Xwendin û nivîskarî

Dibêjin nivîskar ji nivîskaran, kitêb ji kitêban derdikve. Gotineke pir rast e, bala me dikşîne ser girîngiya xwendinê. Dibêje bêyî xwendin, bêyî zanîn meriv nabe nivîskar û xuliqandina edebiyateke bedew jî ne mimkûn e.

Civatên xwendin lê kêm be nivîskarên mezin jî jê dernakevin. Sebebê kêmbûna nivîskarên kurmancî ev e, kurd pir kêm dixwînin. Û yên dixwînin jî piranî bi zimanekî din dixwînin.

Meriv bi kîjan zimanî bixwîne dikane bibe nivîskarê wî zimanî. Xwendina bi zimenekî meriv nake nivîskarê zimanekî din. Heger bike jî nake nivîskarekî baş e.

Sala we ya nuh ya 2015a pîroz be!

Gelî dost û hevalên ezîz, piştî çend saetên din em saleke pir bi êş, bi xwîn û mişt liberxwedan li pey xwe dihêlin û derbasî saleke nuh, sala 2015a dibin.
Ez hêvî dikim di sala 2015a da êşa me kêm û tifaqa me xurt bibe, em ji bindestiyê xelas bibin û bigihîjin azadiya xwe.

Dîndar ketine dewsa leşkerên do

Generalê teqawit Aytaç Yalman yê demekê(1990-2004) mejuyê artêşê û di nava dewletê da xwedî giraniyeke mezin bû, di kitêba xwe da hebûna kurdan û dana mafên wan yên kulturî diparêze û dibêje, ”gava dewleta tirk ava bû hewil da gelên li Enedoliyê dijîn bi tirk e. 

Li ba kurdan şert û krîterên qalkirina berhemekê çi ne?

Çapa duyem ya kitêba min bi navê ”Hebû Tunebû, Antolojiya çîrokên zarokan”, îsal di meha gulanê da di nava weşanên weşanxana Rûpelê da derket.

Çapa antolojiyê ya yekem di sala 2008a da li Stockholmê ji alî weşanxaneya Apecê ve hatibû weşandin.

Di çapa yekem da 125 çîrok hebûn û kitêb 353 rûpel bûn. Di çapa duyem da 147 çîrok (xemîşok, mesele) hene û kitêb 410 rûpel in.

Bela sebeb negotine kurmê şîrî heta pîrî

Ajansa ANF dev ji pîşikê xwe yê hertim, ji propagandeya komunîstên tirk bernade. Yanî kurmê şîrî heta pîrî. 

ANFê îro dîsa hevpeyvînek xwedêgiravî li Şengalê bi şervanekî MLKPê (yanî Partiya Maksîst Lenînîst) yê bi navê Yilmaz Ozgur ra kiriye.
Ozgur gotiye heta Şengal rizgar bibe ewê di refên pêşî da şer bikin û ewê ”tu hêzên paşverû nikanibin wan ji wr dûr bixin.”

Sebebê qetla me bêdewletbûna me ye

Îro ji bo me hemû kurdan rojeke reş e, sêemîn salvegera qetlîama Roboskê ye.

Îro em wek milet xemgîn in. Ji ber ku ev sê sal in qatilên 34 zarokên me hîn nehatine girtin û ceza nebûne. 

Û wek min di nivîsa xwe ya do da jî got, heta ku AKP li ser hukum be, heta ku Erdogan serokkomar be qatil ewê neyên girtin. 

Ji qetlîama Roboskî hîn xwîn diherike

Sibe sêemîn salvegera qetlîama Roboskî ye
Di 28ê qanûna pêşî ya sala 2011a da balafirên Tirkiyê yên şer li Roboskî 34 zarokên kurd qetil kirin. 

Di ser qetlîamê ra 3 sal derbas bûn lê hîn jî ne kesên emrê vê qetlîamê dan û ne jî kesên ev zarok bi balafirên şer bombebaran kirin hatine girtin û dadgehkirin. 

Him mîtoman e û him jî megaloman e

Erdogan Dîsa ji xayib, ji pesn peyivîye, gotiye:
”Binêrin, ez ji vir ji hemû dinyayê ra pir vekirî dibêjim, li tu dereke dinyayê medya bi qasî li Tirkiyê ne azad e. Gava ez viya dibêjim ez ji xwe bawer im…”
Yaho tuxtorên qesra serokkomariyê li ku ne, ma radikvin!
Camêr nexweş e haya kesî jê tuneye…
Bi Xwedê mitomanê dinyayê yê herî mezin jî li hemberî efendî nikane devê xwe veke.

Hestên piştî gerekê/seyranekê

Li Stockholma xopan bi derengî be jî sar û sermayê dest pê kir, derve çar derece di binê sifirê da sar e, berfeke zêde tuneye lê belekiyên berfê erd spî kiriye.
Ez û xanim ji gerra îro nuh hatin, em li der û dora golê zêdeyî saetekê geriyan. Zêde kes li derve tunebû. Xwarin û vexwarinên Julê (Noelê)milet ji pertav da xistiye.
Xanimê xwe baş pêça bû, qapûtê wê bi kum bû û lepikê wê jî bi astar. Loma jî sermayê zêde li hukim nedikir.

Beyanên berpirsiyarên PKKê beyanên bêtalih in

Serokwezîrê Îraqê Abadî ji do da ye li Tirkiyê ye. Tirkiye dixwaze têkiliyên xwe û Îraqê yên di dema Malikî da zeîf bûbûn ji nuh ve xurt bike û li hemberî kurdan û PKKê bi Îraqê ra siyaseteke mişterek bimeşîne.

Serokwwzîrê Tirkiyê Davutoglu û Abadî do bi hev ra civîneke çapemeniyê çêkirin.

Serpêhatiya du kewan

Dibêjin di wext û zemanekî da nêçîrvanekî du kew girtin û xistin qefesekê. Û rojê çend caran av û qûtên(êmên) cûr be cûr da ber wan. Herdu kewan demekê tiştek naxwirin û venexwarin, li ber xwe dan.

Lê piştî demekê yekê dev ji liberxwedanê berda  û dest bi xwarinê kir. 

Nêçîrvan di qût(êm) da qet texsîr nedikir, her roj qûtên (êm, xwarin) xweş û babet babet dide ber wan. Qût(êm) bi rastî jî xweş bûn û kewê jî  dixwar û dixwar.

Dîndarên xwe davêjin dexlê edelata "kafiran" !

Li gorî medya tirk dinivîse keça Necmeddîn Erbekan ya mezin Zeynep Erbekan li Emerîkayê bicî bûye.
Xanim naçe li welatekî misilman, mesela li Îranê, li Erebîstana Suûdî, li Kuwêtê, li Pakîstanê ya jî li Umanê yanî li welatekî misilman bicî nabe. 

Ez bi zor xwe radigirim !

Min nuha di telewîzyona Swêd da li xebera li ser jinên kurd yên li Şengalê ji alî bêşerefên erebên Daîşê ve hatine revindin guhdarî kir.
Tiştê ereban û  bêşerefên Daîşê li Şengalê li hemberî miletê kurd kirin sûcekî pir û pir giran e û ebeden nayê jibîrkirin û efûkirin.

Di dîroka me da gelek zulm û neheqî li me hatiye kirin, em gelek caran marûzî koçberiyan û qetlîaman bûne. 

Weleh ev ne tu aqil e

Dema tu li medya PKKê temaşe dike tu dibêjî belkî dehhezar pêşmerge bi çekên giran ne di nava şer da ne, balafirên mitefikan qet li Daîşê nadin, yên şer dikin tenê gerîla ne, Şengal ji alî gerîlayên PYDê, HPGê û PYJê tenê ve hate rizgarkirin û ew tenê li wir şer dikin.
Heger carnan ji mecbûrî bi gotinkê qala pêşmergeyan bikin jî, ew jî pêşmerge tim piştî ku şer diqede yanî dawiya şer tê.

Erdogan piştî 12 salan bi diziya hevalên xwe hesiya

Serokkomarê Tirkiyê Erdogan, di axaftina xwe ya Zanîngeha Gebze ya Teknîkê da hin bêqanûnî, sextekarî û diziyên Cimata Gulen fena ku nuh pê hesiyabe, fena ku nuh zanibe deşîfre kiriye û gotiye:
”Bi perê milet xwendin, bi pereyên di bin navê hîmmetê(alîkariyê) da top kirin xwendin, bi diziya pirsan ketin hin muesese û dezgehên dewletê…”
Fena ku Erdogan piştî 12 salan bi diziya hevalên xwe hesiyabe dipeyive. Diyar e Erdogan xelkê zarok dihesibîne...

Hin kes dev ji fesadiya nabêna PKKê û PDKê bernadin

Di medyaya kurdî da hin kesan provakotorî, fesadî û gelaciya nabêna hin grûbên kurd û bi taybetî jî fesadiya nabêna PKKê û PDKê da ji xwe ra kirine sinet û karekî esasî.

