|
Bombeya di 9ê mehê da li Şemzînanê teqiya nîşan dide ku
dewleta tirk siyaseta xwe ya kurdan bi qasî serê derziyê jî neguharandiye û
nêta wê ya guherandinê jî tuneye.
Hemû gavên xwedêgiravî di riya demokrasî û Yekîtiya Ewrûpayê da hatine
avêtin, hemû qanûnên hatine derxistin wer xuya ye ku bi qasî misqalekî jî
qîmet î herbiya wan tunye. Ew nikanin rê li ber cînayet û terora dewletê
bigrin.
Heger siyaseta ”dewleta kûr”, dewleta ku esas xwedî
desthilatdar e ne xapandin bûya , heger dewletê bi rastî jî siyaseta xwe
guherandiba û amedeyî guherandinê bûya ew ê li Şemzînan bombe nexista dikanên
xwelkê û milet nekuşta.
Heger nêta vê dewletê û çareserkirina mesela kurd hebûya
ew ê lîsteya kesên ku ewê werin kuştin çênekira û neda destên qatilên xwe.
Dewleta tirk heta nuha li hember kurdan çi siyaset
meşandiye diyar e dixwaze nuha û ji nuha û pê va jî wê siyaseta xwe ya înkar
û îmhayê her bidomîne. Yanî wek destpêka salên 1990î dîsa dest bi cînayetên
qatil ne diyar bike, dîsa li vir û li wir kurdan birevîne û bikuje.
Bûyera Şemzînan vê nêt û siyaseta dewleta tirk radixe ber
çavên me. Dibê em kurd qet xwe nexapînin û vê rastiyê bibînin.
Wek tê zanîn ev sê çar meh bûn ku li Colemêrgê û li hin
qezayên wê, gelek sabotajên bombeyî yên fail ne diyar dihatin meydanê. Di van
sê çar mehên dawî da bi kêmanî li neh deh ciyan bombe teqiyan. Di van teqînan
da sê çar kes mirin û gelek kes jî birîndar bûn. Dewletê û medya tirk wek
hertim bûyer dixistin hustuyê PKKê.
Lê bombeya di 9ê mehê da li Şemzînan, di dikana Sefer
Yilmazê kitêbfiroş da teqiya derxist ortê ku yên van sabotajan dikin û xelkê
dikujin dewlet bixwe ye. Dewlet bi leşker û pûlisên xwe bombeyan dike mal,
dikan û erebeyên xelkê û mirovên sivîl dikuje. Armanc teror e, xuluqandina
kaosê ye.
Berdevkên hukûmetê çi dibêjin bila bibêjin, çi soz û
peymanan didin me û Yekîtiya Ewrûpayê bira bidin pere nake, hêza ku esas
xwediyê dewletê ye dev ji siyaseta xwe ya berê bernade û naxwaze berde jî.
Wek bûyera ”Sûsûrluk”ê, li Şemzînan jî bûyer bi tesadufî
derket ortê. Qatil bi tesadufî hatin girtin.
Bêguman bûyera Şemzînanê jî bi qasî bûyera ”Sûsûrlûk”ê
girîng û mezin e. Dibê em kurd girîngî û mezinayiya vê bûyerê bibînin û li
gor wê tedbîrên xwe bigrin û siyaseta xwe tekûz bikin.
Bêguman di bûyera Şemzînan da tiştê herî girîng, hersê
kesên ku ji alî gel va hatibûn girtin leşker û mensûbê JÎTEMê(teşkîlata
cendirman ya îstîxbaratê) derketin. JÎTEMê di nava van 15-20 salên dawî da li
Kurdistanê bi hezaran kurd kuştine.
Di erebeya terorîstên dewletê da (erebe li ser JÎTEMê
qeydkiriye) gelek belgeyên girîng ketin destê gel. Nasname û rutbeyên wan,
belgeya kesê emir dabû wan, sîlehên giran, bombe û malzemeyên bombeçêkirinê,
lîsteya kesên ewê werin kuştin, xerîte û krokiyên gelek mal û dikanan.
Di van belgeyan da ne tenê plan û programa vê bûyera
Şemzînan, pilan û programên gelek bombekirin, kuştin û suîqestên din jî pir
hindik ronî dibin.
Di ereba JÎTEMê da du belgeyên ku van hersê şexsan wek
wezîfedar nîşan didin jî ketin destê gel. Yê wezîfename îmze kiriye
Mîralay(Albay) Erhan Kubat e û Qumandarê Alaya Cendirmeyên Çolemêrgê ye.
