Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.
XXX
1986-08-04
Min ji pîra(jinepîra) ez diçim malê alîkariya wê dikim dolabek kitêban kirî. Ez diçim
malên kal û pîran alîkariya wan dikim. Malên wan paqij dikim, ji wan ra
xwarinên sivik çê dikim, bi wan ra diherim banqeyê, postexanê, dikanan tiştan
dikirim.
Hinek kanin rabin ser xwe, herin derve, lê hinek jî wer di hundur da ne. Em
personalên belediyê(Hemtjänst)diçin alîkariya wan dikin. Bi swêdî ji me ra
dibêjin ”hemsamarit” yanî alîkarê malê.
Pîra min alîkariya wê dikir mala xwe bar dikir, ew dibirin ciyê kal û pîran. Tişt miştên xwe hinek firot, hinek jî dan dezgehên xêratan. Min dolabek jê bi 500 kronî kirî, 100 kron jî heqê birina malê da şufêrê tiştên wê dibir.
XXX
1996-08-04
Heyder Diljen ji welêt vegeriya ye. Em îro bi hev ra peyivîn. Ji min ra hinekî qala
welêt û çavdêriyên xwe kir. Rewş ne baş e, halê milet xerab e.
Min îşev zarok birin ciyê fîşekê hewayî. Dema Festîwala Avê diqede şevekê
Fîşekên hewayî davêjin. Bi hezaran însan hatibûn li têmaşe dikirin. Şiklên pir
xweşik çêkirin, meriv dibû heyran.
Yaşar Kaya û berpirsiyarekî HADEPê îro beyanek dan û gotin em
piştgiriya beyana Evdila Oclan dikin.
Kanala MEDYA jî di weşan û xeberên xwe da bi hawakî fedyok be jî piştgiriya
daxwaza Ocalan dike û weşaneke di paralelê vê daxwazê de dike.
Li ser ”aşîtiyê” teoriyên namayî çêdikin. Bira ew van teoriyan çêkin lê gotinên
Bulent Ecevît yên li ser vê yekê gelkî balkêş in, wer xuya dike dewletê tu soz moz
nedaye Amerîkayê û li pişt perdê jî tiştekî em nizanin, tiştekî di lehê me da
tune ye. Ecevît dibêje:
-Terora separatîst(yanî ya veqetandinê, ya cudaxwaziyê) li
Tirkiyê hatiye dawiya rê. Diyar e Abdullah Ocalan piştî hat girtin û ceza xwar
ev yek fêm kir. Dîsa jî ji bo ku yên li serê çiyan jî bikanibin vegerin
jiyaneke normal me ji wan ra qanûna poşmaniyê hazir kiriye. Helbet em dixwazin
dawiya terorê bînin. Lê belê dewlet li Tirkiyê vê meselê bi tu şexsî ra, bi tu
dezgeyê ra nake mijara bazarê. Yanî ji bo ku Ocalan vê bangê bike me tu soz
nedaye kesî û em nadin.
Lê hin şelafên Abdullah Ocalan dîsa jî gotinên wî fena ku piştî li hev hatinekê
hatibin gotin nîşan didin, tiştên tên wê maneyê dibêjin. Bi baweriya min xwe
dixapînin, li ciyê rehetiyê avê bi ber dilê xwe direşînin.
Bira yên me na bibêjin ”aştî û biratî” lê wa ye xelk tehamul
nake ku yekî kurd bibêje ez bi kurdî zanim.
Ji ber ku parlamenterê Partiya Fazîletê yê Senbolê Mehmet Firat(ez bawer dikim neviyê
Şêx Seîd e) di bîyografiya xwe da gotiye ez bi kurdî jî zanim, hin
parlamenterên MHPê qiyamet rakirin, gotin ev bêexlaqî ye.
Û ji bo ku ji bîyografiya
wî gotina “ez bi Kurdî dizanim” derxin bi daxwaznemeyekê li ba serokê meclîsê
giliyê wî kirin û daxwaz kirin ku serokê meclîsê bi îxtarnameyekê bala wî bikşîne.
Gotin kurdî ne zimanekî resmî ye, lema jî divê nekeve belgeyên Meclîsê.