Ji ber ku gerîlayên YPGê û HPGê beşdarî rizgarkirina Şengalê bûne hin kes pê pir nerehet bûne. Loma jî dixwazin vê beşdariya gerîlayên YPGê û HPGê derew derxin. Û heger ew jî ne mimkûn be sivik bikin, wek tiştekî bêqîmet nîşan bidin…

Erdogan dîsa got em qebûl nakin kurd li Sûriyê bibin xwedî maf

Serokkomarê Tirkiyê Erdogan, li hemberî kurdên Kurdistana rojava careke din neyartiya xwe anî zimên û azadbûna kurdan ji bo Tirkiyê wek ”tehdît” bi nav kir.
Erdogan got, ” Bi riya yekkirina hersê kantonan dikanin statuyeke nuh ava bikin. Ev ji bo welatê min gelş û gefek, tehdîdeke. Em nikanin viya nebînin…”
Mêrik pir vekirî dibêje, dibê li Sûriyê kurd ji bindestiyê dernekevin, azadbûna kurdan, bidestxistina statueyekê ji Tirkiyê tehdît e û em qebûl nakin kurd bibin xwedî maf.
Dijminatiyeke ji viya mezintir nabe…
Kesê li welatekî din azadî û statuyeke kurdan li hemberî xwe tehdît bibîne, qebûl neke ku kurd li welatekî din jî bibin xwedî maf û desthilat ne mimkûn e li welatê xwe mafê kurdan bide û qebûl bike kurd bibin desthilat! Ev ne mimkûn e.
Heger bi rastî jî nête Erdogan û çareserkirina mesela kurd hebûya hwqasî neyartiya kurdên Kurdistana rojava nedikir û nedigot xwedîstatubûna wan, yekîtiya kantonan ji bo Tirkiyê tehdît e.
Hema ev beyana Erdogan tenê nîşan dide ku ew li Tirkiyê tu mafekî qanûnî nade kurdan, tu nêteke wî ya wiha tuneye.
Têkiliyên bi Ocalan ra ji bo xapandinê û qezenckirina wextê ye. Dixwazin bi taktîk û manawrayên wiha careke din rayên kurdan bigrin û vê hilbijartina pêş me jî bi selametî derbas bikin. Dû ra jî ewê bi bahaneyekê dawî bidin hevdîtinên xapandinê û her kesê here mala xwe.
Loma jî dibê meriv van gotinên Erdogan yên derbarê Kurdistana rojava da pir cidî bigre û bi gotin û sozên vala nexape.

XXX
Bi razgarkirina Şengalê pêşmergeyan hemû kurd pir dilşad kirin û "julklapek", diyariyeke Noelê ya herî giranbuha jî dan Emerîka û ewrûpiyan jî.

Êdî dor hatiye rizgarkirina Kurdistanê

Li gorî xeberên ji nava şer tên pêşmerge, HPG, YJA yanî egîd û şervanên kurdan bi hev ra li başûr gav bi gav gund û bajarên di bin îşxala Daîşê da bûn rizgar dikin û nêzî rizgarkirina Şengalê dibin. 

Ez wer bawer dikim di çend rojên pêşda Şengal jî ewê bi temamî ji qatil û çeteyên Daîşê were paqijkirin û hemû axa Kurdistanê ewê têkeve bin destê kurdan.

Cemîl Bayik: Emerîka mitefikê me ye

Serokê KCKê Cemîl Bayik, di beyana xwe ya rojnameya alman Die Zeitê da di warê siyasî da hin tiştên pir muhîm gotione.
Bayik, derbarê hevkariya Tirkiyê û Daîşê da gotiye, ”Xelîfeyê Daîşê ne El Bexdadî ye, Erdoga e….”
Heger ne ”xelîfe be jî bi baweriya min jî heval û aqilmendê El Bexdadî û Daîşê yê herî nêz û herî mezin e.

Jo Biden: Hûn hêviya hemû cîhana azad in

Cîgirî serokê Dewletên Yekbûyî yên Emerîka (DYE)Joe Biden, bi telefonê bi serokê Kurdistanê Mesûd Barzanî ra peyivî û got:
“Li hemberî terorê hûn hêviya hemû cîhana azad in û ji ber vê yekê jî alîkariya koalîsyona navnetewî ewê berdewam be.”
Biden, herwisa ji ber şer û serketinên hêzên pêşmerge li hemberî Daîşê jî spasiya xwe aniye zimên û gotiye alîkariya Emerîka ya bi Kurdistanê ra ewê berdewam be.

Neheq zû dereng bela xwe dibîne

Ez dixwazim îşev jî bi çîrokeke Harûn Reşîd dest bi nivîsa xwe bikim. Çîrokên Harûn Reşîd him pi xweş in û him jî mişt mane û ders in.

Dibêjin Xelîfe Harûn Reşîd ji guleke baxçeyê xwe gelkî hez dikir. Baş temî li baxçevanê xwe kiribû ku ew wek roniya çavên xwe li wê gulê miqate be.

Çima hin kurdên dîndar dibin neyarên qewmê xwe?

Wezîrê Diyanetê yê herêma Kurdistanê Kemal Muslim, ji telewîzyona Rûdawê ra gotiye 48 karmendên wezareta wan tevî DAIŞê bûne.
Meriv naxwaze bawer bike lê çi heyf ku rast e. Îslamiyetê qismekî zarokên me kiriye neyarên qewmê xwe.
Dîndarên tirk, faris û ereb ne bes bûn, yên kurd jî lê zêde bûn, wan jî rahîştine çekên xwe û dest bi şerê li dijî kurdan kirine.
Tu dibêjî qey ev dînê îslamê li hemberî me kurdan çê bûye, ji bo ku me bindest bihêle, ji bo ku me bi çete û qatilên îslamîst û zarokên me bide kuştin çê bûye. Îdeolojiya îslamî zarokên me kirine neyar û qatilên qewmê xwe, qatilên dê û bavên xwe.
Tiştekî dûrî aqilan e, meriv nikane bawer bike….
Bêyî dîndarên kurdan tu kes li dijî qewmê xwe şer nake, tenê îslamîstên kurd rahîştine çekên xwe bi ereb û tirkan ra gelê xwe qetil dikin, serê birayên xwe jê dikin, bi çeteyên biyanî ra tecawizî xwişk û dayikên xwe dikin. Bi neyarên xwe gelê xwe mecbûrî bindestiyê û koçberiyê dikin, dibêjin gerek hûn wek tirk, ereb û farisan azad nebin, nebin xwedî dewlet.
Çima hin kurdên dîndar dibin neyar û qatilên qewmê xwe? Dibê meriv li ser vê gelşê bifikire û serê xwe pê ra biêşîne. Dibê siyasetmedar, alimên dînî, sosyolog û psîkolog bersîva vê pirsê bidin.

XXX

Dema totik vala be netîce zilamtiya xelkê ye
Kurdên Kurdistana bakur pir rehet ji xelkê bawer dikin, pir rehet dibin murîdên îdeolojiyên biyanî û merivên xelkê. Pir rehet xwe ji bo xelkê dirûçikînin, pir rehet ji bo xelkê digrîn û li serê xwe dixin.
Pir rehet ji xelkê bawer dikin. Ji ber ku bêşiûr in, ji ber ku ji dîroka xwe bêpar in. Ji ber ku hestên wan yê netewî zeîf e. Loma jî zû û rehet dikevin bin tesîra xelkê.
Tirkek, erebek, fariske tu carî wek kurdekî rehet nakeve bin tesîra fikrekî, îdeolojiyekê, wek kurdekî rehet nabe meriv û şûrkêşê xelkê. Lê kurd dibin.
Ji ber ku totik vala ye, loma jî kî çi têxê, kî çi bidê tavilê qebûl dike û dikeve bin tesîra wî. Çimkî serî wek tûrê vala ye, kî çi têxê wiya dixwe…
Loma jî bi rehetî dibin piştgir û hevalên filistîniyan, îslamîstan, rast û çepan. Loma jî pir bi rehetî dibin propagandîstên ermeniyan, asûrî û suryaniyan. Welhasil bi rehetî dibin merivên her kesî, lê pir kêm dibin merivên qewmê xwe û doza xwe.

XXX
Rejîma melayên Îranê bi rengekî bênabên kurdan qetil dike, roj tuneye ku 2-3 kurdî îdam nekin. Di zindanên Îranê da 45 kurd di bin tahlûkeya îdamê na. Heger kurd û dinya reaksiyoneke xurt nîşan nedin melayên xwînxawar û faşîst ewê wan jî îdam bike.
Dibê gelê kurd li herderê vê barbariya Komara Îslamî şermezar bike ü azadiya hemû girtiyên kurd bixwaze.
Li alî din dibê hukûmeta Kurdistanê jî ji bo azadkirina hemû kurdên di zindanên Îranê da bixebete û çi ji destan tê bi lez bike.
Bimbre Komara Îslamî, rejîma qatil û xwînxwar!
Bijî azadî û serxwebûna Kurdistanê!
Bijî têkoşîna miletê kurd ya li dijî rejîma melayên faşîst….

Sûcdarên qetlîama eremeniya ne kurd in, dewleta tirk e

Serokê belediya bajarê Mêrdînê Ahmet Turk li Stockholmê di konferansekê da li ser qetlîama 1915a ya ermeniyan peyivîye û ji ermeniyan, asûrî-suryaniyan li ser navê ”bav û kalên” xwe lêborîn xwestiye, gotiye hin eşîrên kurd jî di qetlîama ermeniyan da hatin bikaranîn.

Ahmet turk ev ne cara pêşî ye ji ermenî, asurî û suryaniyan lêborînê dixwaze. Berê jî çend caran eynî tişt dubare kiriye.

Yaho ev dil jî qet pîr nabe...

Yaho bi rastî jî dil cara kal nabe. Ne guh dide pişta qulûzî û ne jî por û riya spî, wek xortekî 20 salî tim dilbijok û çavbirçî ye. Yanî pir bêar e...
Xwedê kir ku aqil nahêle zêde bi pêşda here û di nava xelk û alemê da xwe bike pêkenîn. Efendî eynî wek salên xortaniyê viya û wiya dixwaze, dixwaze viya û wiya bike, lê ez guh nadimê û jê ra dibêjim, ”dema heliz borî ez benî…”

Em bi qasî tirkmen û suryaniyan jî nabin

Li Kurdistana başûr li gel kurdî û erebî, tirkmenî, suryanî û ermenkî jî bûn zimanên resmî. Berdevkê Parlamentoya Kurdistanê Tariq Cewher ji Rûdawê ra gotiye serokê Kurdistanê Mesûd Barzanî qanûna zimanên resmî îro îmze kir. 

