Çend rêz ji bîranînên min -305-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn

XXX
1986-11-27

Min deynê Armancê bir da xwediyê çapxanê Mîlonas. Çaxa çavê wî li pera ket kêfa wî hat, got were rûne em qahwakê vexun. Ez rûniştim, qahwak teze çêkir. Kovara Îsot jî hazir e, Mamoste(Mamoste Nûjen)nuha ewê were teslîm bigire.

Mîlonas merivekî baş e, perê me tune be jî em bi deyn, bi texsîda tiştên xwe didin çapkirin.
Mamoste hat, kovara Îsot teslîm girt. Çapa wê ne xerab e.

2000-11-27
Birayê Behzat,

Gelek spas ji bo bersîva te. Lê sebebê te nîşan daye min îqna nake. Ez zahmertiyên we fêm dikim. Lê ez dixwazim tiştekî jî bizanibim. Yanî anuha ji alî huqûqî ve tu kes nikane ji xwe ra malperekê bi kurdî çêke?
Heger çêke ewê kanibin çi bikin?
Yanî di vî warî da li Tirkiyê qanûneke malperên bi kurdî qedexe(yasax)dike heye?
Ya jî ji ber ku hûn mamûrê dewletê ne lema hûn newêrin? Heger sebeb ev be, gelo meriv nikane yekî ne mamûr bike xwedî û berpirsiyar?

Ez dixwazim bibêjim dibê meriv li riyan bigere û zû bi zû bi ya wan neke.
Ya din jî mesele tenê ne çêkirina malperekê ye, ya girîng ewê çi fêde û zirara wê ji me ra hebe?
Nuha telewîzyon wek hacet(alet) tiştekî baş e, lê dema bibe wasiteyeke asîmîlasyonê xirab e.
Îcar ji bo ku em jê zirarê nebînin dibê em bi zimanê xwe weşanê bikin.
Welhasil dibê em nebin siwarê hespê xelkê, hinekî jî ji xwe ra miqlacî bin.

Ma tu çi yê Fuat Onen î?

Bi silavên biratiyê û bi hêviya ku ez malpereke Dêrikiyan a bi kurdî bibînim. "Kurro" Dêrik û Tirkî, wey mala we nekeve!!!

Bi silavên biratiyê

XXX

2018-11-27

Emer Şêxmûs navên kesên di qetlîama Qamîşloyê da ji alî leşkerên tirk va hatin qetilkirin ji min pirsî. Min îro ev nav jê ra şandin.

Merheba kekê Emer !
Min bi kurdî nivîs nedît. Lê tarîx û nav wiya ye: Tarîxa qetlîamê:
12/12-1980. 15 kes hatin qetilkirin. Navên wan:
”Hüseyin Aslan, Necla Baksi, Mehmet Emin Mutlu, Müslüm Yıldız, Mehmet Emin Dursun, Hasan Akbaba, Ramazan Kabraş (Songür), Hanife Ramazan, Emine Ramazan, Abdulkerin Ramazan, Şukru Ramazan, Azad Ramazan, Xweşnav Ramazan, Kawa Kerim, A. Ferat Kerim .”