Qatil hukûmet û medîa tirk e

BDP-ê li hember manşeta rojnameya Yenî Şafakê ‘‘Qatîl hûn in‘‘ reaksiyoneke tund nîşan da û bi beyaneke nivîskî diyar kir ku, heger ew rastî êrişekê bên  berpirsiyarê vê yekê ewê AKP û rojnameya Yenî Şafakê bin.

BDP-ê got, Yenî Şafakê bi vê manşetê him ew kirine hedefeke vekirî û him jî partîya wan wek partîyeke terorîst nîşan daye.

Hukûmet û çapemeniya nêzî AKP-ê zayîatên artêşa tirk yên van rojên dawî dixin hustuyê BDP-ê û DTK-ê. Hukûmet û media nêzî AKP-ê ne hukûmetê, lê BDP-ê berpirsiyarê hemû bûyeran nîşan didin.

Hukûmet ji bo kuştina zarokên kurdan him bi hezaran leşkerên giran, bi tank û top dişîne ser wan û him jî dema di şer da tên kuştin di telewîzyonan da bi nîşandana zarok û malbatên leşkerên ku jiyana xwe wenda kirine, hestên însanan îstîsmar dikin û bi vê yekî jî milet li hembrî kurdan pîj dikin.

Piştî beyanên Erdogan yên bêmesûliyet û nîjadperest yên li dijî kurdan, pir ne dûr e ku li hemberî BDP-ê êrîşên kîtleyî û heta hin sûîkast werin kirin.

Ji xwe ev du roi in ku li çend ciyan him êrîşî bînayên BDP-ê kirine û him jî êrîşê kurdan kirine.

Yanî beyanên Erdogan, Çiçek, Gul û yên wezîrê hundur û wezîrê bergiriyê û weşanên media nêzî AKP-ê û bi taybetî jî weşanên rojnameya Yenî Şafakê li hemberî kurdan tahrîk û banga êrîşan e.

Li aliyê din jî li Sêrtê û li gelek bajarên din operasyonên li hemberî BDP-ê û kesên kurdperwer bênabên berdewam in.

Helbet kurd baş dizanîn ku girtin û tewqîfatên kurdan biryareke siyasî ye û ji zûda ye ji aliyê hukûmeta AKP-ê ve hatiye dayîn.

Doz û dadgehkirin hemû lîstik û tiyatro ye.

Dema dawî li taktîên awiqandin û xapandinê tên, hukûmet îcar dest bi zorê, bi terorê û êrîşan dike.

Sebebê vê yekê jî hukûmet bi rastî naxwaze mesela kurd çareser bike, heger hukûmetê bixwesta îro ev şer çênedibû û hewqas zarokên xelkê feqîr di tememên xwe yên xort da nediahtin kuştin.

Loma jî ”qatil” ne BDP, esas hukûmet û medîa şerxwaz e, medîa şerxwaz şer dixwaze.

Çimkî dewlemendiya wan li ser berdewamiya vî şerî ye.