Û êdî li Kurdistanê tirkmenî, suryanî û ermenkî jî wekû kurdî û erebî zimanên resmî ne.

Hilbijartina jiyaneka çawa di destê meriv da ye

Kes nizane ewê kînga û çawa bimre, di vî warî da meriv ne xwedî biryar e û nikane hilbijartinekê bike. Mirin tê, kînga dilê wê bixwaze ya jî bi gotineke din dema ku roja meriv temam bû.
Lê derbarê jiyanê da, derbarê jiyaneke çawa da meriv dikane tercîhekê, hilbijartinekê bike. Loma kurd dibêjin çê kiro bi xwe kiro, xerab kiro bi xwe kiro. Ji ber ku şiklê jiyana meriv, hevalên meriv, bîr û baweriyên meriv netîceyên tercîhekê ye.

Edalet! Edalet Edalet!

Rojekê merivê dilpak û weliyê Xwedê yê bi nav û deng Behlûl Dana û Xalîfe Harûnê Reşîd bi rê da rastî hev tên. Xelîfe Harûnê Reşîd bi hurmet ji Behlûl Dana ra dibêje:
-Behlûlê hêja, tu wiha ji ku tê?
Behlûl dibêje:
-Ez ji Cehenemê(dojehê)têm.

Emerîkayê mohra xwe ya bêbextiyê ji ser kurdan rakir

Kongreya Emerîka, PDK û YNK ji lîsteya ”organîzasyonên terorîs” derxistiye. Tiştekî baş e û meriv wek kurd pê kêfxweş dibe.

Lê li alî din jî hebûna navên PDKê û YNKê di lîsteya organîzasyonên terorîst da skandal e û li hemberî miletê kurd, PDK û YNKê bêexlaqî û bêbextiyeke mezin e.

---

Serokê PDKê Mesûd Barzanî ev yanzde sal in serokkomarê Kurdistanê û Mam Celal jî serokkomarê Îraqê bû. Û ev herdu lîder jî di nezda Kongreya Emerîka da serokên du partiyên terorîst bûn.
Xurt bêbext û zalim in !
YNKê û PDKê di dîroka xwe da tu tiştekî ku bibe sebebê ew têkevin vê lîsteya ”terorîstan” nekirine. Ev yek.
Ya din ji sala ji sala 1991ê û virda ye têkiliya Emerîka li Îraqê di mestewake bilind da bi kurdan ra heye. Ev 11 sal in kurd nîvdewlet in û her roj bi berpirsiyarên Emerîka ra rûdinin.
Serokê Kurdistanê Mesûd Barzanî û Talabanî heta nuha çendîn car li Qesra Spî bi serokên Emerîkayê ra rûniştine.
Yanî bi kêmanî ev deh sal in têkiliyên dêplomatîk di nabêna Kurdistana Federe û Emerîka da heye.
Lê Emerîkayê heta nuha jî navê PDKê û YNKê ji ”lîsteya terorîstan” dernexistiye. Jixwe carê hebûna navê wan di lîsteyeke wiha da bêbextiyeke mezin e.
Ez hêvî dikim ku li pey vê biryarê dor were PKKê jî, di demekekin da PKKê jî ji lîsteyê derxin.
Lê ev hewqasî ne hêsa ye. Ji ber ku emerîkiyan PKK belaş nexistin wê lîsteyê, miheqeq ji Tirkiyê bedelkekî wê girtin. Ji bo ku ”mohra terorîstiyê” ji ser PKKê ranebe Tirkiye amadeye bedelekî mezin bide Emerîka û ewê bide jî.
Loma jî heta ku di ”terorîstiya” PKKê da pere û qezenc hebe Emerîka û gelek welatên Ewrûpa ewê vê mohrê li ser PKKê ranekin. Lê roja kar tê nema, roja Tirkiyê ji bo vê mohrê bertîl neda, a wê çaxê ewê bi demagojiya DEMOKRASIYÊ vê mohrê rakin….
Pere kevir nerm dike...

 

XXX

Sînorê hin tiştan dikane hebe, lê yê nefretê û hezkirinê tuneye. Sînorê tirsonekiyê û yê mêraniyê jî tuneye. Sînorê bêxîretiyê û xîretê jî tuneye. Sînorê bênamûsiyê û yê binamûsbûnê jî tuneye.
Loma jî meriv nikane ji yekî gazin bike, bibêje, yaho çawa ev xiyanet, ev bênamûsî kir?
Dibe, benîadem dikane her başêyê û her xerabiyê, her mêraniyê û her îxanet û bênamûsiyê bike...

XXX

Dîrok û serpêhatiya kurdên Xorasanê.
Gelek kurd nizanin ev 500 sal in li Xorasanê kurd hene. Esas di vî warî da gelek nivîs hene. Nufûsa wan li dora 1, 7 milyon e û bi kurmancî dipeyivin, şîene.
Hin kurdên wek Kilçdaroglu heramzade koka xwe digihînin Xorasanê ji bo ku xwe ji kurdayetiyê bişon. Lê ji bîr dikin ku piştî şerê Çaldiranê bi hezaran kurd li Xorasanê hatin biçîkirin ji bo ku rê li ber êrîşên Ozbekan bigrin. Fermo li vê vîdeoya hêja temaşe bikin û piçekî kurdên Xorasanê û dîroka wan nas bikin.

 

XXX
Hevaltiya kûçikan heta meriv hestiyekî bavêje nabêna wan.
///Hz. Mewlane 

XXX
Li vê dinyayê bi milyonan însan di jiyana xwe da bêyî ku kitêbekê bixwînin dimrin. A ev dinya hewqasî ne adil e...

Gelo edebiyata me jî bi civata me ra guherî?

Evîn û guhertinên, serobinbûnên civakî û kulturî ji mijarên edebiyatê yên serekî ne. 

Em dizanin di van 30 salên dawî da li Kurdistana bakur di warê civakî û kulturî da guhertinên pir mezin çêbûne. 

Di civatê da gelek têkiliyên nuh peyda bûne. Jin ji hundur, ji ber kulînê derketine û daketina qada siyasî û di civatê da bûne xwedî gotin.

Di bindestiya kurdan da bi qasî dewleta tirk kurdên hevalbendên dewletê û AKPê jî sûcdar in.

Di bindestiya kurdan da  kurdên hevalbendên dewletê û AKPê jî sûcdar in.
Heger kudan piştgirî nedana AKPê û nebûna parlamenterên wê û hemûyan doza mafê xwe, doza dewletekê bikira nuha Kurdistan çêbûbû. Ev hêza kurd di praktîkê da ji leşkerên dewletê jî xerabtir e. 

Dewleta tirk bi bêdilî navê PAKê qebûl kir

Wezareta Karûbarên Hundur ya Tirkiyê dawiya dawî ne ji dil be jî miracaeta Partiya Azadiya Kurdistanê(PAKê)qebûl kir û belgeya girtina miraceta partiyê da berpirsiyarên PAKê.
Ser xêrê be û çavê hemû endam û berpirsiyaran ronî be. Bi vê qebûlkirinê tabuya navê Kurdistanê jî hêdî hêdî tê şikandin. Pêşketineke pir baş e.

Hemû jî şîrheram in

Engîn Ardiç ji Selahedîn Demirtaş ra gotiye ” Demirtaş dixure”! Yanî canê wî dîsa heqaretê û lêdanê dixwaze.
Ardiç çepekî kevn e, lê nuha paşmêr û şûrkêşekî Erdogan yê devbixwîn e. Ji Erdogan û hukûmeta AKPê ra şelafiyê(nangenimiyê) neke ewê ji nanê xwe bibe.

Hedefa îcar xort in

Ev demeke dewlet li Kurdistanê bi bahaneya bûyerên di meş û protestoyên ji bo piştgiriya Kobanê qewimîn rojê bi dehan keç û xortên kurd digrin. Heta nuha bi sedan xort girtine û tewqîf kirine. Bi taybetî jî li bajarên tevgera kurd lê xurt e van operasyon û girtinan dikin. Dixwazin hêza netewî, HDPê, PKKê û alîgirên wan li wan bajaran ji hêzda bixînin.

Tirkiye welatê dewşirmeyan*

Bekir Coşkun li ser Dewleta Osmanî û zimnê ”osmanî” nivîseke pir xweş nivîsî ye. Wek tê zanîn hukûmeta AKPê dixwaze zimanê osmanî yanî tirkiya kevn bike zimanê perwerdê yê mecbûrî.
Coşkun dibêje Osmanî ne ”ecdad mecdad ”ên tirkan e. Û Dewleta Osmanî jî ne dewleteke tirk e. Ji xwe padîşahên Osmaniyan tirk nedigirtin serayê.

Bi vê giraniyê êdî siyaset nabe

Heta nuha me bi giranî siyaset ji bo liberxwedanê, ji bo xweparastinê û wendanebûnê dikir. Me hewil dida em neqedin û li ser nigan bimînin.
Lê êdî me ew merhele li pey xwe hîştiye, dibê êdî em siyasetê ji bo biserketinê û qezenckirinê bikin. Dibê hedef û daxwazên me yên siyasî vekirî û zelal bin.

