Wiha dom bike ewê hemû kurdan têxin zindanê

Dozger ji bo parlamenterê Diyarbekrê Şerafetîn Elçî 33 salan cezayê hefsê dixwaze.
Hela bala xwe bidinê kuro, ji merivekî weke Şerafetîn Elçî ra 33 sal ceza!

Ji Altan Tan ra jî 23 sal ceza dixwazin.

Ev herdu şexsiyet jî pir dûrî PKK û BDP-ê ne, Şerafetîn Elçî serokê partiyeke din û Altan Tan jî kurdekî  dîndar e.

Lê ji bo dewletê û Erdogan ferq nake, piştî ku dibêjin em kurd in û doza mafê kurdan dikin dibê werin zindankirin.

Aqilê meriv disekine, meriv naxwaze bawer bike...

Lê kîn û nefreta Erdogan ya li hemberî miletê kurd sînor nas nake, ew 20 milyon kurd têxe zandanê jî dilê wî rehet nabe.

Erdogan, ji bo ku rehet bike û rehet rakeve, dixwaze hemû kurdan qir bike, loma jî siyaseteke qirkirina kurdan dimeşîne.


Di îdîanameyê da tê gotin ku di du axaftinên Elçî da sûc hatiye dîtin. Ji sûcan yek, Elçî di axaftinên xwe da ji PKK-ê ra gotiye ”tevgera azadiyê” û ji endamên wê ra jî gotiye ”gerîla û şehîd”.

Û bi van gotinên xwe jî Elçî propagandeya ”rêxistina terorê” kiriye.
Him zarokên me dikujin û him jî dixwazin ku dê û bavên wan heqaretê li zarokên xwe bikin, ji wan ra xeberan bidin.

Ma li dinyayê kesî zorbatî û zulmeke wiha dîtiye?


Serokê BDP Demîrtaş di daxuyaniya xwe ya 15-ê cotmehê da got, di heqê parlamenterên BDP-ê da 656 fezleke hene û ji wan ra li ser hev tam 2474 sal ceza dixwazin.


Li alîkî pûlisên Erdogan bi rengekî bênabên li dû nêçîra siyasetmedarên kurd in û li aliyê din jî dozger bi cezayên astronimîk dixwazin kurdan teslîm bigrin.


Dozger êdî cezayên yek req naxwazin, xecayên dixwazin hemû cot û sê rwem in. Ji ber ku bi salekê du salan dilê wan li kurdan rehet nabe, dibê bi sedsalan ceza bidin wan.


Ji bo çi, çi kirine, sûcê wan çi ye?


Qet, ji ber ku ji zarokên xwe yên ku ji alî leşker û pûlisên Erdogan ve hatine qetilkirin ra gotine ”şehîd”, ji PKK-ê ra negotine ”rêxistina terorê”.



Ev, çavbirîn e, zulmeke derî însaniyetê ye. Li tu dereke din tu milet li miletekî din zulmeke hewqas zêde nake.



Ji ber ku dewlet ji kurdan xurttir e, ji be ku pûlis, leşker, tank, top û balafirên Erdogan hene loma vê zulmê li miletê kurd yê mezlûm dike.



Û hin kurdên bêxîret, bêfedî û bêheya hîn jî ji bo kulûcan lid û AKP-ê û Erdogan digerin û xwedêgiravî li hêviyêne ku Erdoganê mafekî bide kurdan.



Heger meriv biçekî jî kurd û welatparêz be dibê meriv li hemberî vlê zulma Erdogan bêdeng nemîne û li alî gelê xwe ciyê xwe bigre.