Parlamenterê MHPê yê Îzmîrê got “ez ji vî hevalî hez nakim. Ji bêexlaqiyê
wêdetir ev ne tiştekî din e.”
Di daxwaznameya MHPê ku ji alî Mustafa Gul ve hat dayin wiha tê gotin:
- Di nav agahdariyên Mehmet Fûat Firat yên li ser jiyana wî da
tê gotin ku ew li gel Erebî, Farisî ew bi
kurdî jî zane. Divê ev îfadeya bêtalîh ji hemû zeptên Meclîsê were
xerakirin û ji înternetê jî bête derxistin û her wisa divê bala wî jî were kişandin.
Belê, piştî meriv vê şêla tirkan û şirîkekî hikûmetê dibîne
meriv fêm nake yê me li ser çi hesabî ji gerîlla ra dibêje sîlehên xwe deynin.
Ez hêvî dikim ev gotinên Edvila Ocalan jî siyaset be, ceribandina bazarekê be.
XXX
2001-08-04
Ji berpirsiyarê Azadiya Welat ra!
Li ser gotina dostekî min do bihîst ku we nivîsa min ya bi
sernivîsa "Ji Serokwezîrê Tirkiyeyê re nameyeke eşkere" di hejmara
Azadiya Welat ya 227an da weşandiye. Ji ber ku min nizanîbû we weşandiye lema
jî heta nuha min lê mêze nekiribû.
Lê piştî ku min bihîst min nivîsa xwe xwend.
Lê ez çi bibînim, nivîsa min hewqas hatiye guharandin ku êdî min bi xwe jî hema
hema nas nekir. Erê nav yê min bû lê nivîs ji ya min gelkî dûr ketibû.
Birayên delal, pir hindik min jî ev kara kiriye, ez jî bûme
berpirsiyarê redaksiyonên rojnameyen û min jî nivîsên xelkê kontrol kirye.
Yanî
pir hindik ez jî hinekî ji vî karî fêm dikim. Tiştê ez dizanim meriv nikane
nivîsên xelkê wiha biguherîne. Mafekî meriv yê wiha tuneye. We nivîsa min hema
hema ji nuh va nivîsîye.
Çimkî we ne tenê di warê îmla û gramerê da, her wisa
we hin gotinên ku min bi kar neanîne jî li ser navê min bi kar anîye.
Yanî we him di warê rastnivîsê da bi nivîsa min lîstiye û him jî zimanê min
guheradniye.
Ez qet fêm nakim bi .i heqî we hewqas guherandin di nivîsa min da kirye?
Mudaxeleyeke wiha ez bawer dikim tenê em Kurd dikanin bikin. Meriv dikane
çewtyên nivîsandinê yanî herfên kêm û zêde rast bike yan jî kin bike û hin beşan
jê bavêje, ez viya fêm dikim û qebûl dikim.
Lê belê tu mafê kesî tuneye ku rabe ziman û hin gotinên nivîsekê biguherîne û
tiştên li gor dilê xwe têxe dewsa wan. Mesela di derekê da min gotiye"em
nikanin garantiyê bidin we", we rabûye guherandiye û gotiye"Em
nikarin misogeriyê bidin we."
Di vir da we ne tenê gotina "misogerî" bi hawakî çewt xistiye dewsa
gotina "garantî"yê, her wisa we lêkera "kanîn"ê" jî
guherandiye, kiriye KARÎN.
Nuha ez ji te di pirsim: Bi çi heqî hûn radibin him zimanê min digeherînin û
him jî gotinên ku min bi kar neanîye û him jî bi hawakî çewt bi kar tînin?
Nimûneyek hîn ecêbtir. Min gotiye:"Dewlet bi hemû dezgeh û mueseseyên xwe
va bûye wek teşkîlateke mafya. Meriv destê xwe davêje kuderê şebekeyek û
grûbeke çeteyan ji bin derdikeve." We rabûye ev cumleya min guherandiye û
ev sosireta li jêr li ser navê min weşandiye:
"Dewlet bi hemû dezgeh û saziyên xwe ve bûye wekî(çima
wekî, lê ne wek? Yek, dewlet mê ye lema jî "wekî" nabe, divê wek be)
rêxistineke mafyayê. Mirov(çima mirov, çima ne meriv?) destê xwe davêje ku derê
rêxistinek û komeke çeteyan derdikeve."
