xwest. Lê somalî dîsa jî aş nabin, dibêjin te heqaret li me kiriye, te em biçûk xistine, filan û bîvan…
Em kurd tu carî nikanin tifaqeke wiha nîşan bidin.
Ev şêl û bêtifaqiya kurdan min gelkî xemgîn dike.
Bi dîtina min dibê meriv di rewşên wiha da piştgiriyê bide kurdê meriv jê hez nake û ne bi firkir û siyaseta wî ra ye.
Ez bi xwe dikim, li hemberî dijminê xwe ez piştgiriyê didim kurdê ji her fikrê û partiyê. Ji bo min ya muhîm kurdperwer û li dijî dijminê min be, ne hevalê dijmin be.
Kakabaveh çi be jî, hevala kê be jî kurdeke welatparêz û kurdperwer e, tim li pişta miletê kurd e, hebûna wê ya di meclîsê û di nava partiyeke swêdî da ji bo kurdan baş e.
Ma daxwaza faşîstên tirk û îslamîstên somalî were qebûlkirin û Amineh Kakabave ji partiyê û parlamenteriyê were avêtin çi kara kurdan tê heye?
Qet, hemû jî neayrên kurdan in…

Linka beyanê

Tirkan îcar di meclîsa xwe da hovîtiya xwe nîşan dan

Hersê partiyên tirk AKP, MHP û CHPê do bi şev qela xwe kirin yek û biryara kurdan ji meclîsa xwe bavêjin girtin.
Pêşniyara guhertina madeya Destûra Bingehîn ya li ser îmunîteya(dokunulmazlika) parlamenteriyê do bi şev di Komîsyona Destûra Bingehîn da bi rayên parlamenterên AKPê, MHPê û CHPê hat qebûlkirin.
Yanî ji bo ku bikanibin hin parlamenterên HDPê mahkime bikin û dû ra jî bavêjin girtîgehê hin madeyên Qanûna Esasî guhertin.
Di dema minaqeşeyan da parlamenterên AKPê êrîşî ser parlamenterên HDPê kirin û xwestin wan lînc bikin. Piştî pevçûn û şerekî mezin, parlamenterên HDPê civîn terikandin û AKPê, MHPê û CHPê wek bira, ji bo ku kurdan ji meclîsê bavêjin û zindan bikin qanûna xwe guhertin.
Kurdên ku ji bo biratiya tirkan heta nuha gewriya xwe diçirandin, gav û saetê digotin tirk birayên me ne, em naxwazin ji Tirkyê veqetin, em dewletê naxwazin , heta li dijî otonomiya kurdan bûn, do bi şev careke din bi çavên xwe dîtin ku tirk çiqasî pîs in, çiqasî irqcî û faşîst û barbar in, ji hemû nirxên însaniyetê bêpar in û hemû jï neayrên qewmê kurd in. 
Tirk, bi rast û çepên xwe ve, bi dîndar û AKP û MHP û CHPya xwe ve irqçî ne, neyarên miletê kurd in û gava mewzû dibe kurd û Kurdistan hemû li hemberî dibin yek, dibin wek cêwiyên yek hêkê.
Piştî vê, di rojên pêş da îcar ewê îmunîteya yanî ”parastina, dokunulmazlika” gelek parlamenterên HDPê rakin û wan bidin mahkimê. 
Û mehkime jî ji bo kurdan ji xwe wek ya naziyan e, formalîte ye, bêguman ewê jî di celseyekê da hemûyan mahkûm bike û wek Leyla Zana û hevalên wê bişîne zindanê. Erdogan û hemû partiyên tirk, dewleta tirk di vî warî da li hev kirine. 
Erdogan du roj berê ji ber ku Emerîka ji YPGê û PYDê ra nabêje terorîst û sîlehan nade Tirkiyê resta Emerîka xwend, got hûn ç bikin jî emê şerê li hemberî kurdan ranewestînin. Hûn sîlehan nadin jî ne muhîm e, ”emê navika xwe bi xwe bibirin.”
Yanî kurd çi bikin jî dewlet ewê şer bidomîne û berfirehtir bike.
Ji ber ku dewletê li hemberî kurdan biryara şerekî mezin daye, avêtina HDPê ji meclîsê û tewqîfkirina wan beşekî vî şerê li hemberî kurda ye.
Lema jî kurd çi bikin jî vala ye, AKP ewê vê siayseta xwe ya şer bidomîne.
Îcar dibê kurd, HDP, PKK û partiyên din li hemberî van êrîşên dewletê çi bikin?
Bi dîtina min heger yek parlamenterê HDPê tenê jî tewqîf bikin dibê HDP di meclîsê da nemîne, ji meclîsa tirkan vekişe.
Ya din jî şêla li hemberî şer e.
Wek min li jor jî got, hemû partiyên tirk, dewleta tirk, hukûmta AKPê kurd çi bikin jî, çiqasî ”aştiyê, diyalogê” bixwazin jî hukûmetê tu carî qebûl neke û şer ranewestîne.
Lema jî ya harî baş ew e ku PKK, HDP û kurd zêde xwe biçûk nexin û nuha dev ji bangên ”aştiyê û diyalogê” berdin, li ber xwe bidin, heta ji wan tê şerê dewleta tirk bikin. 
Tiştê xuya ye bêyî liberxwedaneke mezin û bersîveke xurt tu rê û alternatîfeke din ya PKKê, HDPê û kurdan tuneye.
Alternatîfeke din wek Erdogan û Davutoglu dixwazin teslîmbûn e, hildana ala spî ye.
Çimkî Erdogan ji kurdan ra dibêje ya hûnê teslîm bibin û bibêjin ”tobe”!, ya jî emê serê we hemûyan jêkin û Kurdistanê bajar bi bajar wêran bikin.
Wa ye îro bi sedan wesayitên leşkerî şandine Wanê. Diyar e ewê Wanê jî wek Cizîrê, Nisêbînê, Şirnexê, Gewerê, Farqînê, Sûrê wêran bikin. 
Nêta dewletê ev e.
Dibê ev şer çênebûya, dibê rewş nehata vê nuxtê. Lê piştî ku rewş hat vê nuxtê, piştî ku dijmin hat kuştina te û dest bi wêrankirina bajarên te kir, dibê tu dest bibî xwe û li ber xwe bidî û tu jî derba mirinê li vî neyarê devbixwîn, li vî marê kor xî. 
Rexne, gilî û gazin ne dijmin disekinîne û ne jî feydeyekê dide me, mecbûrî dibê em li ber xwe bidin. Rev teslîmieyt hîn xerabtir e...
Di meclîsê da wek gurên har êrîş birin ser kurdan, xwestin kurdan lînc bikin. 
Di rewşeke wiha da tiştê rast dibê meriv dest bibe xwe û heta heger kanibe derba mirinê li neyarê xwe xwe. 
Piştî vê saetê serîtewandin, rev ne rast e, dibê em li ber xwe bidin. Dibê ev dijminê dev û destbixwîn careke din bibîne ku kurd natewin, kurd naşikên, kurd teslîm nabin....

