Dibê kurd CHP-ê û MHP-ê protesto bikin

Agir ji devê serokê MHP-ê Devlet bahçelî û serokê CHP-ê Denîz Baykal dibare, herdu serok û berdevkên wan jî heroj weke gurên devbixweîn êrêşê dibin ser AKP-ê û serokwezîr Erdogan û gelek gotinên giran jê ra dibêjin.

Ji dêlî ku muxalet ji li gor îktîdarê hîn pêşverû be, hîn tiştên baş û demokratîk bibêje, bi vacayî di mesela kurda van hurdi partiyan jî xeteke pir xerab dane ber xwe û bi rengekî bêperwa dijminatiya kurdan dikin.

Li gor van herdu partiyan jî dibê hukûmet di mesela kurda da tu gavan navêje, tu mafî nede gelê kurd û divê siyaseta êrîş û şer da israr bike.

Li hember çareseriya mesela kurd, ev herdu partî (MHP/CHP) û bi taybetî jî serokên van herdu partiyan astengek pir mezin e.

Tiştê xerîb ew e ku li Kurdistaanê heta nuha li hember vê siyaseta Baykal û Bahçelî, kurdên hevalbendên wan hîn bêdeng in, hîn kesî dengê xwe nekiriye.

Dibê DTP û hêzên kurd yên din li hember vê siyaseta CHP û MHP-ê kampaniyekê vekin, ji kurdên endam û hevalbendên wan bixwazin ku ew li hember vê siyaseta wan ya li înkar û îmhaya miletê kurd qebûl nekin û bi girseyî ji partiyên wan îstîfa bikin.

Ev herdu partî jî heta ku bivikê nebînin, heta ku ji nava xwe reaksiyoneke girseyî nebînin ewê dev ji vê dijminatiya xwe ya li hember kurdan berndin.
Dibê kurd di zûtirîn wextê da berê xwe bidin endam û kadirên van herdu partiyan û ji wan daxwaza serîhildanê bikin.
Baykal û Bahçelî gav û saetê dijminatiya miletê kurd dikin, lê hin kurd hîn jî endam û berpirsiyariya van partiyan e, bi rastî ev yek şermeke pir mezin e.
Heger di rojeke wiha da jî kurdên ewndamên van partiyan ewê dengê xwe nekin, maneya xwe ew e ku tu ferqa wan ji Bahçelî û Baykal tuneye.
Çapemeniya kurd dibê li ser vê şêla serokên van herdu partiyan raweste û wan deşîfre bike, neyartiya wan ya li hember miletê kurd raxe ber çavê endam û dilsozên wan.
Roja îro dibê kurd berê tîrên xwe bidin mixalefetê, bi hemû hêza xwe dawşînin mixalefetê û êrîşkariya mixalefetê îfşa bikin.
Mixalefet çiqas zeîf bibe, şert û îmkanên çareseriya mesela kurd hewqasî nêz û hêsan dibe. Loma jî dibê herkes ji tenga xwe ve dawşîne Baykal û Bahçelî...