Li vir ji cumleya min wêdetir, êdî cumleyeke nuh heye, yanî
ji xwe ra tiştekî nuh nivîsî ye.
Nimûneyên wiha pir in, lê ez nikanim yeko yeko li ser
hemûyan rawestim.
Îcar piştî ku wiha ye, tew ne hewceye ku ez binivîsînim,
hema hûn dikanin ji dêlî min va binivîsînin û ket û mir! Qet nebe wê demê ewê
him li gor dilê be û ewê him jî bê çewtî û kêmasî be(!)
Birayên delal, ez ne zarok im û ne jî nivîsandinê nuh fêr
dibim ku hûn rabin hewqasî bi nivîsa min bilizîn. Heger li gor we nivîseke
çewto mewto û ne hêjayî weşandinê bû we dikanîbû neweşanda. Destdirêjiyên wiha
ez bi tu hawî ne rast dibînim û ne jî dikanim qebû bikim.
Ji bo ku dirêj û dubare nebe ez nabêjim nivîsa min ji nuh va
biweşînin(esas mafê min heye ku ez ji we viya bixazim); lê belê ez dixwazim ku
hûn vê nameya min biweşînin.
Ez li bende bersîva we me
Bi silavên dostaniyê
Zinarê Xamo
Careke din merheba!
Salim, tu zanî teoriyek min ji zûda heye, ez hertim dibêjim,
Tirk çuqasî zilmê û neheqiyê li kurdan bikin ewê tim li zirarê derkevin. Bala
xwe bidê bi girtina te mala xwe şewitandin. Wek te jî gotiye, li ciyê rehetiyê
bûn sebebê peydabûna îmajeke xerab. Û tu jî "meşhûr" kirin.
Yanî ez dixwazim bibêjim ew çuqasî kurdan biêşînin jî ewê tim li ziraê bin.
Hema îspata herî berbiçav tu yî.
Merivê te gotiye min berê jî texmîn kiribû. Lê ez bawer
dikim nuha min baş nas kir. Lê min şêla te eciband. Te baş kiriye ku te dilê wî
nehîştifye. Bes divê meriv jê ra bibêje, ew kesên ku navê wan dane ya jî pê
dana qebûlkirin divê haya wan bigihînê.
Kesê ji min ra gotibû tu çûyî Diyarbekrê Fexrîyê Farqînî bû.
Ez îsal bi derekê da neçûm. Ev meheke diya min hatiye. Birê
min yê li Mêrsînê jî ewê heta çend rojan were. Yê li Almanya hat û çû. Yanî
îsal tatîla min pir întensîv derbas bû.
Ji ber ku hardiska data(kompîtora) min xera bû lema hemû
edresên min jî çûn. Loma edresa Wîldan û Yilmaz jî nuha li ba min tune, lê ezê
dûra ji te ra bişînim.
Gelek silav
Zinarê Xamo
XXX
2017-08-04
Li ser girtina Mihemed Ronahî di medyaya sosyal da hin tişt belav bûn. Min
rewşa wî ji Adnan Firat Bayar pirsî.
Ednan gelek spas ji bo agahdariya te. Gelo roja mahkima wî
diyar e?
Abûqatê wî heye ya na?
Ednan, ez Mihemed ji nêz ve nas nakim, nizanim rewşa wî ya aborî çawa ye. Heger
hewce be û qebûl bike amademe li gorî qeweta xwe pê ra alîkariyê bikim.
Heger mimkûn e silavên min yên ji dil bigihînê. Bimîne di nava kêf û xweşiyê
da.
XXX
2017-09-13
Merheba Adnan !
Bawer bike min ev mesaja te ya bi deng nuh dît(13/9).
Geleo lazimiya alîkariyê hîn aktuel e ya jî êdî dereng e?
Û heger aktuel be ji kê ra, ji birayê wî ra ya jî ji te ra bişînim? Ez bi
birayî wî ra peyivîm wî tiştek negot….
Gelek silavên dostaniyê
Zinarê Xamo
Inga kommentarer:
Skicka en kommentar