Şirove û meylên facebooka malxerab nahêlin ez dest bi nivîsa xwe bikim. Ez bersîva meylekê didim, yeka din tê.
Ez bersîva wê didim, îcar yeka din tê…
Û bi vî hawî dom dike û dor nayê nivîsandinê.
Yaho ev ”meşhûrbûn” jî belaye bavo, min nizanîbû teşxeleya meşhûrbûnê hewqasî zêde ye….
Qatil û faşîstê Norweçî Anders Behring Breivik, îro li Osloyê derxistin hemberî hakim.
Dadgehê teqrîben 35 deqîqeyan ajot.
Dadgeh ji çapemeniyê ra girtî hate kirin û ji bo ku fikrên wî li cîhanê belav nebin ji nuha û pê va jî ewê dadgehkirina wî di pişt deriyên girtî da dom bike.
Di dadgehê da qatil her du êrîş jî qebûl kirin lê dîsa jî got ku ew bêsûc e.
Anders Behring Breivik gotiye, ”ji bo ku Ewrûpayê ji îşxala misilmanan rizgar bike wî ev yek kiriye.”
Û ji ber ku ”Sosyal Demokrat bi siyaseta xwe îxanetî Norweçê dikin” loma wî êrîş biriye ser kampa xortên Sosyal Demokrat.
Yanî bi gotineke din, ji bo ku ”min û zarokên min”, hemû misilmanan ji Ewrûpayê derxe qatil ev cînayet kiriye.
Sed xortên bûn hedefa guleyên vî qatilê xedar, ji ber ku kesên demokrat û humanîst bûn, ji ber ku dilê wan ji yê qatil gelkî mezintir bû loma hatin kuştin, loma Anders Behring Breivik ji wan nefret dikir û ew dan ber gulan.
Yanî hinekî hewqas xort di ruyê ”min” da, di ber ”min” da, ji bo ”min”, ji ber ku ne li dijî misilmanan bûn di temnên xwe yê xortaniyê da jiyana xwe ji dest dan.
Loma jî ji roja îniyê da ye ez jî hinekî xwe sûcdar dibînim…
Ez dibêjim ”ez” û zarokên min, yanî em kesên misilman û ji Asya û Afrîkayê nehatatana Norweçê, Swêd û Ewrûpayê, em li welatê xwe bûna ewê ev qetlîam nebûye, ewê ev canawar ji civata Norweçê derneketa.
Sebebê vê qetlîma mezin hebûna me ya li Ewrûpayê ye.
Xwezî em nehatana Ewrûpayê, xwezî me bikanîbûya nehatana….
Esas li Swêd, li Norweçê, li Danîmarkayê, li Almanyayê yanî li hemû Ewrûpayê bi hezaran kesên weke Anders Behring Breivik difikirin hene û dixwazin eynî tiştî bikin.
Lê ya baş ew e ku nikanin, çap û zanîna wan têra qetlîameke hewqas mezin nake.
Heger ji destê wan bê ewê bikin.
Lê xwediyên vê îdeolojiyê ne Anders Behring Breivik tenê ye, pir in, bi sedhezaran e.
Dibê hemû misilman û efrîqî bizanin ku ew li Ewrûpayê nayên xwestin, em cuhûyên sedsala 21-ê ne, Ewrûpa dixwaze ji me xelas bibe...
Çend salên din ez dikanim birevim û ezê birevim jî, lê zarokên min ewê çawa bikin, ezê wan kuda bibim?
Ji ber ku ew zarokên vê civatê ne…
Bi tu hawî ew nikanin bindestiya tirkan qebûl bikin, ji wan ra welatekî azad lazim e…
Dibê em kurd vî welatî miheqeq çêkin, ji bo ku em ji Tiriyê û ji Ewrûpayê bikanibin vegerin welatê xwe...
Inga kommentarer:
Skicka en kommentar