Dîtina xortekî li ser pêşeroja PAKê

Li Diyarbekrê di civîneke PAKê da lawê hevalekî bi henek ji bavê xwe ra gotiye:
-Bavo ev partiya we 5 salên din ewê were girtin.
Bavê gotiye, ”Çima?”
Lêwik gotiye:

Li ser fîlmê Bêkes

Min û xanimê nuha di telewîzyonê da li fîlmê Karzan Kader ”Bêkes”temaşe kir.
Lawikê me Rojen fîlm ji înternetê daxist, bi telewîzyonê ve girê da. Bû wek fîlmekî normal. Fîlmekî pir xweş bû.
Bûyerên film di destpêka 1990î da di dema rejîma Seddam da derbas dibe. Du birayên zarokên sêwî û bêkes(7 salî û 10 salî) di qulika xaniyê sînemayê ra li fîlmê ”Superman” temeşe dikin, dibin heyranê hêz û edelata Superman.
Û biryarê didin ku herdu bi hev ra herin Emerîka, ba Superman ji bo ku Superman were Seddam û hemû leşkerên wî bikuje û dê û bavê wan paşda li wan vegerîne.
Ji bo ku xwe bigihînin Emerîkayê ji wan ra pasaport û pere lazim e. Lê ne pere û ne jî pasaporta wan heye.
Lawikê biçûk(7 salî ye)di gulelîstikê(xarlîstikê) da kerekê ji zarokekî din dibe, lê bavê zarok lê dixe û kerê xwe ji wan distîne. Dû ra kerê ji mêrik dikirin û bi xerîteya dinyayê dikevin riya Emerîkayê. Bi rê da gelek îş tên serê wan, gelek zulm li wan dibe.
Rejîsorê fîlm Karzan Kader e. Karzan Kader li Kurdistana başûr di dema rejîma Seddam Husên da serpêhatiya du birayên biçûk bi hostayî, bi dilekî mezin û bi germayiyekî însanî taswîr dike.

2014-12-06

XXX

Ez bi zêr bim herkesê buhayê min bizanibe. Bira ez bi hesinekî basît bim, buhayê min tenê yê fêm dike bizane.
///Şemsî Tebrîzî

XXX

Têkoşîna ji bo Kurdistaneke serbixwe ji aqil bêtir îşê dil e, tirsonek serê wî kûpê aqil be jî di nîvê rê da dev ji têkoşînê ber dide û refê xwe diguhere.

Micadeleya azadiyê bê rîsk nabe

Hûn dizanin kûsî tenê çaxa serê xwe ji qêlik derdixe û tahlûkê digre çavê xwe dikane bi pêşda here.
Rewşa me kurdan jî teqrîben dişibe ya kûsî. Ancax dema em diwêrin rîskê bigrin, yanî tahlûkê bigrin çavê xwe dikanin bi pêşda herin, hin mafan bidest xin û di rojên pêşda bibin xwedî welat û dewlet. Yanî bêyî rîsk, bêyî bedel ne em azad dibin û ne jî Kurdistan. Jiyan bi xwe bi rîsk e.
Xwezî ne wiha bûya, lê wiha ye...

Hin kes ji tembelên Bexdayê jî tembeltir in lê zimanê wan dîsa jî hirinekê dirêj e

Hin kes ji tembelên bexdayê jî tembeltir in, di 50-60 salên jiyana xwe da 31 herfên kurdî rindikî fêr nebûne lê dîsa jî zimanê wan hirinekê dirêj e û xelkê jî naecibînin, bi kar û xebata kesên wek mûriyan(gêrikan)dixebitin nayên serî, heta bêqîmet dibînin.

Weleh sibe dîsa rêwî me

Weleh ruyê min nagre ji we ra bibêjim lê veşartin jî ne rast e, dibê ez rastiyê ji we ra bibêjim. Sibe bi hevalên kar ra em dîsa diherin konferanseke du rojan.
Emê îcar jî herin bajarê Trosa. Carê em diçin derekê, bajarekî.
Hûn dizanin hertim eynî der nabe, dibê hercarê bajarekî cihê, hawirdoreke cihê, xwezayeke cihê be.

Medeniyet ne bi forta ye

Piştî ku serokkomar Erdogan got, ”musilmanan Emerîka kişif kir”, nuha jî wezîrê ilim Fikrî Işik hinekî din jî bi pêşda çû û wî jî bombeyek nuh teqand, got ”giloveriya dinyayê musilmanan dît.”
Madem musilman di ilim û zanînê da hewqasî pêşketî û medenî ne, Emerîka kişif kirine û giloveriya dinyayê dîtine, çima hîn weke qesaban serê hev jê dikin?
Çima neyartiya 1500 salî hîn bi hev ra dajon?
Çima nahêlin jin çavên xwe ji binê çarşefa reş derxin?
Çima piraniya miletên musilman ji birçîninan dimrin?
Çima bi hezaran mirinê digrin çavên xwe û bi gemiyan berên xwe didin Ewrûpayê?
Çima li her welatekî Ewrûpayê bi milyonan musilman hene?,
Çima li welatekî musilman bi milyonan Ewrûpî tunene?
Çima miletên musilman di ilim û teknîk da paşdemayê dinyayê ne?
Çima li welatekî musilman azadî û demkrasî tuneye?
Çima hemû welatên îslamî wek mîza devêtim bi paşda diherin?
Musilmanan Emerîka kişif kiriye, wam gotiye dinya gilover e, gotinên vala û bêmane ne. Hûn li sifra hazir binêrin, problema dinyayê ya herî mezin îro Îslam û miletên musilman in. Musilman paşdamayî ne, birçî ne û wek gurên har hevûdu dixwin, serê hev jê dikin.
Di nava miletên pêşketî û medenî da tevgereke wek Daîşê hov û qatil dernakeve.
Di nava miletên pêşketî û medenî da bi hezaran celadên bi kêfxweşî, li ser navê dîn seriyan jêdikin nayên dîtin.
Pêşketin, zanîn, medeniyet ne bi fortan e…
Musilman hewqasî paşdemayî û rebin in ku hîn nizanin çiqasî perîşan û rebin in. Heger ne wisa bûya Erdogan û Fikrî Işik fortên wiha beradayî nedidan xwe…

XXX

Tiştê meriv nexwaze, ji xwe ra neke hedef meriv xeyal jî nake. Kurd bi kêmasî ev dused sal in dewleteke kurd, Kurdistaneke serbixwe xeyal dikin û ji bo wê jî xwîna xwe diherikînin.
Ev xeyala kurdan ya sedsalan ewê bi rast bigere. Heger bi hin derew û ”sedeqeyên” tirkan nexap in dîtina wê rojê hindik maye…

XXX

-Ne ku însanek dikane çi bide te, ji bo te dikane dev ji çi berde girîng e…

XXX

-Jiyan dişibe ava di qedeheke derizî da. Tu vexwe jî ewê biqede, tu venexwe jî. Ji bo wê jî kêfa jiyanê derxe. Çimkî tu bijî jî ewê biqede, tu nejî jî.

Tewfîk Fîkret

XXX

-Çûk ji şikestina çiqilê dara li ser veniştiye natirse, ji ber ku ne bi çiqilê darê, bi baskên xwe bawer e.

Gunehê dijmin bi meriv nayê

Îbrahîm Guçlu, di nivîsa xwe ya dawî da ji şiklê dûrxistina xwe ya ji TRT6ê, ji programa ”Rojeva Herêmê” gazinan dike, dibêje bêyî ku em werin agahdarkirin, bêyî ku sebebê dûrxistina me ji me ra were gotin dawî dan karê me û bi hin kesên din ra dest bi programeke nuh kirin.

Guçlu, vê şêla TRT6ê ”medenî, vekirî û şefaf” nabîne, jê gazina dike û dixwaze kesên nuh destpêkirine jî sebebê vê serpêhatiya wî fêr bibin û dersê jê bigrin.

Di şerê Kobanê da Tirkiye taktîkê diguhere

Li gorî xeberên medya sosyal, çeteyên Daîşê vêsê zû êrîşî ser deriyê Murşîdpinarê kirin û derî ji leşkerên tirk girtin. Yanî derî ji aliyê Tirkiyê, bakur ve ketiye destê çeteyên Daîşê. Lê aliyê rojava jî di destê gerîlayên YPGê da ye.
Dîsa ji aliyê Tirkiyê ve erebeyek tije bombe derbasî Kobanê bûye û çalakiyek întîxarî pêkanîne. Waliyê Rihayê jî derbasbûna erebê qebê qebûl kiriye.
Bi dîtina min girtina deriyê Murşîdpinarê ji alî Tirkiyê ve bi zorê vir e, miheqeq Tirkiyê derî teslîmî çeteyên Daîşê kir. Tirkiye bi xwe teslîm neke, Daîş nikane derî bi zor ji tirkan bigre.
Heger xeber hemû rast bin, yanî heger bi r astî jî ji aliyê Tirkiyê ve derî ketibe bin destê Daşîê, ev tê wê maneyê ku Tirkiye taktîk guherand û êdî eşkere û hîn aktîvtir bi Daîşê ra şerê kurdan dike.
Ji bo ku ji alî bakur da ya nî ji alî Tirkiyê da rê li Kobanê bigre derî teslîmî Daîşê kir. Ya na girtina derî îşxala axa Tirkiyê ye, dibê Tirkiyê bersîv bida Daîşê.
Di saetên pêş da ewê rewş zelaltir bibe. Lê dibê em baş bizanibin tiliya Tirkiyê di vî îşî da heye.