Video 1
Video 2

Li gorî Erdogan hemû misilman tirk in

Serokkomarê Tirkiyê sultantan Recep Tayyip Erdoganê panturkîst gotiye, ”Di medeniyeta Rojava da tirk ne navê qewmekî ye, navekî hemû misilmanan îfade dike.”
Berî her tiştî carê ev îdîa Erdogan ji bin da vir e, ewrûpî, alema xiristiyan hemû misilmanan tirk nabînin.
Ev yek.
Îslamiyet navê dînekî ye û tirk jî navê qewmekî ye.
Ji bo ku meriv ji ereban, endonîziyan, pakîstaniyan û îraniyan ra bibêje tirk, dibê meriv ya dîn be ya jî wek Erdogan û Îsmet Ozel panturkîst, faşîst û xwediyê îdeolojiyeke nazîst be û hinekî jî nexweş be…
Fikrê hemû însan ji tirkan sadir bûne û her misilman tirk e, fikrê kemalîstan jî bû, wan jî di salên 1930-40î da gelkî propagendeya vê îdeolojiya irqçî kirin, di vî warî da gelek tiştên berradayî gotin û gelek teoriyên berradayî çêkirin.
Erdogan jî wa ye vê îdeolojiya irqçî, panturkîst dixwaze ji nuh ve vejîne û bibe Yusuf Akçura û Nihal Atsizekî nuh.
Bi îktîdara AKPê ra kurdan jî û dinyayî dît ku îslamîstên tirk jî irqçî û faşîst in û di warê îdeolojîk da di nabêna Erdogan û Bahçelî da bi qasî misqalekî jî ferq û cudahî tuneye…

Di nava me da nezanên bi nezaniya xwe nizanin pir in.