Dîsa, di erebeya qatilên JÎTEMê da 3 lîsteyên cuda jî
ketin destê gel. Ji van lîsteyan yek, lîsteya kesên ku ewê bihatana kuştin e.
Di vê lîsteyê da navê 80 kesî heye. Li hember her navî ji edresa mal û karê
wan bigre, heta bi numreyên telefonên wan, gelek agahdariyên taybetî hene.
Lîsteya din jî ”Lîsteya Milîsan” e. Di vê lîsteyê da jî navê 25 kesan heye.
Lîsteya sêyemîn, lîsteya ajanên dewletê ye, navê kesên ku ji dewletê ra
ajantiyê dikin hene.
Ev belge jî hemû nîşan didin ku dewletê li Kurdistanê dîsa
dest bi teror û cînayetan kiriye. Lê bi hawakî bêhemdî, li Şemzînan bi qatil
û aletên xwe yên sûc ve cirmîmeşûd hate girtin. Ev tesadufeke xêrê bû.
”Dewleta Kûr” wek do, îro jî bi hawakî bêtirs û bêperwa li
qatilên xwe xwedî derket û pesnê cînayetên wan da.
Serokkomarê Tirkiyê Sezer got:
-Ez ji medyayê fêr bûm. Ji ber ku agahdariyên bi teferûat
negihîştine destê min, loma jî ez nikanim tiştekî bibêjim. Dema agahiyên bi
teferûat gihîştin min ezê şiroveyekê bikim
Yanî tiştê bûye ez ne li dij im.
Li ser pirsa rojnamevanekî ku kesên hatine girtin leşker
in, hûn çi dibêjin, Serfermandarê Artêşa Tirk Ozkok jî got:
-Li wê herêmê gelek kesên wezîfedar hene. Mimkûn e.
Nasnemeya her wezîfedsarî heye.
Fermandarê Cendirman General Fewzî Turkerî jî bûyer pir
biçûk nîşan da û got:
-Ne wek bûyera Sûsûrlûkê ye, bûyereke lokal e.
Serfermandarê Hêzên Reşayiyê General Yaşar Buyukanit wek
her tim ji hemûyan jî eşkere û vekirîtir zabitên hatine girtin parast.
Buyukanit got:
-Yekî ku bi kurdî dizane. Li Bakurê Iraqê gelek xizmetên
baş kirine. Dema min li wir wezîfe dikr, tim li ba min bû.
Kesên ku bi çek, bombe, xerîte û lîsteyên kesên ku ewê
werin kuştin hatine girtin mensûbên artêşa tirk in.
Kesê ku emir û wezîfa kuştin û bobmbekirinê daye wan jî
mîralayekî(albayekî) artêşa tirk e.
Ji Serokkkomar bi bigre heta bi Serfermandarê Giştî, hemû
fermandarên artêşê yeko yeko beyanan didin û li merivên xwe xwedî derdikevin,
dibêjin ew ”leşkerên pir hêja” ne. Yanî mesele pir vekirî ye.
Li hember bûyereke hewqas girîng û mezin hikûmet û hemû
wezîrên berpirsiyar wek kevrê ku tu bavêjî binê bîreke bêbinî, bê deng û bê
his in, heta nuha tu gaveke ciddî neavêtine, tu beyaneke cîddî nedane. Tenê
milet gazî sakînbûnê dikin.
Gelo ji bo çi?
Du îhtîmal hene, ya hikûmet bixwe jî bi vê siyaseta
”dewleta kûr” ra ye loma deng nake, ya jî li dij e lê nikane tiştekî bike.
Hêza wan nagihîjê girtina berpirsiyarên esasî, kesên ku emir dane qatilan.
Ji bo me kurdan herdu îhtîmal jî xerab in. Loma jî ji
hikûmet û edelata Tirkiyê bêtir dibê em bîrûraya giştî ya Ewrûpayê ji bûyerê
agahdar bikin, dibê em Yekîtiya Ewrûpayê mecbûrî mudaxeleya vê bûyerê bikin.
Pêşketinên li Başûrê Kurdistanê û bi taybetî jî gerra
Serokê Kurdistanê birêz Mesûd Barzanî ya Emerîkayê û hin welatên Ewrûpa
dewleta tirk dîn û har kiriye, çi nerindî û xerabî ji destê wan wê bê ewê
bikin. Ev yek dibê ji bo me hemû kurdan zelal be. Dibê em hesabê xwe li gor
vê bikin.
|
Inga kommentarer:
Skicka en kommentar