XXX
Serokê MHPê Devlet Bahçeliyê devşîrme di bin çembera grûbek faşîtên ji derve hatibûn û bi hezaran pûlisî da ket Dêrsimê û bi vê yekê jî mêraniya xwe nîşanî kurdan da. Bahçelî, li ber bîneya walî ji dêrsimî û kurdan ra got, ”bûyerên 1937-1938 îsyan bû û kesên tevî vê îsyanê bûn jî terorîstên cudaxwaz bûn.”
Ji bo vê heqaretê ne hewceyî hewqas rê û careke din îşxala Dêrsimê bû. Em dizanin her kurdê bindestiyê û xulamtiya tirkan qebûl neke li gorî dewletê û faştîstên wek te ”terorîst” e.
Pir nemaye, belkî jî ev cara dawî ye Bahçelî û faşîstên wek wî bikanibin herin Dêrsimê.

Ma ez kîjanê bibêjim ku

Xoce Nesredîn rojekê dîsa kerê xwe yê meşhür biriya mazatê û xwestiye ji derdë wî xelas bibe.
Cambazek hatiye, li dora ker çûye hatiye, vir da wê da lê mêzekiriye û ji Xoce ra gotiye:
-Xoce, ma tu kêmasî û qusûreke kerê te heye?
Xoce devë xwe kiriye guhê ker û gotiye:
-De ka bibêje ez kîjan qusûra te bibêjim mêro!
Rewşa serokkomarê Tirkiyê Erdogan jî dişibe vê mesela kerê Nesredîn xoce, meriv êdî nizane qala kîjan qusûr û zirzopiyên wî bike.
Do di kongereyekê da efendî xwedêgiravî xwestiye pesnê esnaf û senetkaran bide. Lê berbatî çêkiriye, wiha gotiye:
”Di medeniyeta me da, di ruhê me yê millî û medenî da esnaf û sinetkar dema hewce be leşker e, alperan e, şehîd e, gazî ye, qehreman e. Dema hewce be polîs e û esayişê tesîd dike, hakim e, hekem e, bekçiyê mehelê ye….”
Nuha de werin vî kerî di vî buhurî ra derbas kin!
Li hemberî axaftineke wiha berradayî, cahîlane û hewqasî faşîzan, ji serî heta dawî gotinên nîjadperest meriv nizane çi bibêje…
Axaftineke wiha bêmistewa û faşîzan ancax siyasetmedarekî tirk dikane bike.

Hukûmet dixwaze bi TRT6 hin kurdan bi xwe ve girê bide

Mesrefên TRT6ê ji ”butçeya bi dizî” yanî ji ”gizli odenek”a dewletê tê dayin

Min heta nuha nizanîbû meserefên kanala TRT6ê, meaşên xebetkarên wê ji ”butçeya bi dizî”, ”butçeya sergirtî”, bi tirkî jê ra dibêjin ”gîzlî odenek, ortulu odenek”ê tê dayin.
Tiştekî pir xerab û kirêt e.
Ji Swêd keçeke bi navê Yekbûn Alp*, di nama xwe ya ji berpirsiyarên TRT6ê ra, pêşniyara xebata di TRT6ê da red kiriye û gotiye, dezgeheke girêdayî serokwezîr be û mesrefên wê jî ji butçeya sergirtî(gizli odenekê) were dayin nikane weşaneke azad bike. Û ji bo ku ew di TRT6ê da kar bike dibê ew di nava xefletekê, buhraneke psîkolojîk da be.
Bi kurtî Yekbûn Alpê, teklîfa TRT6ê ya xebatê bi şîdet û bi gotinên giran red kiriye û di eynî wextê da qala vê butçeya sergirtî kiriye. Gotiye TRT6 ji ”butçeya sergirtî” tê fînansekirin.
Ev butçeya ”sergirtî” di bin destê serokwezîr da ye, bi destûr û emrê wî ji bo karên bi dizî, karên nelirê, karên îstîxbaratê yanî ji bo karên dewletê yên bêqanûnî tê bikaranîn. Bi zimanê osmanî jê ra ”tahsisatimesture” tê gotin.
Dewletê di dema serokwezîrtiya Tansu Çîlerê da bi vê ”butçeya sergirtî” (gizli odenekê) bi sedan qatil kirê kirin û bi hezaran kurd dan kuştin. Ez bawer dikim îro jî ne bi qasî dema Çîlerê be jî lê dewlet dîsa jî vê ”gizli odenekê” bi piranî li hemberî kurdan, di karê îstîxbaratî û kirinî merivan da bikartîne
A hin serok û kadirên kurdan yên berê bi meaş û pereyên ji vê ”butçeya sergirtî” tê dayin di TRT6ê da dixebitin û programan çêdikin, meaşên xwe ji vê "gizli odenek"adewletêê ya bi destûra Erdogan tê dayin digrin....

*Yekbûn Alp keçeke kurd e, di nava partiya çep da aktîf e.

Bersîva xwendevanekî:
Birayê A.B…, di her dezgeha dewletê da helbet kurdên baş, kurdperwer û yên di halê xwe da, yên xerab hene. Rexneya min ne li her kurdê di TRT6ê da dixebite. Rexneya min li hin kesên berê serok û kadirên partiyan bû, Kurdistana serbixwe hedefa wan bû. Bi dîtina min kesên wiha dibê tenezulî karekî wiha nekin û nekirana.
Min berê jî çend caran li ser TRT6ê nivîsî ye û ev mesele diyar kiriye. Yanî ez nabêjim bira tu kurd di TRT6ê da nexebite. Lê ez xebata hin kurdan şaş û eyb dibînim.
Mesele nuha ez werim di TRT6ê bixebitim pir eyb e. Lê TRT6 û doktorî jî ne wek hev ve. Dibê meriv viya jî bizanibe..
Ya din îdîa ”butçeya sergirtî” ye. Heger ev îdîa rast be pir xerab e. Ji ber ku ev butçe ji bo hin karên bi dizî, nelirê, bêqanûnî tê bikaranîn. TRT6, dezgehek resmî ye, cima ewê butçeya wê ji ”butçeya sergirtî”, ”gizlî odenekê” were dayin?
Gelo hemû TRT ji ”butçeya sergirtî” (gizlî odenekê)tê fînansekirin ya jî TRT6 bi tenê? Heger TRT6 tenê bi pereyên ji ”butçeya sergirtî” tê fînansekirin ji bo çi ? Dibê hûn viya ji berpirsiayran bipirsin.

Sûcê gayê pîr e

Hukûmetê yasaxa weşanê daniye ser xeberên diziya çar wezîran. Yanî ji nuha û pêda medya ewê nikanibe qala diziya 4 wezîrên îstîfa kiribûn(Muammer Guler, Zafer Çaglayan, Egemen Bagış, Erdogan Bayraktar)bike.
Helbet ewê minaqeşeyê yasax bikin, ma qey ewê bihêlin herkes li ser diziya wan binivîse û bipeyive?
Ma çima diz dîn in?
Lê sûc ne yê van ”golikan” e, sûc ji gayê mezin, gayê pîr da ye. Yanî ji serokê wan da ye, serokê wan rê nîşanî wan da.
Çîroka gê û golik meşhûr e.

Dibêjin golikê sofî ji êxur reviya û tiştek di bîstên da nehîşt. Hemû lem û sebze tevlihev kir, yên xwar û yên pelixand.
Sofî gava dît golik ketiye bîstên dîn bû, rahîşt sêwanekî û çû di êxur da bi daran bi gê ket. Milet jê ra got:
- Sofî, ma çi sûçê gê heye?, yê ketiye bîstên golik e.
Sofî got:
-Çawa sûcê gê tuneye? Hemû sûc yê gê ye. Heger baş terbiye kiribûya golik ev îş nedikir.

XXX

Erdogan: wekheviya jin û mêr ne mimkûn e
Serokkomarê Tirkiyê Erdogan, derbarê wekheviya jin û mêr da dîsa çend gotinên pir wecîz(!)kirine. Erdogan gotiye:
”Jin û mêr nabe wek hev bin. Dînê me Îslamê rola jinê wek dayiktiyê tespît kiriye. Carnan dibêjin wekheviya jin û mêr. Hûn nikanin jin û mêr bînin dereceyeke wekhev, ew tersê fitratê(xuliqandinê)ye. Tebîeta wan, bunya wan, fitrata wan cihê ye. Dînê me meqamek daye jinê, meqamê dayiktiyê…”
Xwedê kir ku ev merivê zirzop, paşdamayî, ji medeniyetê bêpar, xwediyê dîtin û fikrên serdema navîn serokkomarê Tirkiyê ye. Serokekî tam layiqî tirka ye.
Bira dinya bibîne ku Erdoganê dikira Tirkiye li Rojhilata nêz û navîn bikira welatê MODEL çi meriv e û xwediyê fikir û dîtineke çiqasî prîmîtîv e…

2014-11-24

XXX

Bavê şehîdekî Kurdistanê bi dilekî şewat lê bi xurûr û serbilindî piştî şehîdbûna lawê xwe li Kurdistana rojava wiha gotiye:

"Tu tişt ji ewlad ne şîrîntir e. Lê belê hezkirina welêt ya ewlad derbas dike. Me dilê xwe diyarî miletekî mezlûm û axeke pîroz kir.
Lawê min nemir. Yên zarokên xwe ji parastina vî welatî dûr xistine mirine."

///Bavê şehîd Soze Ekrem Îbrahîm

XXX

-Jineke bedew ji çav ra, jineke baş ji dil ra xweşik xuya dike. Ya pêşî aqût(pirlanta) û ya duyem jî xezîne ye.

Bi hurmet devê kalanşinkofa bi milê we da radimîsim.

