Yekîtiya Ewrûpayê bi bertîlkirina tirkan gorra xwe dikole

Serokê Tirkiyê Erdogan do dîsa got ”Hey Yûnanîstan, tu jî deriyên xwe veke û ji bin vî barî xelas bibe.”

Wek tê dîtin mêrik Ewrûpayê bi koçberên xwe tehdît dike, ji Yekîtiya Ewrûpayê xûgiyê dixwaza, ji Yûnanîstanê ra jî dibêje tu jî wek min bike û ji koçberan xelas bibe.

Erdogan erebên Sûriyê di devê xwe da kiriye benîşt. Lê têkiliya kesên tirkan bi şiklekî organîze niqandine û birine ser sînorê Yûnanîstanê bi erebên Sûrî ra tuneye. Ew ne erebên Sûriyê ne.

Erebên Sûrî bi piranî li Tirkiyê û li Kurdistanê bi cî bûne, bûne xwedî mal û kar. 

Gelekên wan bûne hemwelatiyên Tirkiyê. 

Qismê di kampan da jî Yekîtiya Ewrûpayê û Neteweyên Yekgirtî li wan dinêre, debara wan fînase dike.

Ji xwe Erdogan naxwaze erebên Sûriyê ji bin destê xwe derxe, dixwaze wan li rojavayê Kurdistanê bi cî bike. Û ji xwe ji wan bi sedhezaran li Efrînê, li Serêkaniyê, li Girê Sipî û li gelek derên din bi cî kirine. 

Yanî yên îro li ser sînorên Yûnanîstanê ne ne erebên Sûriyê ne, afrîqî ne, afgan in, pakîstanî ne, îranî ne, kafkasî û erebên ji Afrîqa Bakur in. 

Tirkiye ji bo ku ji Yekîtiya Ewrûpayê xûgiyê bigre ji van welatan 2-3 milyona însan anîne Tirkiyê û bi wan bazariyê û tîcaretê dike. 

Yekîtiya Ewrûpayê nikane bi qebûlkirina koçberan dawiyê feqîrên Afrîqayê û Asyayê bîne. Ewrûpa nikane kî hat bigre û ji kesî ra nebêje na. Tiştekî wiha ne mimkûn e. Tirk jî viya zanin. Lê ajandeyeke tirkan ya siyasî heye, ew li dû xûgiyê û piştgiriya Yekîtiya Ewrûpayê ne. Tirk ji Yekîtiya Ewrûpayê ra dibêjin gerek hûn li Sûriyê piştgiriya dagirkeriya me bikin, şerê me, projeyên me yên li Sûriyê û li dijî kurdan fînanse bikin. Heger hûn nekin, emê jî bi milyonan koçberên dinyayê bişînin ser we. Hedîse ev e.
Dibê ewrûpî hedefa  tirkan bibînin, dibê medya Ewrûpa viya binivîse.