Hin kurdên çep, sosyalîst yên xwe pir zana dibînin bi munasebeta 1ê Gulanê çîrok û dîroka 1ê gulanê bi tirkî dûr û dirêj ji me ra nivîsîne.
Lê eynî kes dîroka xwe hewqasî fêr nebûne, hewqasî meraq nekirine.
Eynî kes hîn nizanin du gotinan bi kurdî binivîsin û vê yekê jî tu carî ji bo xwe wek kêmasiyekê jî nabînin.
Zanîngehên blind qedandine lê hîn nizanin 1ê Gulanê bi kurdî rast binivîsin. Hîn nizanin bi kurdî bibêjin 1ê Gulanê pîroz be!
Hîn herfên kurdî nas nakin.
Xêra medyaya sosyal meriv gelek sosiretan dibîne, civata xwe, mirivên xwe nas dike, pê diqehere, ji qehran porê xwe dirûçikîne.
Lê netîce naguhere, di nava kurdan da nezanên bi nezaniya xwe nizanin pir in.
Bi Xwedê hewqasî pir in, hewqaî pir in meriv ji civata xwe, ji pêşeroja miletê xwe bêhêvî dibe...

XXX

Umran Aran gotiye, ”Çi cara ku ez bi Malmisanij re peyivîme, hema deqeyek be jî, illim ez tiştekî jê hîn bûme. Perspektîfa wî pir fireh e û mirov ronî dike.”
Zanîn bi xwendinê dibe. Malmîsanij dixwîne, karê xwe cidî digre. Lema jî merivekî zana û cidî ye, meriv tiştan jê fêr dibe.
Heger Malmîsanij emerîkî bûya kurdan ewê ew bidana ser serê xwe, li ser destan bigerandana. Lê kurd hîn bi qasî Sirri Sureya. Onder wî nas nakin.
Malmîsanij Noam Chomskyê kurda ye, lê kurd bi qasî ku qedir didin Chomsk hewqasî qedir nadin Malmîsanij.
Ev jî trajediya me ye.
Em miletekî xwe nas nakin.

XXX
-Dibê tu bizanibî ku ji bo kûçik tu ferdekî malbatê yî û ji bo pisikê jî tu xizmetkareke.

Her heywanek bi çavekî li însên dinêre.
Pisik bi çavê xizmetkaran li her kesî dinêre û xwe xwediyê malê dibîne.

Dewleta mafîa

Îktîdara AKPê dewleta tirk tam kiriye dewleteke mafîa û bi metodên mafîayê îdare dike.
Erê ji destpêkê da jî ne tu dewlet bû, tu carî nebû dewleteke şefaf û girêdayî qanûn. 

Ji destpêkê da dewleteke irqçî, faşîst û îşxalkar e, destê wê di xwîna bi milyonan însanî da heye, li ser milk û malê xelkê, welatê xwelkê ava bûye.

Lê bi îktîdara AKPê ra tew bi carê da xera bû, ji qerekterê dewletbûnê bi carê da dûr ket, tam bû dewleteke mafîa.

Bi şev û roj wer li pey kurda ye, hal û karê wê dek û dolab e, kuştin e, bombekirin e.
Berê dîrekt bi hêzên xwe, bi ajanên xwe dikir, lê ev çend sal in îcar ji xwe ra hêzeke qatilan ya bi navê Daîşê çêkiriye, îcar bi destê vê hêza qatilan kurdan dide kuştin û terorîze dike.

Li Dîlokê(Entabê) dîsa bombe teqandine, sedîsed tiliya çeteyên dewletê tê da heye.
Hedef ne polîs bûne, hedef kîtleya 1ê Gulanê bûye. 

Lê wasite berî ku bigihîje hdefa xwe ji alî hin polîsan ve hatiye sekinandin û li ser vê qatil ji wesayitê daketiye û bazda ye. Polîsan ew gulebara kirine û di vê nabênê da bombe teqiya ye û du polîs mirine û çend heb jî birîndar bûne.

Û medya jî tu carî rastiyê nabêje, tim meselê şêlo dike, li bin guhê hev dixe…

Di teqîna Entabê da jî eynî sextekariyê dikin, dibêjin teqîn li hemberî emniyeta entabê bûye, lê rastî ne wisa ye, teqîn bi tesadufî li wir bûye…