Ew ji bo kurdî dimrin, kurd bi tirkî piştgiriya wan dikin

Ew ji bo axaftian bi kurdî di zindanan canên xwe feda dikin, kurd bi tirkî
piştgiriya wan dikin. Ev yek şaş e.

Ev 66 roj in bi sedan keç û xortên kurd di zindanên Tirkiyê da ji bo perwerdeya bi zimanê dayikê û di dadgehan da xweparastina bi kurdî yanî ji bo serbestbûna zimanê kurdî ketine grewa mirinê, canên xwe xistine tahlûkê, gelekên wan li ber mirinê ne.
Lê bala min lêye di facebookê da hin kurd hîn jî bi tirkî lînkên piştgiriyê belav dikin, bi tirkî piştgiriya xwe nîşan didin. Yanî wisa xuyaye ku armanca grewê fêm nekirine.
Ji bo tiştekî wiha nivîsandina bi tirkî ne rast e, bi sedan kes ne ji bo axaftin û nivîsandina bi tirkî, ew ji bo kurdî canên xwe feda dikin, ji ber ku dijmin nahêle ew bi kurdî xwe biparêzin loma wan li hemberî zulmê serî hilda û ev rê hilbijart.
Heger hûn bi rastî jî dixwazin piştgiriya grewên birçîbûnê bikin, dibê hûn piştgiriya armanca girtiyan jî bikin. Armanca grewê axaftian bi kurdî ye, azadiya kurdî ye.
Yanî dibê hûn bi tirkî nenivîsin. Çimkî ew ji bo axaftina bi kurdî ev 66 roj in di grewê da ne; ne ji bo tirkî.


XXX
Hemşeriyê min ê xwendevanê zanîngeha Mêrdînê beşê mamostetiya kurdî M. Alî Basik, derbarê kitêba min ”Antolojiya çîrokên zarokan” da çend pirs ji min kiriye. Min nuha bersîvên xwe jê ra şand. Ez hêvî dikim ku bersîv bi dilê wî be.
Ez kêfxweş bûm ku ji Wêraşarê jî kesên dixwazin bibin mamosteyên kurdî derdikevin. Wêranşar bajarekî ku muhtacî kesên kurdîzan e.
Ji hemû xwendevanên beşê kurdî ra serkeftinê dixwazim. Heger li ba min zêde hebûya minê Antolojiyek diyarî her xwendevanekî bikira.

XXX
Hemşeriyê min Hadî Kuranlioglu gotineka pir rast û di cîda kiriye, gotiye:
-Ferqa di nabêna gelê flistîn û gelê kurd da ev e; kurd, zalimên li flistîniyan zulmê dikin diricimînin, flistînî, ji zalimên li kurdan zulmê dikin ra li çepikan dixin.
Ne kêm ne zêde, eynen wisa ye. Heta hin caran(wek dema şerê Îraqê) bi çepikan jî nayên serî, li dijî kurdan radihîjin çekan jî…