Derdê dil ruh dikşîne

Ezê vêsê jî bi çend gotinên Şems-î Tebrîzî ji we ra bibêjim siba we bi xêr û silamet. Ezê îro jî bi çend nesîhetên, aforîzmeyên bi sûd dest bi roja xwe bikim.

-Dil ji ruh ra dibêje: Ez hez dikim, ez evîndar dibim, lê êşa wê tim tu dikşînî.

Ruh jî bersîvê didê: Hema tu hez bikî bes e. 
Yanî derdê dil ruhê feqîr dikşîne, ew dil digre, serê ruh pê ra dikeve belayê.

-Dengê sukûtê jî heye, lê belê dilekî wî fêm bike lazim e.

-Ez bi zêr bim her kesê qîmeta min bizanibe. Bira ez hesinekî besît bim, bira yê fêm dike tenê qîmeta min bizanibe.

XXX

Îro ne roja gerrê ye. Berfeke şilope dibare. Ez û xanim çûn markêtê, me alvêra xwe kir û em hatin malika xwe. Berf hîn jî dibare. Lê ji ber 1 derece germ e berf erdê nagire, tavilê dihele. Ez ji hewa wiha qet hez nakim. Dixwazim çend derece sar be, meriv biqefile, dest û nigên meriv bicemide.

XXX

Hûn kîjan îdeolojiyê diparêzin, biparêzin, kîjan dînî dihebînin, bihebînin. Lê ji bo wan nekevin gewriya xelkê. Her kes li ser fikrê xwe, li ser dînê xwe, li ser mezheba xwe. Xwe nekin berdevkê îslamê û tu îdeolojiyê.

Her kes ne mecbûr e wek we ji îslamê hez bike, wek we îtîatê wê bike.

 XXX

Bi xêra jineka tirk, pêr(11/2-24) bi tesadufî ez fêr bûm serokê Dîyaneta Tirkiyê Alî Erbaş hatiye Swêd û li mizgefta Fîttjayê weez daye. Min ji bîr kir pêr qala hatina wî bikim.

Di derekê da min xebera hatina wî ya Swêd nexwend. Belkî bi dizî girtine.

Do ez çûm Lîdlê. Min bala xwe dida refa mêweyan. Xanimeka navsale, sergitî jî hat li nêzî min sekinî. Telefona wê li ber guh, bi tirkî dipeyivî. Min fêm kir tirk e. Ji ya hember ra got:

-Serokê Dîyanetê hatibû mizgeftê, ez çûm wir, min lê gudarî kir.

Mizgefta qal dikir ya Fîttjayê bû. Lîdl jî nêzî wê ye. Miheqeq ji bo firldaqekê, ji bo dolanekê hatiye, kî zane çi dek û doêab gerrandiye. Îstîxbarata Tirkiyê li Swêd baş dixebite, hedef kurd in, li ser kurdan agahiyê top dikin.

XXX

Rewşa me, halê me wek milet pir xerab e, em perîşan in. Çimkî welatê me kirine çar perçe û em miletekî bindest in. Tu tişt ji bindestiyê ji bêdewletiyê xerabtir tune ye.

Lê dêsa jî hin sinetkar, hunermendên me bala wan li ser Afrîka û miletên din in. Heyran wele halê me ji afrîqiyan xerabtir e, bira bala, hunera we li ser miletê we be.

XXX

Tiştê tu li ser girîngiya zimanê kurdî, li ser axaftin û nivîsîna kurdî dibêjî camêr gişan testîq dike, dibêje tu rast dibêje, dibê meriv bi kurdî bipeyive û binivîsîne, tirkî neke zimanê xwe yê rojane.

Wiha dibêje lê dîsa jî bi zarokên xwe ra tirkî dipeyive. Yanî dibêje tiştê tu dibêjî rast e, him jî bi xwe wê rastiyê bi cî nake.

Yên wiha pir in. Gelşa me jî ev e.