Mehmet Altan, li ser jinên Kobanê yên gerîlla, li ser qehreman, canfîda û şepalên Kobanê nivîseke pir xweş nivîsîye.
Ji ber ku nivîskarekî, rojnamevanekî û ronakbîrekî tirk bi vê heyraniyê qala jinên kurd, gerîllayên jin yên ziravpiling kiriye ji kêfa serê min gihîşt asîmanan.
Û loma jî min hin beşên nivîsa Mehmet Altan kir kurmancî, ji bo ku leheng û şepalên kurd yên li Kobanê û li Şengalê şer dikin û jinên kurd yên tirkînezan nivîsê bixwînin û bibînin ku qehremaniya wan ya li Kobanê û Şengalê li cîhnaê çi deng daye û dinya çawa kiriye heyranê wan û gelê wan.
Esas gerîllayên PKKê  yên jin ev ne cara pêşî ye ku qehremaniyên wiha dikin, ev 30 sal in gelek caran qehremaniyên belkî jî ji yên Kobanê jî mezintir kirine.
Lê mixabin dewleta tirk bi saya îmkanên xwe yên dewletî hemû  liberxwedan û qehremaniyên gerîllayên jin fetisand û nehîşt dinya bibîne û bibihîze.
Ya din hinekî jî dinyayê bi xwe jî ji ber gelek sebebên siyasî û aborî nedixwest qehremaniyên gerîllayên kurd bibînin. Çavên xwe jê ra digirtin.
Lê li Kobanê berxwedana kurdan û gerîllayên kurd û bi taybetî jî beşdariya jinên canfîda ya bi rojan dinya mecbûr kir ku vê liberxwedana bêhempa bibîne û ji van şêr û şepalên kurd ra şewqên xwe derxin, heyraniya xwe bînin zimên û serê xwe bitewînin.
Beşê min wergerandiye li jêr pêşkêşî we dikim. Bi hêviya bi dilê we be. Bi taybetî jî bi dilê jinên kurd be…
Wek hemû dinyayê ez jî nuha(û berê jî) heyranê we me. Ji ber ku hûn bi porên xwe yên helîlî, bi kenê xwe yê ji hingiv şîrîntir, bi guliyên xwe yên wek fitlên maran, bi şerê xwe yê bêhempa, bi lehengî û bi canfîdayiya xwe hûn doza gelê xwe bi dinyayê didin nasîn û ji têkoşîna gelê xwe ra dostan û sempatiyê top dikin.
Ez minettarê we hemû şervanên jin im. Xwîna we li Kobanê û li Şengalê rijand azadî û serxwebûna me nêziktir kir.
Bi hurmet devê kalanşinkofa bi milê we da radimîsim.
Zinarê Xamo

”Hewcedariya her neteweyî di qonaxa dewletbûnê da bi destaneke netewî heye. Kobanê ev destana ji bo ku kurd li dora wê kom bibin bi qehremaniyeke mezin xuliqand.

Di dema ku destana ne tenê Rojava, bi îhtîmaleke mezin ewê dîroka Rojhilata navîn jî biguhrîne li Kobanê dihat jiyandin, kurd li dinyayê bûn gelê herî berbiçav, herî populer.
Kurd jî bi filistîniyan ra wek zarokên Rojhilata navîn yên neheqî lê bûne hatin dîtin lê belê nikanîbûn dilê dinyayê qezenc bikin. Nêzîkiya ji filistîniyan ra tê nîşandan ji kurdan ra nehat nîşanda.
Ji ber ku yên li kurdan zulm dikirin musilman bûn û filistîniyan bi cihûyan ra şer dikirin, loma jî kurdan bi qasî filistîniyan piştgirî nedît.
Tirkiyê, Îranê, Îraqê û Sûriyê tim nehîştin kurd derkevin pêş. Kurd tim wek ”terorîstên” li dijî dewletên xwe derdikevin hatinm etîketkirin.
Kobanê, du tabloyên balkêş bi hev ra pêşkêşî dinyayê kir. Ya yekem rastiyeke siyasî û eskerî bû.
Tu dewleteke musilman nikanîbû pêşdaçûna Daîşê bisekinîne ya jï nedixwest, kurdên laîk bi jiyanên xwe Daîş rawestandin.
Ya din jî bi qasî cesaretê, dîtina wê jî çîroka herbeke balkêş bû: Jinên kobanî yên gerîlla.
Di destê wan da kalaşnîkof, porên wan hûnayî, rûbiken, jinên qehreman yên çavreş. Bajarên xwe, dewletên xwe, malbatên xwe, jiyanên xwe feda kiribûn û bêyî ku çavên xwe biqurçînin di vê riyê da dimirin.
Li hemberî Daişiyên bi şimik, rîdirêj, yên serê mirovan jêdikin,  çavbixwîn, leşkerên hov, jinên rûbiken, jinên cesûr.
Ev jin bûn sembola Kobanê û dinyayê jï bêyî terdut li ba wan da cî girt.
Rojekê dema ev şer biqede, jinên kurd yên gerîlla ewê vegerin malên xwe. Piştî van tecrûbeyên xwe, piştî hewqas tiştên dîtin ewê ji nuhve tevî jiyanê bibin.
Ewê malên wan, peyên wan, zarokên wan, cîranên wan, karên wan cê bibe.
Mêr ewê carekeke din nikanibin serkutiyê li van jinan bikin. Mêr li hmberî van jinan ewê nikanibin dengê xwe bilind bikin. Ewê nikanibin jiyanê fërî van jinan bikin.
Ewê evîndarê van jinan bibin, hurmetê nîşanî van jinan bidin.
Û di serda ev jin ne yek, ne dudu, ne sê heb in, bi sedan, bi hezara in.
Toreya(edeta)mêran ya Tirkiyê û Rojhilata navîn ewê perçeperçeyî bibbe, şiklê jiyaneke nuh, şiklê têkiliyên nuh ewê peyda bibin.
Mêrên Rojhilata navîn yên meyildarî diziyê, bêrêtiyê û sistomisto jin çi ye ewê fêr bibin…
Di civata kurd da pêşengiya guhertina ciyê jinë Abdulah Ocalan kir. Jina kurd ji ciyê girt bi mêran ra kir yek, hetta li dereke ji mëran bilindtir bicî kir.

Di civatên din da jin hakîr tên dîtin, hepsî malê tên kirin, hebûna wan û giringîya wan tê înkarkirin. Lê kurdan jin bilind kirin, bi taybetî jî li Kobanê dan pêş, xistin nava yên herî egîd, yên herî qehreman.

Belkî jî pîvana pêşketinê ya esasî ye hurmetnîşandana jinê. Li Rojhilta navîn tenê kurd hurmetê nîşanî jinên didin.
Kudan wekheviya jin û mêr pê aniye bû bi yekê jî li Rojhilata navîn ji gelên din cihê dibin. Nava gelê kurd tije jinên qehreman in. Dinya pêşketî li Rojhilata navîn ne tenê di warê siyasî da, ji dil jî
tenê piştgriya kurdan dike.
Kobanê, kurd kirin gelekî model, li aliyekî jî qadeke nuh ji wan ra vekir. Îmkana dewletbûnê bi dest xistin.
Barzanî li Bakurê Iraqê nikanîbû nuveya Kurdistana mezin çêke, lê belê PKkê li Kobanê çêkir.

Li Rojava Erdogan û Davutoglu bi siyaseteke sinsî piştgirî dan Daîşê li hemberî kurdan. Lê vê belê bedela vê siyasetê Tirkiyê rola xwe ya li Rojhilata navîn da kurdan.

Kobanê û lehengên Kobanê yên jin dîroka kurdan û rola wan ya di dîrokê da guherand.
 Li Rojhilatanavîn gelê ku kesên demokrat piştgiriya wan bikin, bidin pê wan, texlît bikin êdî kurd in.

Tirkiye wek dewlet nuha dikane hêz û îmkanên wê ji kurdan zêdetir be, lê belê serdestiya psîkolojîk sedîsed di destê kurdan da ye.
Modela Rojhilata navîn êdî kurd in.”
///Mehmet Altan

