Çend rêz ji bîranînên min -192-

Weşandina hin notên xwe yên rojane û nivîsên xwe yên kevn didomînim. Min got bira wenda nebin. Ew jî tarîxeke. Do ez çi bû me, çi fikirî me bira were zanîn.

1986-07-28

Ji kar derketim rasterast çûm malê. Min telefonî Emer Tuko(Gavan)kir. Me li ser rewşa xwe hinek sohbet kir, got bira Mûrad were û me bêxeber nehêlin. Bira haya me ji hev hebe.

Li ser civîna sibe ya li ser 12ê îlonê bi Heyder ra (Heyder Diljen) peyivîm. Min jê ra qala biryara Federasyonê kir. Got tiştê Federasyon dike çewt e, dibê meriv daxwaza wan qebûl neke. Kê ban kiriye ne muhîm e, dibê beşdar bibin.

Federasyon dibêje emê banga civînên 12ê îlonê bikin, ji ber ku we kiriye em beşdar nabin. Civîna Federasyonê di 2ê(2/8) mehê da ye.

XXX
1987-07-28

Min îro rapora civîna komîteya partiyê teslîmî Seîd Aydogmuş kir. Min rapor bi kurmancî nivîsî bû. Dema dît rapor bi ne bitrkî ye mirûzê xwe tirş kir. Ne bi dilê wî bû, got "bira bi tirkî be ji bo ku her heval jê fêm bike. Bi kurdî her heval baş jê fahm nake...."

Min got ez bi tirkî nanivîsim, wek partiyek kurd dibê zimanê me jî bi kurdî be.
Li ser vê meselê me li hev nekir. Got dibê meriv realîtê qebûl bike, li gorî wê hereket bike.
Min got na, dibê meriv vê rewşê biguhere. Me tiştek nexist serê hev, ne wî ya min qebûl kir, ne min ya wî qebûl kir. Lê min got ez raporeke din bi tirkî nanivîsînim.

XXX
2016-07-28 20:45

Kurdekî bi navê Rizganê Nûrê ji min ra e-mailik balkêş şandiye, gotiye:

”Silav rêz mamoste. Hevalekî mın heye ji suverga Riha yê ye. Dibê je em türkmenin, 60 gündên me li hêla Qerejdaxê hene. Dibêjin kal bavên me ji Asya Navîn hatine vê derê. Camêr dibê gelo em kurd in navê êşîra me Türkmen li me kirin e mamoste evena kurdin ya jî türkmen in? Ji kerama xwe tu zanî bersivê min ra bişîne.
Silav rêz ji te û malbata te ra”
Min ev bersîv dayê.

Li Qerejdaxê eşîra tirka heye, eşîreke kurd e, tu têkiliya wan bi tirkan tuneye. Navê vê eşîrê çima û kînga bûye "eşîra tirka" ez nizim.
Lê miheqeq sbebek û dîrokeke wê heye. Ji bo eşîra Qeregêçiyan jî tirk eynî tiştî dibêjin.
Tirkan heta nuha ne ji bo Qeregêçiyan û Tirkan tenê, ji bo hemû kurdan digotin tik in.
Lê kêm kêmaqilên jê bawer bikin hene. Çawa navên bajarên me, gundên me guhertine, çawa paşnavên tirkî dane me, di dîrokê da navên hin eşîran jî guhertine. Paşnavên bi hezaran kurdan kirine ”Turk, Turkoglu, Turkmenoglu, Ozturk” .

Ma vana turk in?
Na, tirkan bi qestî ev paşnavên tirkî dane wan. Muheqeq mesela eşîra Tirka jî tiştekî wiha ye. Jê ra bibêje kalikê wî, kalêkalê wî, pîrika wî, pîrapîra wî kîjanî gotineke bi tirkî zanîbûne.
Bi meriv ra aqil hebe meriv li gorî vireke dijminê xwe, eslê xwe înkar nake…