Çend rêz ji bîranînên min -272-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1996-10-24
Şerê YNKê û PDKê berdewam e. Qaşo maşo do tirkan gotin li hev kirine.

Lê radyoya swêdî îro di xeberên xwe da got şer berdewam e. Heta yek baş zora yê din nebe ji hev nagerin.

Meriv nizane bigrî, nizane bikene. Hîn azad nebûne, hîn Kurdistan çênebûye dikin hevdu bixun. Ji dêlî ku destên xwe bidin hev, hêzên xwe bikin yek li dijî dijminê xwe şer bikin, şerê hev dikin.

Bi baweriya min bi vê siyasetê PDKê û YNKê li pêş azadî û serxwebûna kurdan gelşeke mezin in, ji karê bêtir zirarê didin kurdan û şiûrê kurdayetiyê. Çimkî hevdu qebûl nakin.

XXX
1999-10-24

Serokê Tirkiyê Suleyman Demîrel, serokwezîr Bulent Ecevît û Serokê Meclîsê Yildirim Akbûlût ji bo vekirina hin tesîsan îro li Diyarbekrê bûn.
Li ser banga HADEPê gelek însan çûn pêrgî wan. Slogana esasî ya bênabên milet diqîriya:
”Bira îdam rabe, aştî anuha !” bû.
Li gor nûçeyên Telewîzyona Medyayê û axaftina serokê Hadepê yê Diyarbekrê milet pirr bi şewq, biryardar û bi disîplîn bû. Yanî mile tji hatina van dagirkeran pir memnûn bûye. Bi baweriya min ewê rast be. Çimkî kurd wan wek dijminên xwe nabînin. Ew ruhê milî bi kurdan ra tune ye. Di vî warî da em nagihîjin şekala filistîniyan.
Dihat hêvîkirin serokên dewletê di vê gera xwe da tiştekî ciddî bibêjin. Lê belê ev hêvî vala derket, ne Demirel, ne jî Ecevît bêyî neqaratên xwe yên hertim êdî bawîşka meriv tînin, tu tiştekî nuh û ciddî negotine.
Piştî hin propagande û leqleqên vala lêxistine çûne Licê. Li Licê Xalis Toprak asasê hin fabrîq û mekteban kola.
Bi vê siyasetê, bi vî miletê wek berxika em nikanin ji tirkan tu mafan bistînin.

 XXX
2000-10-24

Birayê Mihemed Şahîn,

Ez nizanim tu bi Kurdî dizanî ya na? Lê hema wiha nuqîtî dilê min tu kurd î û tu bi kurdî jî dizanî.
Çimkî ancax mejuyekî kurd dikane wiha bifikire û dilekî kurd dikane wiha lêxe!
Ji ber vê yekê jî ez dixwazim bi kurdî, yanî bi zimanê dayika xwe yê şîrîn spasî te bikim ji bo ku te ev nivîsa li ser HADEPê nivîsîye.
Ez bawer nakim yekî ku bi her tiştê xwe ne kurd be bikanibe nivîseke wiha binivîsîne.
Te bi vê nivîsa xwe ya dilê min aniye zimên, him jî te gelkî xweş û dobre dobre gotiye.
Ez bawer dikim bi milyonan kurd jî wek min difikirin, wek min his dikin. Ji ber ku wek kurd bi hawakî din fikirîn û hiskirin pir anormal e.
Di vê dema pir girîng û hesas da hebûna dengê wiha gelkî muhîm e. Ez hêvî dikim dengên wiha roj bi roj zêdetir bibin.

Ez careke din sipasî te dikim û ji te ra serkeftinê dixwazim.

Bimîne di xweşiyê da

Zinarê Xamo

XXX
2013-10-24
Ji Eyûb Karageçîlî ra

Birayê Eyûb, min nuha bersîva Îbrahîm Guclû xwend. Tu yê bersîvê bidê ya na ez nizanim. Lê bi dîtina min demagojiyê dike, bersîva pirsên te di nivîsa xwe da qal kiriye nade.
Mesela ji dêlî ku bersîva karkiriya xwe ya TRT6ê bide, vê yekê îzah bike, dibêje ez derdikevim her telewîzyonê û fikrê xwe dibêjim.
Mijar ne ev e.
Di kanaleke telewîzyonê da ya jî di TRT6ê da beşadarî programekê bûyin tiştek e û di TRT6ê da karkiriya bi pera tiştekî din e.
Yanî ew dewleta xwedêgiravî ew li dij e, di kanaleke wê dewletê da bi pera programan çêdike.
Ev û derketina programeke minaqeşeyên siyasî du tiştên ji hev cuda ne. Dibêje PKK projeya dewletê ye û loma jî gav û saetê şerê PKKê dike.
Lê li aliyê din jî di telewîzyona wê dewletê da kar dike û pera qezenc dike.
Ev çawa dibe?
Heger dewletê PKK çêkiriye(ev îdîyeke pir berradyî ye)wê demê dibê ew ji PKK bêtir şerê dewletê bike, jê ra nebe karkir.
Tu zanî çend roj berê di vî warî da min nivîsek li ser wî nivîsî, lê min ev rexneyên xwe gotin,lê bersîva min neda. Berê jî min çend caran li ser nivîsî dîsa xwe bêdeng kir.