Sebrî Ok: Bira pûlis û leşkerên tirk ji Kurdistanê vekişin

Sebrî Ok: Bira pûlis û leşkerên tirk ji Kurdistanê vekişin, ji ber ku hêza nemeşrû ew in.
Endamê Komîteya Birêvebir yê KCKê Sebrî Ok, li ser minaqeşeyên dibê PKK çekan deyne gotiye, ”sebebê derketina me û destpêkirina şerê çekdarî hîn ji ortê ranebûye, loma jî minaqeşekirina çekdanînê şaş e û bêhurmetiya li hemberî îradeya gelê kurd e. Û li dijî rastiya me ye jî.”
OK gotiye, di demeke ku hebûna gelê kurd di tahlûkê da ye û li herêmê gelek bûyerên mezin rû didin ew qebûl nakin hêza wan ya çekdar were minaqeşekirin.
OK gotiye, ”hebûna leşker û polîsên tirk li Kurdistanê ne meşrû ye. Heger li Kurdistanê hêzeke dibê vekişe hebe ew jî hêza îşxalkar ya dewleta tirk e, pûlis û leşkerên tirk in.”
OK, danîna çekan bi qebûlkirina nasnameya kurdan û dana mafên wan ve girêdaye û gotiye, ”heta ku hebûn û mafên gelê kurd bi qanûnan nekeve bin garantiyê çareseriya mesela kurd ji xwe ne mimkûn e. Ji bo çareserkirina meseleyekê berî hertiştî dibê ew mesele were qebûlkirin.”
Ok, derbarê nêt û siyaseta AKPê da tiştên pir rast gotine. Û ji xwe êdî herkes dizane û dibêne ku ji destpêkê da ye hukûmet bi konetî hereket dike, tim bi devikî hin sozan dide,dibêje ewê hin gavan bavêje û carnan jî hin tiştmiştên xapandinê dike.
Lê di meseleya esasî da, yanî ne hebûna kurdan nas dike û ne jî tu mafên kurdan yên netewî dide. Tim meselê dibe û tîne, serî li meselê digerîne û wextê qezenc dike. Bi hêviya ku ewê PKK belav bibe, biweste, ji hêzada bikeve, perçe bibe…
Êdî zarok jî bi siyaseta hukûmetê dizane. Loma jî nêta hukûmetê bi tecrûbeyên du salên borî li ber çava ye.
Ez hêvî dikim ku ev şêla Ok di rojên pêş da neguhere û PKK û KCK dîsa bi sozên hukûmetê yên devkî nexape.
Wek Ok jî gotiye, nêta hukûmeta AKPê pir xerab e û naxwaze tu mafî bide kurdan, ev vekirî ye.
Ji ber ku hukûmet PKKê, KCKê û heta PYDê jî hîn wek rêxistinên terorîst dibîne û dixwaze wan ji ortê rake. Hukûmeta xwediyê vê siyasetê be bi PKKê ra tu meseleyê çareser nake, tu mafî nade kurdan. Ew li pey tasfiyekirina PKKê û tevgera kurd ya netewî ye…
Heta ku hukûmet di çareserkirina meselê da ne samîmî be PKK bixaze jî, çi tawîzê bide jî mesele hel nabe. Ya muhîm biryara hûkûmtê ye, dibê hukûmet dev ji xapandinê û hîleyan berde.

Davutoglu Silêmaniyê jî wek bajarekî Tirkiyê dibîne

Serokwezîrê Tikriyê Davutoglu piştî vegera xwe ya ji Îraqê û Kurdistanê, bêyî ku navê Kurdistanê bigre devê xwe, gotiye ”Li Bakurê Îraqê di warê ewlekariyê da mewcûdiyeta tu kesî bi qasî ya me tuneye. Min ji Mesûd Barzanî ra jî got, Bakurê Îraqê ji bo me muhîm e. Mûsil, Kerkûk, Hewlêr, Silêmanî xeta ewlekariya me ya netewî ye. Hertiştê li vir dibe tesîrê li Tirkiyê dike.”
Bersîva serokê Kurdistanê Mesûd Barzanî ji van gotinên Davutoglu yên bêedeb ra çi bûye ez nizanim. Lê ev gotinên Davutoglu pir giran in, mêrik wek waliyekî kolonyalîst, wek ku qala mamûrekî xwe bike peyivî ye, gotiye "min ji Mesûd Barzanî ra got." Ev gotinên Davutoglu qebûlnekirina azadî û serxwebûna Kurdan û Kurdistanê ye.
Yek, Davutoglu hîn jî ji Kurdistanê ra dibêje ”Bakurê Îraqê.” Dudu, Davutoglu Kurdistanê wek beşekî Tirkiyê û Mûsil, Kerkûk, Hewlêr û Silêmaniyê jî wek bajarên Tirkiyê dibîne, dibêje hertiştê li van bajaran bibe wan eleqedar dike.
Ev, rasterast midaxeleya karûbarê Îraqê û Kurdistanê ye, dîtina Kurdistanê wek beşekî Tirkiyê ye. Ne xwe meriv ji bo welatekî serbixwe tiştekî wiha nabêje.
Yanî Davutoglu ji kurdan ra pir vekirî dibêje, Kurdistanan bi qasî ya we ye ya me ye jî, Mûsil, Kerkûk, Hewlêr û Silêmanî bi qasî bajarên we ne, bajarên me ne jî. Loma jî liher buhstek Kurdistanê çi bibe mafê me heye em midaxele bikin….
Ez bersîva kurdan meraq dikim, gelo kurd li hemberîvan gotinên Davutoglu çi dibêjin?

Not:
Min xebera vê axaftina Davutoglu di Rûdawê beşê tirkî da xwend. Di xebera Rûdawê da Davutoglu ji Kurdistanê ra gotiye ”Bakurê Îraqê.”
Çavkanî çapemeniya tirk bûya minê bi îhtîyat lê binêriya, lê ji ber ku Rûdaw bû min jê bawer kir.
Lê nuha min li vîdeoya civîna çapemeniyê ya Davutoglu û serokê Kurdistanê Mesûd Barzanî temaşe kir, di vê vîdeoyê da Davutoglu nabêja ”Bakurê Îraqê”, dibêje herêma Kurdistan. Û navên Mûsilê, Kerkûkê, Hewlêrê û Silêmaniyê jî qet nagire devê xwe.
Çend caran gotina ”herêma kurd” bikar tîne , lê qet nabêje ”Bakurê Îraqê.”
Li vir du îhtîmal hene, ya Rûdawê jî axaftina Davutoglu û navê Kurdistanê wek medya tirk sansor kiriye, ya jî Davutoglu li dereke din ev axaftin kiriye.
Heger ne derew e dibê Rûdaw vîdeoya wan gotinên Davutoglu biweşîne.

Pêvajoya çereseriyê daket mistewa du odeyan û telewîzyonekê

Erdogan di vegera xwe ya Afrîkayê da di balafirê da li ”pêvajoya çareseriyê” û ”muzakereyên” bi Ocalan ra gotiye, ”Bikaranîna gotina muzakerê çewt e. Di dema serokwezîriya min da hukûmetê hemû gavên pêwîst avêtin û piraniya tiştên dibê bihata çêkrin kir. Hejmara odeyên wî derxist duduyan, TV danê, di ziyaretan da nermayî çêbû. Canê 50 hezar malbatên şehîdên me şewitî ye. Ew çawa lê dinêrin, çi dibêjin jî muhîm e. Hakeza mesela dayikên Diyarbekrê jî heye. Zarokên wan revandina çiyê. Ev zarok çima nayên? Bira heyeta Merivên Akîl carê here bi van însanan ra jî rûne û bipeyive…”
Mêrik baş henekê xwe bi kurdan dike, ode ji yekê kirine dudu, telewîzyon danê û zorê jî ji ziyaretçiyên wî ra dernaxin.
Weleh xêra Xwedê ye! Ma hîn ewê çi bidin kurdan?
Hewqas tişt dana Ocalan, kurd hîn jî ne memnûn in. Ecêba giran!
Ev gotinên Erdogan bêyî qerfan û tinazpêkirinê ne tiştekî din e, bira ”çareseriya mesela kurd” li wir bimîne, mêrik qebûl nake meriv gotina ”muzakereyê jî bikar bîne.
Li ortê tu muzakere û çareserî mareserî, mesela kurd tuneye, mesela rehetiya şexsê Ocalan heye. Mêrik dibêje me ”hejmara odeyên wî ji yekê derxistiye du odan û telewîzyon jî dayê.”
Û bi vî rengî jî hemû sozên xwe anîne cî. Yanî tu tiştekî din yê bidin kurdan tuneye.
Ocalan û heyeta Îmraliyê çi dibêjin bira bibêjin vala ye, li gorî dewletê mesela PKKê jî û ya kurd jî telewîzyonek û zêdekirina odeyekê ye, yanî rehetiya Ocalan e.

XXX

Êdî dema bilindkirina navê Kurdistanê û ala kurd hatiye

Hin keç û xortên kurd yên endamên Civata Kurd li Almanya bi dixwaza ”Serxwebûna Kurdistana” Kurdistanê beşdarî Komcivîna Partiya Keskan bûne.
Bi baweriya min êdî wext hatiye ku kurd li Tirkiyê, li Kurdistanê û herdera cîhanê ala Kurdî hildin û daxwaza Kurdistana serbixwe bilind biqîrin.
Dewleta tirk ji ber navê Kurdistanê serlêdana PAKê(Partiya Azadiya Kurdistanê)red kir û bi hin behaneyan negirt.
Ji bo ku navê Kurdistanê û sembola netewî ala kurd li Tirkiyê were qebûlkirin dibê xebat û liberxwedaneke bi îstîkrar were kirin. Tirk ne navê Kurdistanê û ne jî ala kurd bi rehetî qebûl nakin, ji bo ku qebûl bikin dibê em micadeleyeke mezin bidin û di her çalakiyê da bi hezaran alên kurd hildin.

