Ez guh didim dengê ûjdanê xwe

Ez guh didim dengê ûjdanê xwe û dibêjim, heger hemû rêxistinên kurd û hemû kurdên azadîxwaz, welatparêz û kurdperwer wek PKK-ê û BDP-ê li dijî vê dewleta zalim bi hemû hêza xwe têkoşîn bidana nuha ji zûda kurd azad bûbûn.
Lê çi heyf ku ûjdanê her kesî jê ra wiha nabêje, ji ber ku hin ûjdan kor in…

XXX
Serokkomar Gul, di axaftina xwe ya derbarê ketina helîkoptera Skorsky da dîsa ya dilê xwe got û ruyê xwe yê rastîn eşkere kir:
”Emê bi hemû hebûna xwe, bi hemû hêza xwe bi terorê ra micadele bikin. Bi baweriyeke mezin emê micadele bikin. Li hemberî kesên ku bi çek derdikevin hemberî me, emê heta dawiyê şer bikin.”
Tu dibêjî qey kurdan ji kêfî rahîştiye çekan û derketine serê çiyan. Ma ne we kurd mecbûrî çekan kir, loma kurdan rahîşt çekan. Heger we mafê kurdan bi rehetî, bi riyeke demokratîk bida, bêguman kurdan ranedihîşt çekan.
Û nuha jî ne dereng e, fermo mafê kurdan bidin, hebûna kurdan qebûl bikin, zimanê kurdî bikin zimanê perwerdeyê, kurd ewê sibe çekan deynin.
Hûn ne bi rehetî û bi riyeke demokratîk û ne jî bi riya çekan, hûn naxwazin mafên kurdan yên netewî bidin. Tiştê hûn ji kurdan ra dibêjin, berdewamiya bindestiyêye. Û kurd jî tu carî ewê vê bindestiyê qebûl nekin.

XXX
Ji bo serkeftinê dibê meriv bajo ser tiştê ku meriv jê ditirse. Kurd berê ji dewleta tirk ditirsiyan, lê îro natirsin. Ji ber ku natirsin ewê qezenc bikin.

XXX
Yê mêr propagendeya mirinê nake, mirinê li der û dora xwe belav nake, lê belê ji mirinê jî natirse. Kurd êdî ji mirinê jî natirsin.

XXX
Zulm û çavsoriya ev hukûmeta AKP-ê li kurdan dike min pir diêşîne, ez nuha tehamul nakim di otobozeke belediyê da li kêleka meriv ya jî berpirsiyarekî hukûmetê rûnim.

XXX
Tirkiyê, Serêkaniyê daye îşxalkirin

Li gorî beyanên berpirsê El-Partî û Endamê Encûmena Niştimanî ya Kurd (ENKS) Birîmo û Berdevkê Encûmena Gel a Rojavayê Kurdistanê (EGRK) Şêrzad Adil, bajarê Kurdistana rojava Serêkaniyê bi însîyatîfa Tirkiyê ji alî Artêşa Azad ya Sûriyê ve hatiye îşxalkirin.
Ketîbeyên Artêşa Azad ya Sûrî yên îslamî ji alî Tirkiyê ve, di ser Ceylanpinarê ra ketine bajarê Serêkaniyê û bajar îşxal kirine.
Li gel ku li Serêkaniyê tu hêz û qeweteke dewleta Sûriyê lê tuneye û bajar di destê kurdan da ye jî.
Tirk, ji bo ku tedbîra xwe ji nuha da bigrin û nehêlin Kurdistan di bin destê kurdan da bimîne, bi riya merivên xwe, di bin navê ”Artêşa Azad” da Kurdistanê îşxal dikin.
Dema dibînin ku ew bi artêşa xwe nikanin îşxal bikin, bi erebên merivên xwe didin kirin. Her çiqas nav ”Artêşa Azad” be jî, lê tirk in û merivên tirkan e.
De bira Abdulbasit Seyda û hevalên wî û hemû neyarên PYD-ê li dijî vê îşxala Tirkiyê derkevin û leşkerên wan ji Serêkaniyê derxin.


XXX
Kûçikê carê bielime hestiyên bajêr, hew ji ber deriyê qesaban diqete û vedigere gundê xwe. Eynî tişt tê serê însên jî. Însanê ku carê fêrî kurtêlên dijmin bibe, hew dev ji kurtêlna berdide...

XXX
Tiştê însên dibe serkeftinê ne tesaduf e, ne lêhatin e, xebat e, ezm û sebat e. Miletê kurd bi ezm û sebata û bi xebata xwe ewê biserkeve.

XXX
Merivên mezin li vê cîhanê mecbûr in êşên mezin bikşînin. Ji ber ku tiştê wan mezin dike jî ev êşên mezin in.

XXX
-Sebir, ne hustuxwarkirin e, liberxwedan û micadelekirin e. Hz. Omer.
Miletê kurd ewê tu carî li hemberî zulmê hustuyê xwe xwar neke, ewê bi mêranî serî hilde î li ber xwe bide. Û ji xwe dîroka qahpik jî şahida vê yekê ye...

XXX
Camêrekî gotiye, “Heger li welatekî şelafî(şalûzî, dalkavuklik) ji durustiyê bikartir be, ew welat têk diçe” yanî bat dibe.
Li Tirkiyê şelafî ne ku tenê ji duristiyê bikartir e, ew jê bişereftir e jî... Lê ev welatê rezîl û bêşeref dîsa jî bat nabe...