Çend rêz ji bîranînên min -288-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

XXX
1992-11-10
Piştî kar çûm komelê. Li ser nivîsa ”Rojeva mehê” di nabêna min û Riza Polat da minaqaşeyek biçûk çê bû. Li gorî dîtina wî ”nivîs kurdên başûr rexne dike, wan neheq nîşan dide, PKKê diparêze, wek bi devê yekî apocî hatibe nivîsîn.”

Min got nivîs tam ne bi dilê min e jî lê ne wek tu dibêjî.

Remzî Kerîm, Salim Çelîker û Mahmûd Kîper jî gotin ”formula cumleyê ne xweş e, maneyek çewt dide.”
Rojeva mehê, nivîsên Mûrad Ciwan in.

Li ser vê nivîsê min û Mûrad berê sohbet kir, min got biguhere. Hin der guhertine, lê hin der jî baş furmule nekiriye.

Ji komelê ez çûm semînereke li ABFê(Federasyona Karkiran a Perwerdeyê). Navê semînerê ”Sosyalîzim piştî hilweşîna dîwarê Berlînê” bû.

Di semîner da nivîskar Anders Ehnmark peyivî. Anîka Ahnberg û Stîg Bjorn Ljunggren jî moderatorî kirin.

Li ser sebebên biserneketin û têkçûna sosyalîzmê peyivîn. Semînereke bi mistewa bû, gelek tiştên balkêş gotin.

XXX
1996-11-10
*Telewîzyona Medê nîhayet îro bi min û Rohat Alakom ra li ser rexneyê(kirîtîkê)programek çêkir. Wext hindik bû, 40 deqîqe bû. Mîrhem Yîgît jêhatî bûya û me jî bersîvên xwe dirêj nekirana ewê baştir bûya. Lê em hersê jî ecemî ne, karê ecemiyan jî hewqasî dibe.
Lê bi baweriya min dîsa jî ne xerab bû. Ez ditirsiyam ezê pir bi heyecan bim, lê wer nebû, baş derbas bû.

*Li Tirkiyê wezîrê karên hudur Mehmet Agar îstîfa kir. Derket ortê ji şebekeya Sûsûrlukê ye. Hukûmet mecbûr ma wî biguherîne. Jineka bi navê Meral Akşener anîn dewsa Mehmet Agar. Dibêjin ew jî meriva Çîller e. Yanî ew jî ji şebeka Agar e. Jixwe di nav van ne mimkûn e merivên baş hebin, jin jî, mêr jî neyarên kurdan in.

*Rojnameyên Tirkiyê hema hema giş li dijî Akşenerê ne, dibêjin ew jî ji wan e.

*Min telefonî Fexrî Olçer kir, min jê ra got, heger hûn bixwazin kitêba min ”Sitriyên me” çap bikin, ezê bidim we. Got ezê bi hevalan ea bipeyivim, dûra xeberê bidim te. Çap bikin baş e, qenekê kanin belav jî bikin.

XXX
1999-11-10

Ji Ozgur Politika telefonî min kirin, gotin di demek nêz da em dixwazin bi kurdî heftê du rojan îlaweyeke zarokan derxînin. Ji min jî alîkarî xwestin.

Min got ji bo her jimarê ezê bikanibim çîrokekê ji we ra bişînim. Me bi vî hawî li hev kir. Ewê dûra telefonî min bikin.

Do, min kovara Pîne hejmara duduya ji Enstîtuya Kurdî kirî.

Mîrhem Yîgît ji min ra qala proja Ozgur Polîtîka beşê zarokan kir. Min eynî tişt ji wî ra jî got. Min got ji bo her jimarê ezê bikanibim çîrokekê bişînim.

Ez bawer dikim li ser gotina Mîrhem ji Ozgur Polîtîkayê telefonî min kirin. Yanî referensê min Mîrhem e.

XXX
2017-11-10

Berfîn Dîcle xanimê ev nivîsa min wergerandiye tirkî û ji min raşandiye

” Mamoste bi rastî min tam parvedikir lê ji ber ristika dawî newêrim

Min wekî diyariyek ji we re şand. berê jî min yekî wergerand dîsa ji tırsonekiya xwe min neweşand.

siheta we xweş be!

ama asl olan umut ve direniştier. "ama" ya wê kêm ma ye!

bimîn,n di xweşiyê de!”

Bêhêvî mebe...
Jiyan(heyat) carna meriv diwestîne, carnan zindî dike, carnan bêbiryar û carnan jî biryardar.
Bêbextê, bêwefayê geh rast lê dixe, geh çep lê dixe. Geh dikenîne geh wek zarokekî digirîne.
Geh hundurê meriv dike çewalekî vala.
Geh dilê meriv dike derya hêvî û xeyala
Teslîmîyet û liberxwedan li ber hev didin.
Geh mirin zora jiyanê dibe, geh jiyan zora mirinê.
Ji me hinek bi rik û bi bawerî bi jiyanê ra micadele dikin û hinek jî di nîvê rê da dev ji liberxwedanê berdidin
Lê ciyê me tu carî vala namîne.
Dawiya her şevê tim berbang lê dide.
Zor û zahmetî pir in.
Lê ev e qanûna dinyayê
jiyan û mirin
şîn û şahî
şev û roj tarî û ronahî
bi hev ra hene,
bê hev nabin.
Ev dinya ne ya xweşî û dilgeşiyê tenê ye gerek ew jî hebin
Ya muhîm û rast hêvî û liberxwedan e ji bo wê ye kurd keleş di dest da li serê çiya ne.
Zinarê Xamo

Berfîn xanim, weleh ev ji bo min bû surprîzeke ez qet ne li bende bûm. Spas ji bo vê wergera te ya pir xweş.

Te jê hez kiriye, te kedeke mezin dayê, ne mimkûn e ez bibêjim na neweşîne. Biweşîne û "ama" yê jî lê zêde bike. Vê rêzê tu wiha bikî baştir e:
"Karanlik we aydinlik birlikte war bîrî olmadan öburu olmaz" Gelek silavên biratiyê...