Erdogan Emerîka û Ewrûpa kir wek Tirkiyê

Rojnamevanê Emerîkî yê bi nav û deng Seymaur Hersh, di nivîsa xwe ya li ser Sûriyê û Tirkiyê da gotiye li Sûriyê gaza sarîn bi destê Tirkiyê hat bikaranîn û ji ber ku Tirkiye li pişt qetlîamê bû Emerîkayê ser meselê girt.
Min ev xeber îro weşand.
Laleş Qaso, di binê xeberê da li ser bêdengiya Obama û Emerîka ya li hemberî vê qetlîama Tirkiyê şiroveyeke pir balkêş kiriye.
Gotiye, di tarîxa Emerîkayê tu serokekî wek Obama nebûya mezinê Emerîka û ”di tarîxa Natoyê de tu hikûmeta bi qasî a AKPê ku pê li prensîpên Nato, prensîpên partiya Demokrat a Emerîkî û demokrasiya ewrupiyan nekir û AKP dîsa jî li ba hemiyan xwedî cihekî bilind e.”
Bi baweriya min ev tespîta Laleş Qaso rast e, bi rastî jî di dîroka NATOyê da tu welatî bi qasî Tirkiyê û hukûmeta Erdogan NATO rezîl nekir, tu welatî bi qasî Erdogan, Ewrûpa û demokrasiya Ewrûpayê neanî pênc peran.
Û bêyî Mubarek Obama tu serokekî Emerîkayê jî li hemberî sûc û qetlîameke hewqasî mezin wiha bêdeng nemaye.
Ji ber ku Obama him musilman e û him jî reşik e. Lema jî li hemberî tirkan ji binde siyaseteke tirsonek, li gorî dilê Erdogan û li dijî prensîpên demokrasiyê û mafê însanan meşand.
Tiştê Emerîkayê li Îraqê û li hemberî Seddam kir, li hemberî Erdogan û Tirkiyê nekir, ji tirkan ra çavên xwe girt.
Lê ev bêdengiya li hemberî Tirkiyê û Erdogan ji bo Emerîka û demokrasiya wan rûreşîyeke mezin e û dîrok ewê vê yekê binivîse…