Çend gotinên xweş

Îro jî dixwazim bi çend gotinên xweş, gotinên meriv kane li ser bifikire, jê aqil bigire dest bi nivîsa rojê bikim.

Min bala xwe nedaye tu malperê, nizanim çi qewimîye, çi neqewimîye. Înşela xeberên xweş hebin.  

Her sibe hinekî bi tirs kompîtora xwe vedikim. Dibêjim şalê li Kurdistanê tiştekî xerab neqewimî be. Îsal pê da xerab çû, hêvî dikim sal çê biqede.

-Merivê pozbilind û çikûs çiqas wesfên wî yên din hebin jî ne hêjayî meriv qedir bidê, cidî bigire.

-Êdî tu tişt ne wekî berê ye. Ez jî wisa me.

-Beden sakîn be, aqil hîn baştir dixebite

-Dîkên wer hene, wer bawer dikin ji bo ku ew azan didin roj hiltê.

-Jiyan ne tiştê çûye bi paş da tîne, ne jî wexta derbas bûye bi paş da vedigerîne. Tiştê tu yê bijî ya dibê tu yê di wextê da bijî, ya jî ji bo ku tu nejiyaye tu yê negirî.

-Perê hûr bêrîka însên qul dike, însanê xerab jî dilê însên. Ji bo wê herduyan jî xerc bikin, bira here.

-Ji bo emelîyatkirina însên a bedenî xewirandin lazim e, ji bo emelîyatkirina rûhî şiyarkirin lazim e.

-Merivên di hebûna wan da tu kar tunebe, di tunebûna wan da jî tiştek kêm nabe.

-Dibê meriv însên ne bi cî û mewqîyê lê ye, bi cî û mewqîyê çavê xwe berdayê bipîve.

-Du şervanên herî bi hêz, sebr û zeman e.

-Hêza însên a rast ne di çindkirinê da ye, di sekna saxlem, ya naheje da ye.

-Merivê bêyî bextewariya xwe tu hedefeke wî ya din tunebe, merivekî xerab e.

-Ji bo ku piraniya însanan wiya dikin, şaşî ji şaşîbûnê dernakeve.

-Berî ku tu heriyê bavêjî ji yekî da baş bifikire û ji bîr meke berê ewê destê te qilêrî bibe.

-Ji şaşiyên hinekên din dersê bigrin. Însan bi qasî ku hemû şaşiyan bi xwe bike najî.

”Însan” gotineke erebî ye. Destpêkê maneya wê "ji bîr meke" bûye. Dibê em jî hin tiştan, hin bûyeran, hin trajediyên hatine serê me ji bîr nekin. Yanî tarîxa xwe bizanibin.