Dewlet Hezexê jî wêran dike

Ji hewa helîkopterên şer Hezexê didin ber rokêtan û ji erdê jî tank bajêr topbaran dikin.
Yanî li dewleta tirk li hemberî kurdan şerekî tam, şerekî mezin dimeşîne. Êdî li bajaran jî tankan û helîkopteran bikar tînin.
Ev çend roj in li Hezexê(Îdilê) dewletê qedexeya derketina derve îlan kiriye û ji xwe bajar jî vala bûye. Şer û pevçûnên di navbera hêzên tirk yên îşxalkar û çete û YPSê da bi rengekî bênabên berdewam e.
Hezex ji alî leşkerekî giran yê tirk va hatiye dorpêçkirin û bajêr bênabên topbaran dikin. Nuha jî bi helîkopreteran lê didin.
Ev yek ewê heta ku here ne diyar e, bajarên kurdan yek bi yek tên wêrankirin û bi sedhezaran însan perîşan bûne.
Dibê ev şer nebûya, dibê miletê kurd hewqas zirar nedîta, dibê hewqas bajar nehatana wêrankirin, lê madem ku vana hemû bûn, wê demê jî piştî şer dibê tu tişt wek xwe nemîne, têkiliya dewleta tirk û kurdan wek berê dom neke.
Ev bedel dibê wek Kurdistana rojava û başûr bi xwe ra karekê, qezenkê bîne. Ne ku hewqas malwêranî bi avê da here…

XXX

Em çi bikin jî jiyan ne adil e, mişt derd û kul û êş e, lê dîsa jî ji mirinê baştir e, hêja ye meriv bijî û bibîne.
Heger tu naxwazî jiyan li te bibe dojeh tim bi hêvî be, di rojên herî reş û tarî da jî xwe bêhêvîtiyê himêz neke, tu carî rû nedê…