Rexneyek li "psîkologekî" kurd

Ez bîstek berê di malpera Ceylanpinara.com da rastî nivîseke "psîkologekî" kurd hatim.
Navê wî û Lewendî(Mahmût Pakdemîr) eynî ye, yanî herdu jî Mahmût Pakdemîr in.
Bi îhtîmaleke mezin ewê merivê Lewînde be.
Lê diyar ji Lewendî qet tiştek negirtiye...
Lewendî, ji bo ku kurd bi kurdayetiya xwe bihesin bi şev û roj dixebite, dixwaze ji bo gelê xwe bibe çira û find û rê nîşanî wan bide, lê "psîkologê" me jî nasnameya kurdbûnê weke "qilêrê" dibîne, dixwaze kurd xwe ji vê "qilêrê" bişon."
Min ji Mahmût Pakdemirê "psîkolog" ra nameyek nivîsî û şand. Malperê nivîsa min biweşîne ya na, ez nizanim.
Ez nivîsa xwe li jêr pêşkêşî we xendevanan dikim.

Merheba xortê delal
Min nuha nivîsa te xwend.
Te di nivîsa xwe da gotiye,"Esas min tu carî ji gotnên weke nasname û statuyê hez nekiriye."
Maneya van gotinên te ew e ku tu, tu carî ji kurdbûna xwe ne razî yî, tu dixwazî kurdbûna xwe veşêrî û jê xelas bibî.
Loma jî tu kurdbûna xwe weke "qilêreke” ku dibê tu bişo û jê xelas bibî dibînî.
Heyf, tu bûye ”psîkolog” lê te ji psîkolojiyê tiştek fêm nekiriye. Kesên psîkolog ji ber ku bi însanan ra mijûl dibin dibê civatê baştir nas bikin, rastiyan baştir bibînin û qebûl bikin.
Lê tu zanîna xwe ji bo înkarkirina eslê xwe bikar tînî, tu tirsa xwe bi demagojiyê vedişêrî.
Tu dixwazî ji kurdbûna xwe xelas bibî.
Loma jî tu bênasnemebûnê weke sadebûnê diparêzî, tu dibêjî, ”meriv çuqasî sade be hewqasî ji qilêrê pak dibe.”
Ji bo ku tu reva xwe ya ji kurdbûnê bi heq nîşan bidî, tu demagojiyê dikî, tu li dijî nasnameyê derdikvî.
Însan bê nasname tuneye. Her însan weke ferdê miletekî tê cîhanê, ev nasnameyeke netewî ye.
Însan nikane vê nasnameya xwe înkar bike, ne rast e înkar bike, yê înkar bike bi gotina yên berê, ”heramzade”ye.
Meriv di rêzên te da wê tirsa te ya ya kurdbûnê dibîne. Bi îhtîmaleke mezin tu kurdayetiya xwe li hember qariyer û meqamê xwe weke kelem û astengekê dibînî.
Ji bo ku tu ji vê ”kelem û astengê” rizgar bibî, loma jî tu ji xwe ra teoriyên vala çêdikî û li dijî ”gotina nasnameyê” derdikvî.
Lê tu jî baş dizanî ku binîadem bê nasname nabe, her însan xedî gelek nasnameye û nasnameya netewî jî ji viya yek e.
Bi qasî ez texmîn dikim tu kurd î, ji eşîra Keja û ji Qerejdaxê yî.
Ez jî kurd im, ez jî ji Qerejdaxê me.
Lê tu bi kurdayetiya xwe nerehet î, ez rehet im, tu dixwazî kurd eslê xwe înkar bikin, ez dixwazim kurd li kurdiya xwe xwedî derkevin û pê şanaz bin.
Yekî weke te, xwedêgiravî tu bûye "psîkolog" jî dibê rastiyê bibêje, riya azadiyê nîşanî gelê xwe bide.
Lê tu riya "înkarê" diparêzî, tu nasnameya netewî, weke "qilêrê" dibînî û tu dixwazî hemû kurd xwe ji vê ”qilêrê” bişon.
Heyf, li ser kaxetê tu bûye "psîkolog" lê di rastiyê da te însaniyeta xwe wenda kiriye.