Kilîta Parlamentoya Kurdistanê ne wenda ye, di bêrîka hinekan da ye

Salek di ser hilbijartinên Kurdistana Başûr ra derbas bûye, meclîs hîn girtiye, hukûmet ava nabe.

Rûdawê bi manşeteke pir xweş û tam di cî da xeber daye, gotiye:
”Kilîta Parlamentoya Kurdistanê hîn jî winda ye.”
Lê ya rast, kilîta Meclîsa Kurdistanê ne wenda ye, kilîtek di bêrîka Mesûd Barzanî da ye, yek jî di bêrîka Bafil Talabanî da ye. Ew meclîsê venakin. 
Sebeb jî li ser kursîyan û talanê li hev nakin. Heger sebeb ne ev bûya hukûmet ji zû da avakiribûn.

Barzanî dibêje dibê para şêr ya min be, Bafil talabanî dibêje na ez qebûl nakim para şêr tim ji te ra be. Vê carê dibê em wek hev li hev par bikin.

Piştî salekê girtîmana meclîsî ne tenê skandaleke bêemsal e, ji bo serokên PDK´ê jî û yên YNK´ê jî şermeke mezin e.

Lê ne xema wan e, meclîs qet venebe jî ne xema wan e.  Herdu alî jî ji rewşê memnûn in, çimkî çerxa wan digere.

Di vir da sûcê milet jî pir e. Li kîja welatekî din tiştekî wiha bûba miletê serî hilda, tac û kursiyên musebîban tarûmar bikirana. 

Lê  ji ber ku kurd ne tu milet e lema bûne wek keriyê li dû şivên. Şivan berê kerî bide ku, kerî ewê bide dû.

Tiştekî din jî, partiyên Kurdistana Bakur jî li hemberî vê sosiretê qet dengê xwe nakin, serokên PDK´ê û YNK´ê rexne nakin. 

Çimkî yên hev in, merivên hev in. Xurtên PKK´ê ne, tenê PKK´ê û DEM´ê rexne dikin, çavên wan, guhên wan ji PDK´ê û YNK´ê ra kor e kerr e.