Şepalên Kobanê

Egîdî, canfîdayî û ezameta jina kurd li Kobanê bi heykelekî şêr û gerîlayeka jin hatiye niwandin, gewdekirin, taswîrkirin. Jineke gerîlla ya bi ezamet li ser pişta şêrekî bi heybet rûniştiye û li dûr dinêre.
Bi dîtina min canfîdayî û dilêriya jina kurd dibê ne bi şêr, bi ŞEPAL ya nî bi şêra mê bihata gewdekirin, bihata nîşandan.
Şêr nêr e, cengaweriya jina kurd ya Kobanê dibê jin ne bi şêr, bi ŞEPALê were nîşandan.
Şepal jî bi qasî şêr bi heybet e, heta di nêçîrê da şepal ji şêr gelkî jêhattir e, ya nîçîrvan herî çalak şepal e.
Ma gorbuhuştê seydayê Melayê Cizîrî bela sebeb di şiira xwe ya ”Şox û Şengê da pesnê jina kurd ne bi şêr, şepalê dide û dibêje:

Şox û şengê zuhrerengê
Dil ji min bir, dil ji min
Awirên heybetpilingê
Dil ji min bir, dil ji min

Wê şepalê miskê xalê
Dêmdurê gerdenşemalê
Cebheta biskan sema lê
Dil ji min bir, dil ji min

Zulf û xalan nûn û dalan
Wan ji min dil bir bi talan
Goşeyê qewsê hilalan
Dil ji min bir, dil ji min

Dêm nedîrê bo ‘ebîrê
Xemrî û gîsû herîrê
Sîne kir amancê tîrê
Dil ji min bir, dil ji min

Surşirînê nazenînê
Kuştim û nakit yeqînê
Wê bi çengala evînê
Dil ji min bir, dil ji min

Fetl û taban da xuraban
Ebleq û cohtê şebaban
Dame ber pence û kulaban
Dil ji min bir, dil ji min

///Melayê Cizîrî

Çira derewçînan zû vemirî

Mamoste Qedrî Yildirim hat berdan. Wek her kurdekî welatparêz ez jî bi vê xeberê kêfxweş bûm.
Di van çar rojên girtîtiya mamoste Qedrî da diyar bû ku mamoste çiqasî ji alî aqademîsyen û telebeyên xwe tê hezkirin. Di van çar rojan da bi hezaran kurd ji bo azadiya mamoste Qedrî bi şev û roj xebtîn.
Piştî berdana mamoste derket ortê ku îdîa gendeliyê ji binde derew e, tu têkiliyeke mamoste Qedrî bi vê îdîayê tuneye.
Armanc di şexsê Qedrî Yildrim da reşkirin û bêîtîbarkirina beşê kurdî ye. Bi qasî xuya ye hukûmet ji xebatên Qedrî xoce û ji ya beşên kurdî ne razî ye. Loma jî hukûmet dixwaze Qedrî xoce û beşê kurdî yê zanîngeha Mêrdînê ji îtîbar da bixîne. Belkî jî planeke hukûmetê ya guhertina mamosteyên vî beşî jî hebe. Di rojên pêş da ev yek ewê diyar bibe.
Netîce ez bi azadbûna mamoste Qedrî û hevalên wî pir kêfxweş bûm.

XXX

Li Kitêbxaneya Kurdî li ser sirûdê ”Ey reqîb” saet di 13.00 da semînerek heye. Semîner ji alî hunermend û akademîsyenê kurd Esed Qeredaxî ve ewê were dayin.
Ezê herim lê guhdarî bikim. Ev demeke hin kes û hêzên îslamî li dijî hin gotinên sirûda ”Ey reqîb derdikevin” û dixwazin biguherînin. Yanî li Kurdistana başûr di nava kurdan li ser gotinên ”Ey reqîb” minaqeşeke gurr heye.
Bi vê ziyaretê ra ezê du kitêbên xwe jî bidim kitêbxanê, heta nuha fersend çênebûbû ez bidimê.

XXX

Welatê ku jin lê bi qasî mêran ne azad bin meriv nikane li wî welatî qala hebûna demokrasiyê bike. Ji bo ku demokrasî li welatekî hebe dibê jin jî di her warî da bi qasî mêran azad bin.
Sebebê ku li welatên îslam demokrasî tuneye bindestiya jinê ye, qebûlnekirina wekheviya jin û mêr e.
Û heta ku îslam ev îslam be ne mimkûn e ku li tu welatekî îslam demokrasiyeke temam hebe.
Îslam wekheviya jin û mêr qebûl nake. Û heta qebûl neke jî li welatên îslam demokrasî jî xeyal e. Tirkiye jî yek ji van welatan e.

XXX
Min kitêba Memê Mala Hine ”Hê-şîn” qedand. Piştî vê lezetê berê ezê herim derve û cixareyek bi îman bikşînim û dû ra jî herim serê xwe deynim, wek zarokekî piştî guhdarîkirina xemîşokek xweş li ser çonga dayika xwe di xew ra here.
Bi xêr sibe ezê dest bi bîranînên ”Serpêhatiyên jiyana min” ya Dr. Îsmet Şerîf Wanlî bikim.

2014-11-19

Çima hin kurdên îslamî dibin qatil û neyarên gelê xwe?

DAIŞê bi daxuyaniyekê teqîna Hewlêrê (19.11.2014) girt ser xwe. Di daxuyaniyê da tê gotin ku wan mefrezeyek ji Kerkûkê şandine Hewlêrê û hevalekî wan ê bi navê Ebdurehman el Kurdî li pêşiya parêzgeha Hewlêrê teqîn pêk aniye.
Yanî terorîstê li Hewlêrê xwe teqand û bû sebebê mirina 5 kesan û bi dehan birîndaran kurd e.
Lê ev ne cara pêşî ye ku yekî kurd li ser navê Daîşê ya jî li ser navê rêxistineke din ya îslamî tevgereke terorîstî ya wiha dike û sedan kurdî dikuje û seqet dihêle.
Kurdên îslamî berê jî li Silêmaniyê, li Hewlêrê, li Şengalê, li Duhokê, li Kobanê û li gelek derên din jî întîxarên wiha kirine û bi sedan kurd kuştine.
Çawa dibe zarokên miletekî li ser navê dîn, ji ber baweriya dînî dibin neyarên gelê xwe û li hemberî gelê xwe hovîtiyên wiha dikin?
Yên li Silêmaniyê, li Hewlêrê, li Duhokê, li Şengalê, li Xaneqînê û li hin derên din xwekujiyên bi vî rengî kirin dîsa kurdên îslamî bûn.
Bi sedan kurdên li Kobanê di nava terorîstên ereb û tirk da li dijî gelê xwe şer dikin jî kurdên îslamî ne.
Li gorî texmînan bi hezaran kurd di nava Daîşê da ne û li hemberî gelê xwe şer dikin.
Hema ji Kurdistana bakur tenê bi kêmanî 500 kurd nuha di nava Daîşê da ne û li Kobanê, li Şengalê û li Mûsilê li hemberî gelê xwe, li hemberî xwişk û birayên xwe şer dikin, bi qatilan ra serê birayên xwe jê dikin.
Ev çawa dîn e, çawa bawerî ye ku însanan dike qatilên xwişk û birayên xwe, dike qatilên dê û bavê xwe?
Di her xwekujiyê da terorîst kurdekî îslamî derdikeve. Tu carî kurdekî çep, lîberal, demokrat, nebawermend li hember gelê xwe sûcekî wiha nekiriye û nake. Yên dikin hemû jî îslamî ne û ji ber baweriya xwe ya dînî van cînayetan dikin.
Çima?
Ez ji kurdên îslamî dipirsim:
Çima hin kurdên îslamî dibin qatilû neyarên gelê xwe?
Çima dibin hevalên terorîstên ereb û li hemberî gelê xwe şer dikin û dikevin xwîna xwişk û birayên xwe?
Çima kurdekî çep û ne dîndar, ne bawermend tiştekî wiha nake, çima yên dikin hemû îslamî ne?
Çima dîn, bawerî, îslamiyet însanên kurd dike qatilû neyarên qewmê xwe?

Bersîva Serkan Aydogan
Serkan, vana gotinên tirkên nîjadperest, çepên tirk û dilxwazên terorîstên îslamî ne... Efendim Emerîka Daîş çêkiriye. Na, Emerîkyêa Daîş çênekiriye, Daîşî sedîsed ereb in, nîjadperest û beasiyên ereb in. Yanî Daîş ”malekî yerlî” ye. Kesên dixwazin van celadên îslamî û îdeolojiya îslamê ji van qetlîaman dûr û bêguneh nîşan bidin, wek hertim sûc dixin hustuyê Îsraîl, husutuyê Emerîka û Xerbê.
Ev ne rast e, Daîş rêxistineke îslamî ye û li gorî xwe îslamê şirove dike. Û bingeha kirinên xwe jî ji îslamê digre. Yanî buhtanan li dînê îslamê nakin.
Lê helbet hemû misilman, hemû dîndar ne wek van celadan e, musilman û dîndarên li dijî wan pir in. Bes ev yek nabe sebeb ku meriv bibêje ew ne tevgereke îslamî ne. Û pirsa “çima tevgerên wiha ji nava îslamê derdikvin?” ji alimêm îslamê neke.
Li gorî lêkolînan bi kêmasî 500-600 kurdên dîndar yên ji Kurdistana bakur di nava Daîşê da hene û bi piranî jî ji herêma Çewlikê(Bîngolê)û Semsûrê(Adiyamanê)ne.
Bi îhtîmaleke mezin kesên nêzî Huda-Parê ne, yanî merivên dîndar in. Ji xwe sempatiya Huda-Parê ya li hemberî Daîşê di vîdeokê da herkesî dît.
Ma heta nuha we qet dîtiye ku Huda-Parê êrîşên Daîşê yên ser Kobanê û ser kurdan protesto kiribe?
Ma Emerîkayê Hud-Par çêkiriye?
Ma Emerîkayê 500-600 kurd şandin nava Daîşê?
Ma vana hemû ajanên Emerîkayê ne?
Îdîaya Emerîka Daîş çêkiriye bêbingeh e û sivikkirina sûcê qatil û celada ye. Mêrika li dû Kurdistanê ne, dixwazin Kurdistanê ji kurdan vala bikin. Ev hedefa ereban û tirka ye, karê Emerîka bi vê tuneye.
Vana dixwazin Îsraîl jî ji ortê rakin, Emerîka tiştekî wiha naxwaze.
Ya din jî berî ku tu xwe li minaqeşeyên wiha rakişînî û qala teorî û komployên wiha mezin û ”Frankenstein” bikî, baş bixwîne, rastnivîsê fêr bibe, rastnivîsa navê Frankenstein fêr bibe. Dû ra xwe tevî tiştên wiha bike.